ދިވެހިރާއްޖޭގެ ޤައުމީ އުނިވަރސިޓީގެ ދަރިވަރުންގެ ޔޫނިއަންގެ 2ވަނައަށް އެންމެމަތީ ޝަރަފު ”އެމް.އެން.ޔޫ.އެސް.ޔޫ ޝަރަފްވެރި ކަމުގެ އިނާމު“ގެ ނަން އެމް.އެން.ޔޫ.އެސް.ޔޫ ”މަރްހޫމް އަހްމަދު އަބްދުﷲ ނަސީރު ގެ ހަނދާނުގައި ދެވޭ އެމް.އެން.ޔޫ.އެސް.ޔޫ ޝަރަފުވެރިކަމުގެ އިނާމް“ގެ ނަމަށް ބަދަލުކޮށްފިއެވެ.
އެމް.އެން.ޔޫ.އެސް.ޔޫ ޝަރަފްވެރި ކަމުގެ އިނާމަކީ ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަންއަށް ތަފާތު އެކި ރޮގުން ގިނަ ޚިދުމަތްތަކެއް ކުރައްވާފައިވާ ފަރާތްތަކަށް އެކަމުގެ އަގުވަޒަންކޮށް އެރުވޭ ޝަރަފުގެ އިނާމެކެވެ. މި އިނާމުގެ ނަން އެމް.އެން.ޔޫ.އެސް.ޔޫ ”މަރްޚޫމް އަޙްމަދު އަބްދުﷲ ނަސީރު ގެ ހަނދާނުގައި ދެވޭ އެމް.އެން.ޔޫ.އެސް.ޔޫ ޝަރަފުވެރިކަމުގެ އިނާމް“ގެ ނަމަށް ބަދަލު ކުރެވުނީ އެމް.އެން.ޔޫ.އެސް.ޔޫގެ 8 ވަނަ ދައުރުގެ ހިންގާކޮމިޓީ އިފްތިތާހު ކުރުމަށް ބޭއްވުނު ޖަލްސާގައެވެ. މިރަސްމިއްޔާތު ބޭއްވިފައިވަނީ 2019 ނޮވެމްބަރ 28 ވަނަ ދުވަހު ސެންޓަރ ފޯރ ފައުންޑޭޝަން ސްޓަޑީސް (ސީ.އެފް.އެސް) އޮޑިޓޯރިއަމްގައެވެ.
މަރުޚޫމް އަޙުމަދު އަބްދުﷲ ނަސީރަކީ އެމް.އެން.ޔޫ.އެސް.ޔޫ އިސްވާރެއްގެ ގޮތުގައި މަސައްކަތް ކުރަމުންދިޔަ ލާމަސީލު އިސްވާރެކެވެ. މަރުޚޫމް އަޙުމަދު އަބްދުﷲ ނަސީރުގެ މަސައްކަތްތައް އެމް.އެން.ޔޫ.އެސް.ޔޫއާއެކީ ހޭދަކުރެވުނު ކުޑަ މުއްދަތުގައި ވަރައް ފުރިހަމައަށް ފެނިގެން ގޮސްފައިވެއެވެ. އެގޮތުން، އެކިއެކި ފޯރަމްތަކުގައި މަސައްކަތް ކުރުމުގެ އިތުރުން 2019 ވަނަ އަހަރު އެމް.އެން.ޔޫ ވޮލީޓީމުގެ އެސިސްޓެންޓް ކޯޗެއްގެ ގޮތުގައި މަސައްކަތް ކޮށްފައިވެއެވެ.
އަރުޝީ / ހދ. ކުޅުދުއްފުށީ
(ސެންޓަރ ފޯރ ފައުންޑޭޝަން ސްޓަޑީސް)
| ފޮޓޯ : އެމް.އެން.ޔޫ.އެސް.ޔޫ މީޑިޔާ
އެމް.އެން.ޔޫ.އެސް.ޔޫގައި އިސްވާރެއްގެ ގޮތުގައި މަސައްކަތް ކުރަމުން ދިޔަ އަޙްމަދު އަބްދުﷲ ނަސީރުވަނީ 2019 ވަނަ އަހަރު ޖޫން މަހުގެ ތެރޭގައި މި ފަނާވަނިވި ދުނިޔެއާ އަލްވަދާއު ކިޔާފައެވެ. އެހެންކަމުން، އެކަމުގެ ހިތާމައިގައި ބައިވެރިވެ، މަރުޚޫމް އަޙުމަދު އަބްދުﷲ ނަސީރުގެ މަސއްކަތްތަކުގެ އަގުވަޒަން ކުރުމުގެ ގޮތުން އެމް.އެން.ޔޫ.އެސް.ޔޫ ގެ ޝަރަފުވެރިކަމުގެ އިނާމުގެ ނަން މަރުޚޫމް އަޙުމަދު އަބްދުﷲ ނަސީރުގެ ނަމަށް ވަނީ ބަދަލުކުރެވިފައެވެ.
ލިޔުނީ: އާމިނަތު ހަމީޒާ އަޙްމަދު
ސެކްރެޓަރީ، އެމް.އެން.ޔޫ.އެސް.ޔޫ
