”ފިޔަވަތީ“ގައި ދިރިއުޅޭ ކުޑަކުދިންގެ ޓީމެއް ދިވެހިރާއްޖޭގެ ޤައުމީ ޔުނިވަރސިޓީއަށް ޒިޔާރަތްކޮށްފިއެވެ.
2019 ޑިސެންބަރ 30ވީ ހޯމަދުވަހުގެ ހެނދުނު ކުރި މި ޒިޔާރަތުގައި، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ބައެއް މެންބަރުން އެ ދަރިވަރުންނާއެކު އަމަލީގޮތުން ވަނީ ބައިވެރިވެފައެވެ. މިގޮތުން، އެ ދަރިވަރުންނަށް އެމް.އެން.ޔޫ އަދި އެމް.އެން.ޔޫ.އެސް.ޔޫގެ ތަޢާރަފުކޮށްދިނުމަށް ދެވުނު ޕްރެޒެންޓޭޝަން ހުށަހަޅާފައިވަނީ އެމް.އެން.ޔޫ.އެސް.ޔޫގެ މެންބަރުންކަން ފާހަގަކޮށްލެވެއެވެ.
އެމް.އެން.ޔޫގެ ސެންޓްރަލް އެޑްމިނިސްޓްރޭޝަން އިމާރާތަށް ކުރެވުނު މި ޒިޔާރަތުގައި، ޕްރެޒެންޓޭޝަންއަށްފަހު ކެމްޕަހުގައި ހުރި އެމް.އެން.ޔޫގެ ތަފާތު އިމާރާތްތަކާއި ޑިޕާޓްމަންޓްތައްވަނީ މި ކުދިންނަށް ދައްކާފައެވެ. އަދި އެމް.އެން.ޔޫގެ މަސައްކަތްތައް ހިނގާގޮތް ބަލާލުމުގެ ފުރުޞަތުވަނީ މި ކުދިންނަށް ދެވިފައެވެ.
މިފަދަ ޙަރަކާތްތަކަކީ މުޖްތަމަޢުގެ ލާބަ އާއި މަންފާއަށްޓަކައި ހިންގޭ ޙަރަކާތްތަކަށްވާއިރު، މިފަދަ އެތައް ޙަރަކާތްތަކެއް އެމް.އެން.ޔޫ އާއި އެމް.އެން.ޔޫ.އެސް.ޔޫ ގުޅިގެން ހިންގާކަން ފާހަގަކޮށްލެވެއެވެ. އަދި އެމް.އެން.ޔޫގެ މިފަދަ ބޮޑެތި ޙަރަކާތްތަކުގައި ބައިވެރިވުމުގެ ފުރުޞަތު ފަހިކޮށްދެއްވާކަމަށްޓަކައި، އެމް.އެން.ޔޫގެ މެނޭޖްމަންޓްގެ އެންމެހާ ބޭފުޅުންނަށް މި ފުރުޞަތުގައި ޝުކުރު އަދާކުރަމެވެ.
ލިޔުނީ: މުޙައްމަދު އަޙްނަފް،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
