މުބާރާތުގެ ދެވަނަ ދުވަހުގެ ފުރަތަމަ މެޗު އެސް.އެންއިން ކާމިޔާބު ކޮށްފިއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019ގެ މެޗުތައް މިއަދު ހަވީރު ފަށާފައި ވާއިރު ޖުމްލަ 4 މެޗު ވަނީ ކުޅެފައެވެ. އެއީ ހަވީރު ދެމެޗު އަދި ރޭގަނޑު ދެމެޗެވެ.
މުބާރާތުގެ ދެވަނަ ދުވަހުގެ ފުރަތަމަ މެޗުގައި ފެކަލްޓީ އޮފް އާރޓްސް އަދި ސްކޫލް އޮފް ނާރސިންގގެ ކުރިމަތިލުން 28-05 ޕޮއިންޓްގެ ބޮޑު ތަފާތަކުން ސްކޫލް އޮފް ނާރސިންގއިން ވަނީ ކާމިޔާބުކޮށްފައެވެ. މި މެޗުގައި އެސް.އެންއިން މޮޅު ކުޅުމެއް ދައްކާފައިވާއިރު އެފް.އޭ ޓީމުގެ ފަރާތުން ވަނީ ހިތްވަރުގަދަ ކުޅުމެއް ދައްކައިފައެވެ. މިމެޗުގެ އެންމެ މޮޅު ކުޅުންތެރިޔަކީ ސްކޫލް އޮފް ނާރސިންގްގެ ރަޝާ ރިޒާއެވެ.
ދެވަނަ މެޗުގައި ފެކަލްޓީ އޮފް އެންޖިނެރިންގް ސައިންސް އެންޑް ޓެކްނޮލޮޖީ އަތުން 09-16 ޕޮއިންޓްއިން ސެންޓަރ ފޯ ފައުންޑޭޝަން ސްޓަޑީޒް ވަނީ މޮޅުވެފައެވެ. މިމެޗުގެ އެންމެ މޮޅު ކުޅުންތެރިޔަކީ ސީ.އެފް.އެސްގެ އައިޝަތު އީމާއެވެ.
6 ޕޮއިންޓާއެކު ގްރޫޕް އޭގެ އެއްވަނައިގައި އޮތް ދެޓީމު ކަމުގައިވާ ސްކޫލް އޮފް ނާރސިންގް އަދި ސެންޓަރ ފޯ ފައުންޑޭޝަން ސްޓަޑީޒް ވަނީ ކުއާޓަރ ފައިނަލަށް ދަތުރުކޮށްފައެވެ.
މުބާރާތުގެ ތިންވަނަ ދުވަހުގައި ސީ.އެފް.އެސް އަދި އެސް.އެން ވާދަކުރަން ހަމަޖެހިފައިވާއިރު މިމެޗުން ބަލިވާ ޓީމެއް ދާނީ ގްރޫޕް އޭގެ ދެވަނައަށެވެ. ގްރޫޕް އޭއިން ތިންވަނައަށް ދާ ޓީމު ކަށަވަރު ވާނީ އެފް.އޭ އަދި އެފް.އެސް.ޓީ.ގެ ކުރިމަތިލުމަށްފަހުއެވެ. މިމެޗުން ބަލިވާ ޓީމެއް މުބާރާތުން ކަޓާނެއެވެ.
މުބާރާޓުގެ ތިންވަނަ ދުވަހުގެ މެޗުތައް ފަށަން ހަމަޖެހިފައިވަނީ 20 އޮކްޓޯބަރ ވާ އާދިއްތަ ދުވަހުގެ ރެއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ ތިންވަނަ މުބާރާތެވެ. މިގޮތުން ފުރަތަމަ މުބާރާތް ބޭއްވުނީ 2015ގައި ކަމަށްވާއިރު، އެ އަހަރުގެ ތަށި އުފުލާލީ އެމް.އެން.ޔޫ ބިޒްނަސް ސްކޫލުންނެވެ. 2016 ވަނަ އަހަރު ބޭއްވުނު 2 ވަނަ މުބާރާތުގެ ޗެމްޕިއަންކަން ފެކަލްޓީ އޮފް ލޯ އެންޑް އިސްލާމިކް ސްޓަޑީޒް އިން ހޯދިއިރު، 2017 އަދި 2018ވަނަ އަހަރު މި މުބާރާތް ބާއްވާފައެއް ނުވެއެވެ. މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރތަކަށް ހުޅުވާލައިގެން ބާއްވާ މުބާރާތަކަށްވާއިރު، މި މުބާރާތުގައި ޖުމްލަ 10 ޓީމު މިފަހަރު ވާދަކުރެއެވެ. މި 10 ޓީމާއެކު، އެމް.އެން.ޔޫ.އެސް.ޔޫގެ ގޮފި އުފެދިފައިވާ ހުރިހާ ފެކަލްޓީ/ސެންޓަރތަކެއް މި މުބާރާތުގައި ތަމްސީލުކުރާއިރު، މި މުބާރާތްވެގެންދާނީ ތާރީޚީ މުބާރާތަކަށެވެ.
ލިޔުނީ: އާމިނަތު ޝަމާ މުހައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
