ރާއްޖެ ޓީވީއިން ގެނެސްދޭ ހަބަރު ފީތާ ޕްރޮގްރާމްގައި އެމްއެންޔޫއެސްޔޫގެ 2 މެންބަރަކު ބައިވެރިވެ، 2020 ވަނަ އަހަރު ކުރުމަށް ރާވާފައިވާ ޙަރަކާތްތަކުގެ މައުލޫމާތު ހިއްސާކޮށްފިއެވެ.
މި ޕްރޮގްރާމްގައި އެމްއެންޔޫއެސްޔޫގެ ފަރާތުން ބައިވެރިވީ އެމްއެންޔޫއެސްޔޫގެ ގޮފި އިންޖިނިއަރިންގ ސައިންސް ޓެކްނޮލޮޖީ އެސޯސިއޭޝަން (އެސްޓާ)ގެ ރައީސް އިބްރާހީމް ޣާނިމް ޝާހިދުގެ އިތުރުން އެމްއެންޔޫއެސްޔޫ މީޑިއާ ޓީމް މެމްބަރު އަބްދުﷲ އަތޫފް އާތިފް އެވެ.
2019 ޑިސެންބަރ 28ވީ ހޮނިހިރުދުވަހު ރާއްޖެ ޓީވީއިން ދުރަށްދެއްކި މި ޕްރޮގްރާމްގައި އެމްއެންޔޫއެސްޔޫއިން ނިމިދިޔަ އަހަރު ހިންގައިފައިވާ ހަރަކާތްތަކުގެ މައުލޫމާތު ދީފައިވާއިރު 2020 ވަނަ އަހަރަށް ރޭވިފައިވާ ބައެއް ހަރަކާތްތަކާއި ބެހޭ މައުލޫމާތުވެސް ވަނީ ދީފައެވެ. އެގޮތުން 2020 ވަނަ އަހަރު ބޭއްވުމަށް ރޭވިފައިވާ އިލްމީ އަދި އަމަލީ ހަރަކާތްތަކާއި ބެހޭ ތަފްސީލީ މައުލޫމާތު ވަނީ ދީފައެވެ.
އެމް.އެން.ޔޫ.އެސް.ޔޫ އަކީ 10،000 އަށްވުރެ ގިނަ މެމްބަރުންގެ ޖަމިއްޔާއެކެވެ. މި ޖަމިއްޔާއިން އަންނަނީ އެމްއެންޔޫ އަދި އެހެނިހެން ކޮލެޖް، ޔުނިވަރސިޓީ އަދި މަތީ ސާނަވީ އަށް ކިޔަވައިދޭ ސްކޫލްތަކަށް ހުޅުވައިލައިގެން ގިނަ ހަރަކާތްތަކެއް ކުރިޔަށް ގެންދަމުންނެވެ. މި ހުރިހާ ހަރަކާތެއް ހިންގައި ކުރިޔަށް ގެންދަނީ އެމްއެންޔޫގައި ކިޔަވަމުންގެންދާ ދަރިވަރުންކަން ފާހަގަކޮށްލެވެއެވެ.
ލިޔުނީ: މުޙައްމަދު އަޙްނަފް،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
