1441 ވަނަ އަހަރުގެ ހުރަވީ ދުވަހުގެ މުނާސަބަތުގައި މިނިސްޓްރީ އޮފް ހޯމް އެފެއާޒްގެ ފަރާތުން އިންތިޒާމުކޮށްގެން ތާޖުއްދީން ސްކޫލުގައި ބޭއްވި ރަސްމީ ޖަލްސާގައި އެމް.އެން.ޔޫ ތަމްސީލުކުރުމަށް އެމް.އެން.ޔޫ.އެސް.ޔޫގެ މެންބަރުން ބައިވެރިވެއްޖެއެވެ.
2020 ޖަނަވަރީ 28ވީ އަންގާރަދުވަހުގެރޭ 08.15ގައި ބޭއްވުނު ރަސްމީ ޖަލްސާ ޝަރަފްވެރި ކޮށްދެއްވާ މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ޙަސަން ދެއްކެވި ވާހަކަފުޅުގައި ދޮން ބަންޑާރައިންގެ ޝަޚްޞިއްޔަތުގައި ހުރި ރިވެތި ސިފަތަކުން ޢިބްރަތް ލިބިގަތުމަށް އިލްތިމާސްކުރެއްވިއެވެ.
މީގެ އިތުރުން މި ޖަލްސާގައި ދިވެހި ބަހާއި އަދަބިއްޔާތުގެ ދާއިރާއިން ވާހަކަދެއްކުމުގެ ފަންނު ކުރިއެރުވުމުގެ ރޮނގުން ހިތްވަރުދިނުމުގެ ޤައުމީ އިނާމު ޙާޞިލުކުރައްވާފައިވާ އަލްފާޟިލް މުޙައްމަދު ޝިފާން ވަނީ ވަރަށް ބަލާޣާތްތެރިކަމާއެކު އައްސުލްޠާނުލްޣާޒީ ޙަސަން ޢިއްޒުއްދީން (އެއްވަނަ) ސިރީ ކުލަރަންމީބަ ކައްތިރި ބަވަނަ މަހާރަދުން ނުވަތަ ދޮންބަންޑާރައިންގެ ވާހަކަ ކިޔައިދެއްވާފައެވެ. މީގެ އިތުރުން މި ޖަލްސާގައި މިނިސްޓްރީ އޮފް ހޯމް އެފެއާޒްގެ ސްޓޭޓް މިނިސްޓަރ އަލްފާޟިލް މުޙައްމަދު މާޙިރު ޢީސާވެސް ވަނީ ބައިވެރިންނާ މުޚާޠަބުކޮށް ވާހަކަދައްކަވާފައެވެ.
ކޮންމެ އަހަރެއްގެވެސް ޖުމާދަލްއާޚިރާ 03 ވަނަ ދުވަހު ދޮންބަންޑާރައިންގެ މަތިވެރި ޖިހާދު ފާހަގަކޮށް، ޤައުމިއްޔަތުގެ ޖޯޝު ދިވެހިންގެ ހިތްތަކުގައި ދިރުވާ އާލާކުރުމުގެ މަޤްޞަދުގައި ހުރަވީ ދުވަހުގެ ޙަފްލާ ބާއްވަމުން އަންނައިރު، މި އަހަރުގެ ޖަލްސާގައި ދޮންބަންޑާރައިންގެ ޖިހާދު ދައްކުވައިދޭ ތަމްސީލެއް ތާޖުއްދީން ސްކޫލްގެ ދަރިވަރުންވަނީ ހުށަހަޅައިދީފައެވެ.
އެމް.އެން.ޔޫ.އެސް.ޔޫ އިން އަންނަނީ މިފަދަ ޤައުމީ ޖަލްސާތަކުގައި ދިވެހިރާއްޖޭގެ ޤައުމީ ޔުނިވަރސިޓީ ތަމްސީލުކުރަމުންނެވެ. މިގޮތުން ފާއިތުވި އަހަރު ފާހަގަކުރެވުނު ދިވެހިންގެ އެއްބައިވަންތަކަމުގެ ދުވަހުގެ ރަސްމީ ޖަލްސާގައި ވެސް އެމް.އެން.ޔޫ.އެސް.ޔޫގެ މެންބަރުން ވަނީ ބައިވެރިވެފައެވެ.
ލިޔުނީ: މުޙައްމަދު އަޙްނަފް،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
