އެމް.އެން.ޔޫ.އެސް.ޔޫގެ ތިންވަނަ އިންޓަރ ފެކަލްޓީ ނެޓްބޯޅަ މުބާރާތުގެ ފައިނަލުގައި ވާދަކުރާނީ އެފް.އެލް.އައި.އެސް އަދި އެމް.އެން.ޔޫ.ބީ.އެސްކަން ކަށަވަރުވެއްޖެއެވެ. މީގެ ކުރިން ބޭއްވި 2 މުބާރާތުގެ ފައިނަލުގައި ވެސް ވާދަކުރީ ހަމަ މި 2 ޓީމެވެ. (އެފް.އެލް.އައި.އެސް އަކީ އޭރުގެ އެފް.އެސް.އެލް އެވެ.) މީގެ ތެރެއިން 2015 ވަނަ އަހަރު ތަށި ހޯދީ އެމް.އެން.ޔޫ.ބީ.އެސްކަމަށްވާއިރު، 2016 ވަނަ އަހަރުގެ ތަށި އުފުލާލީ އެފް.އެލް.އައި.އެސް (އޭރުގެ އެފް.އެސް.އެލް)އިންނެވެ.
މިރޭ ކުޅުނު ސެމީ ފައިނަލުގައި އެމް.އެން.ޔޫ ބީ.އެސް އަދި އެފް.އެލް.އައި.އެސް އިން ވަނީ ތަފާތު މޮޅު ކުޅުމެއް ދައްކައިފައެވެ.
އެމް.އެން.ޔޫ ބީ.އެސް އިން މުބާރާތުގެ ފައިނަލުގެ ޖާގަ ކަށަވަރުކުރީ ސެމީ ފައިނަލުގައި އެސް.އެން އާ ވާދަކޮށް 23-10 ޕޮއިންޓްގެ ތާފާތު ބޮޑު ނަތީޖާ އަކުންނެވެ.
އެމް.އެން.ޔޫ ބީ.އެސްގެ މި މޮޅާއެކު، މިހާތަނަށް ކުޅުނު ހުރިހާ މެޗަކުން މޮޅުވި އެސް.އެން އަށް ވަނީ މުބާރާތުގެ ފައިނަލުގައި ވާދަކުރުމުގެ ފުރުސަތު ގެއްލިފައެވެ. މިމެޗުގެ އެންމެ މޮޅު ކުޅުންތެރިއަކަށް ހޮވުނީ އެމް.އެން.ޔޫ ބީ.އެސްގެ އައިޝަތު ހަސަންއެވެ.
މުބާރާތުގެ ސެމީ ފައިނަލުގެ ދެވަނަ މެޗުގައި އެފް.އެލް.އައި.އެސް އަދި އެފް.އެޗް.އެސް ބައްދަލުކުރި މެޗު 30-18 ޕޮއިންޓްއިން ކާމިޔާބުކުރީ އެފް.އެލް.އައި.އެސްއެވެ. މި ނަތީޖާ އާއެކު އެފް.އެލް.އައި.އެސް ވަނީ މުބާރާތުގެ ފައިނަލަށް ދަތުރުކޮށްފައެވެ. ވާދަވެރި ކުޅުމެއް ފެނިގެން ދިޔަ މިމެޗުގައި އެފް.އެޗް.އެސްއަށް ސްކޯކުރުމަށް ރަނގަޅު ފުރުސަތުތަކެއް ލިބި އެ ފުރުސަތުތަށް ބޭކާރުވިނަމަވެސް އެފް.އެޗް.އެސް ޓީމުގެ ފަރާތުން ވަނީ ހިތްވަރުގަދަ ކުޅުމެއް ދައްކައިފައެވެ. މިމެޗުގެ އެންމެ މޮޅު ކުޅުންތެރިއަކީ އެފް.އެލް.އައި.އެސްގެ އާމިނަތު އީމާން އަބްދުލް ޣަފޫރެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓް ބޯޅަ މުބާރާތް 2019ގައި އެމް.އެން.ޔޫ ބިޒްނަސް ސްކޫލް އަދި ފެކަލްޓީ އޮފް ލޯ އެންޑް އިސްލާމިކް ސްޓަޑީޒް ވާދަކުރާ ފައިނަލް މެޗު ކުޅުމަށް ހަމަޖެހިފައިވަނީ 23 އޮކްޓޯބަރ ވާ ބުދަ ދުވަހުގެ ރޭގަނޑު 8:30 ގައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ ތިންވަނަ މުބާރާތެވެ. މިގޮތުން ފުރަތަމަ މުބާރާތް ބޭއްވުނީ 2015ގައި ކަމަށްވާއިރު، އެ އަހަރުގެ ތަށި އުފުލާލީ އެމް.އެން.ޔޫ ބިޒްނަސް ސްކޫލުންނެވެ. 2016 ވަނަ އަހަރު ބޭއްވުނު 2 ވަނަ މުބާރާތުގެ ޗެމްޕިއަންކަން ފެކަލްޓީ އޮފް ލޯ އެންޑް އިސްލާމިކް ސްޓަޑީޒް އިން ހޯދިއިރު، 2017 އަދި 2018ވަނަ އަހަރު މި މުބާރާތް ބާއްވާފައެއް ނުވެއެވެ. މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރތަކަށް ހުޅުވާލައިގެން ބާއްވާ މުބާރާތަކަށްވާއިރު، މި މުބާރާތުގައި ޖުމްލަ 10 ޓީމު މިފަހަރު ވާދަކުރެއެވެ. މި 10 ޓީމާއެކު، އެމް.އެން.ޔޫ.އެސް.ޔޫގެ ގޮފި އުފެދިފައިވާ ހުރިހާ ފެކަލްޓީ/ސެންޓަރތަކެއް މި މުބާރާތުގައި ތަމްސީލުކުރާއިރު، މި މުބާރާތްވެގެންދާނީ ތާރީޚީ މުބާރާތަކަށެވެ.
ލިޔުނީ: އާމިނަތު ޝަމާ މުހައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
