އެމް.އެން.ޔޫގެ ކޯސްތަކާބެހޭ މައުލޫމާތު ދިނުމުގެ ޕްރޮގްރާމްތަކުގައި އެމް.އެން.ޔޫ.އެސް.ޔޫގެ މެންބަރުންގެ ބައިވެރިވުން

ދިވެހިރާއްޖޭގެ ޤައުމީ ޔުނިވަރސިޓީގެ ފެބުރުވަރީ އިންޓޭކާ ދިމާކޮށް އެ ޔުނިވަރސިޓީގެ ކޯސްތަކާ ގުޅޭ މައުލޫމާތު ދިނުމުގެ ޕްރޮގްރާމްތަކުގައި އެމް.އެން.ޔޫ.އެސް.ޔޫގެ މެންބަރުން ބައިވެރިވެއްޖެއެވެ.

މިގޮތުން، 2020 ޖަނަވަރީ 25ވީ ހޮނިހިރުދުވަހުގެ ހެނދުނު 10.00ގައި ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީ.އެޗް.އެސް.އީ) ގައި ކިޔަވަމުންދާ ދަރިވަރުންނަށް އަމާޒުކޮށް ބޭއްވުނު ޚާއްޞަ ހަރަކާތުގައި އެމް.އެން.ޔޫ.އެސް.ޔޫގެ ހިންގާކޮމިޓީގެ ބައެއް މެންބަރުންނާއި ގޮފިތަކުގެ ބައެއް މެންބަރުންގެ އިތުރުން ލީޑަރސް ގްރޫޕްގެ ބައެއް މެންބަރުންވަނީ ބައިވެރިވެފައެވެ. އަދި މި ޙަރަކާތުގައި މި މެންބަރުންވަނީ އެމް.އެން.ޔޫގެ ކޯސްތަކާއި އެމް.އެން.ޔޫ.އެސް.ޔޫގެ ޙަރަކާތްތަކާގުޅޭ މައުލޫމާތު ހިއްސާކޮށްފައެވެ.

ހަމަ އެދުވަހުގެ ހަވީރު ޤައުމީ ޔުނިވަރސިޓީގެ ސެންޓްރަލް އެޑްމިނިސްޓްރޭޝަން ހިންގަމުންދާ ކެމްޕަހުގައި ”ވަން ސްޓޮޕް އެޑްމިޝަން“ގެ ނަމުގައި ކޯސްތަކަށް ވަނުމުގެ ފުރުޞަތު ހުޅުވާލައިގެން ކުރިއަށް ގެންދެވުނު ޙަރަކާތުގައިވެސް އެމް.އެން.ޔޫ.އެސް.ޔޫގެ ހީވާގި މެންބަރުން ބައިވެރިވިކަން ފާހަގަކޮށްލެވެއެވެ. މި ޙަރަކާތް އެދުވަހުގެ ހަވީރު 04.00ން 06.00 އަދި ރޭގަނޑު 08.00ން 10.00ށް ވަނީ ކުރިއަށް ގެންދެވިފައެވެ.

މީގެ އިތުރުން ޤައުމީ ޔުނިވަރސިޓީގެ ކޯސްތަކާބެހޭ މަޢުލޫމާތު ދިނުމަށް އަތޮޅުތެރެއަށް ކުރެވެމުންދާ ސިލްސިލާ ދަތުރުތަކުގެ ތެރެއިން ޅަވިޔަނި އަތޮޅަށް ކުރެވުނު ދަތުރުގައި އެމް.އެން.ޔޫ.އެސް.ޔޫގެ ޚަޒާންދާރު ޙުސައިން ޒައިދު އަދި ލީޑަރސް ގްރޫޕް މެންބަރ މާރިޔަތު އުނޫޝާ ވަނީ ބައިވެރިވެފައިކަން ވެސް ފާހަގަކޮށްލެވެއެވެ. މި ދަތުރުގައި 2020 ޖަނަވަރީ 28 ވަނަ ދުވަހުގެ މެންދުރު އަދި ހަވީރުގެ ވަގުތުތަކުގައި ޅ. ހިންނަވަރުގައި މި ޙަރަކާތް ކުރިއަށް ގެންދެވުނުއިރު، 28 ވަނަ ދުވަހުގެ ރޭގަނޑު އަދި 29 ވަނަ ދުވަހުގެ ހެނދުނުގެ ވަގުތުތަކުގައި މި ޙަރަކާތް ކުރިއަށް ގެންދެވުނީ ޅ. ނައިފަރުގައެވެ. މި ދަތުރުގައި އެމް.އެން.ޔޫ.އެސް.ޔޫ ތަމްސީލުކޮށް ބައިވެރިވި 2 މެންބަރުން ވަނީ ޙަރަކާތް ކުރިއަށް ގެންދިއުމުގައި އިސް ދައުރެއް އަދާކޮށްފައެވެ.

އެމް.އެން.ޔޫގެ މިފަދަ ޙަރަކާތްތަކުގައި ބައިވެރިވުމުގެ ފުރުޞަތުދެއްވާކަމަށްޓަކައި އެމް.އެން.ޔޫގެ މެނޭޖްމަންޓަށް ވަރަށް ޚާއްޞަ ޝުކުރެއް އަދާކުރަމެވެ.

ލިޔުނީ: މައިސަރާ ޢަބްދުއްސައްތާރު،
އެސިސްޓެންޓް ސެކްރެޓަރީ، އެމް.އެން.ޔޫ.އެސް.ޔޫ