28 ނޮވެންބަރ 2019ވީ ބުރާސްފަތިދުވަހުގެރޭ ޤައުމީ ޔުނިވަރސިޓީ (އެމް.އެން.ޔޫ)ގެ ސެންޓަރ ފޯރ ފައުންޑޭޝަންގެ (ސީ.އެފް.އެސް) އޮޑިޓޯރިއަމްގައި ބޭއްވުނު ޙަފްލާއެއްގައި، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ (އެމް.އެން.ޔޫ.އެސް.ޔޫ) 8 ވަނަ ދައުރުގެ ހިންގާ ކޮމިޓީ، އެމް.އެން.ޔޫގެ ޑެޕިއުޓީ ވައިސް ޗާންސެލަރ އަލްފާޟިލް ހުޞައިން ހަލީމް އިފްތިތާހުކޮށްދެއްވައިފިއެވެ.
މި ޙަފްލާ ފެށިގެން ގޮސްފައިވަނީ ކިރިތި ޤުރުއާނުގެ ބަރަކާތުންނެވެ. ޤުރުއާން ކިޔެވީ ސްކޫލް އޮފް ނަރސިންގގެ ދަރިވަރު މަރިޔަމް މަލަކާ މާހިރެވެ. އަދި ޙަފްލާ ކުރިއަށް ދާނެ ގޮތުގެ ތަޢާރަފުކޮށްދީފައިވަނީ ފެކަލްޓީ އޮފް އަރޓްސްގެ ދަރިވަރު އައިޝަތު ނަބާހަތު މޫސާއެވެ.
މި ޙަފްލާގެ އެންމެ ފުރަތަމަ ނަންބަރެއްގެ ގޮތުން ކުރިއަށްދިޔައީ، އެމް.އެން.ޔޫ.އެސް.ޔޫގެ 7 ވަަނަ ދައުރުގައި ބޭއްވިފައިވާ އިތުރު ހަރަކާތްތަކުގެ މައުލޫމާތު ހިއްސާ ކުރުމެވެ. މައުލޫމާތު ހިއްސާކޮށްދެއްވާފައިވަނީ އެމް.އެން.ޔޫ.އެސް.ޔޫގެ ނައިބު ރައީސް (އަމަލީ) ޙަސަން ޝާހެވެ. އެގޮތުން، ޝާހުވަނީ 7 ވަނަ ދައުރުގައި ހިންގުނު ހަރަކާތްތަކުގެ ތަފްސީލު ހިއްސާކޮށްފައެވެ.
އެއަށްފަހު، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ 7 ވަނަ ދައުރުގެ އަަހަރީ ވީޑިއޯ ރިޕޯޓް ގެނެސްދީފައިވެއެވެ. އަދި މި ޙަފްލާގައި އެމް.އެން.ޔޫ.އެސް.ޔޫގެ ދެވަނައަށް އެންމެ މަތީ ޝަރަފު، ”އެމް.އެން.ޔޫ ދަރިވަރުންގެ ޔޫނިއަންގެ ޝަރަފުވެރިކަމުގެ އިނާމު“ ގެ ނަން ބަދަލުކުރުމާ ގުޅޭ ވީޑިއޯ ރިޕޯޓެއް ދެއްކިފައިވާއިރު، މި އިނާމު ޖުމްލަ 14 ފަރާތަކަށް އެރުވިފައިވެއެވެ.
މި ޙަފްލާގައި އެމް.އެން.ޔޫ.އެސް.ޔޫގެ 7 ވަނަ ދައުރުގެ ރައީސް މުޙައްމަދު ޝާން އާމިރު ވާހަކަފުޅުދެއްކެވުމުގެ އިތުރުން، އެމް.އެން.ޔޫ.އެސް.ޔޫ ޝަރަފުވެރިކަމާއި ޢިއްޒަތްތެރިކަމުގެ ނިޝާނުގެ ލަޤަބު ލިބިވަޑައިގަތްއެމް.އެން.ޔޫގެ ކުރީގެ ދަރިވަރު އަދި އެމް.އެން.ޔޫ.އެސް.ޔޫގެ އިސްވާރު އަލީ ރިޔާޒާއި އެމް.އެން.ޔޫ.އެސް.ޔޫގެ 6 ވަނަ ދައުރުގެ ރައީސް އަރުޝަދު އަޝްރަފް ވާހަކަފުޅުދައްކަވާފައިވެއެވެ.
މި ހަފްލާގައި ދެން ކުރިއަށް ގޮސްފައިވަނީ އެމް.އެން.ޔޫ.އެސް.ޔޫގެ 8 ވަނަ ދައުރުގެ މެންބަރުންނަށް މަޤާމު ހަވާލުކުރުމެވެ. މަޤާމުތައް ހަވާލުކޮއްދެއްވީ ޙަފްލާގެ ޝަރަފްވެރި މެހެމާން ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ޑެޕިއުޓީ ވައިސް ޗާންސެލަރ އަލްފާޟިލް ހުސައިން ހަލީމެވެ.
އެމް.އެން.ޔޫ.އެސް.ޔޫގެ 8 ވަނަ ދައުރުގެ ހިންގާ ކޮމިޓީ:
- ރައީސް: ޢަލީ ޝަމްޢޫން
- ނައިބު ރައީސް (ޢިލްމީ): އަރުޝަމް މުޙައްމަދް
- ނައިބު ރައީސް (ގޮފިތައް): އަބްދުﷲ ޝަހުނީޒް
- ނައިބު ރައީސް (އަމަލީ): ހުސައިން އަލީ\
- ޙަޒާންދާރު: ހުސައިން ޒައިދް
- ސެކްރެޓަރީ: އައިމިނަތް ހަމީޒާ
- އެސިސްޓެންޓް ސެކްރެޓަރީ: މައިސަރާ އަބްދުލް ސައްތާރް
- މީީޑިއާ ކޯޑިނޭޓަރ: މުޙައްމަދު ޢަޙުނަފް
މި ޙަފްލާގައި އެމް.އެން.ޔޫ.އެސް.ޔޫގެ 8 ވަނަ ދައުރުގެ ރައީސް ޢަލީ ޝަމްޢޫން ވާހަކަފުޅުދައްކަވައިފައިވާއިރު، ޖަމިއްޔާތަކުގެ ރަޖިސްޓަރަރ އަލްފާޟިލް އަޙްމަދު އިރާޝްގެ ވާހަކަފުޅުދައްކަވައިފައިވެއެވެ.
މި ޙަފްލާގެ އެންމެ ފަހު ނަންބަރެއްގެ ގޮތުން ހަފްލާގެ ޝަރަފުވެރި މެހެމާނު އެމް.އެން.ޔޫގެ ޑެޕިއުޓީ ވައިސް ޗާންސެލަރ އަލްފާޟިލް ހުސައިން ހަލީމް ވަނީ ވާހަކަފުޅު ދައްކަވައިފައެވެެ. ޝަރަފުވެރި މެހެމާނުގެ ވާހަކަފުޅުގައި އެމް.އެން.ޔޫ.އެސް.ޔޫއަކީ ރާއްޖޭގައި އުފެދިފައިވާ ޖަމިއްޔާތަކުގެ ތެރެއިން އެންމެ ހިންގުންތެރި އެންމެ ގިނަ ހަރަކާތްތައް ބާއްވާ ޖަމިއްޔާއެއްކަން ފާހަގަކުރެއްވިއެވެ.
ދަރިވަރުންގެ ޔޫނިއަން އިން ދޭ އެންމެ މަތީ ޝަރަފުކަމަށްވާ ”އެމް.އެން.ޔޫ.އެސް.ޔޫ ޝަރަފުވެރިކަމާއި ޢިއްޒަތްތެރިކަމުގެ ނިޝާނުގެ ވެރިޔާ”ގެ ލަޤަބު އެންމެ ފަރާތަކަށް އެރުވިފައިވާއިރު، އެމް.އެން.ޔޫ.އެސް.ޔޫއިން ދެއްވާ 2 ވަނަ އަށް އެންމެ މަތީ ޝަރަފްކަމުގައިވާ ”ދަރިވަރުންގެ ޔޫނިއަންގެ ޝަރަފްވެރިކަމުގެ އިނާމް“، ”މަރުޙޫމް އަޙްމަދު ޢަބްދުﷲ ނަޞީރުގެ ހަނދާނުގައި ދެވޭ އެމް.އެން.ޔޫ ދަރިވަރުންގެ ޔޫނިއަންގެ ޝަރަފުވެރިކަމުގެ އިނާމު“ ގެ ނަމަށް ބަދަލުކޮށްފައިވެއެވެ. މި އިނާމު ޖުމްލަ 14 ފަރާތަކަށް އެރުވިފައިވެއެވެ. އަދި މިއަހަރުގެ ޑީންސް އިނާމް 4 ފަރާތެއް ހާސިލް ކޮށްފައިވާއިރު، 2019 ވަނަ އަހަރުގެ އެންމެ ހަރަކާތްތެރި ގޮފިތަކަށް ވެސް ވަނީ އިނާމު އެރުވިފައެވެ.
ލިޔުނީ: މުޙައްމަދު އަޙުނަފް،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
