ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުން އިންތިޒާމުކޮށްގެން ސިލްސިލާގޮތެއްގައި ބާއްވަމުންދާ ”ނިއު ލީޑަރސް ނައިޓް“ ގެ 6 ވަނަ ޙަރަކާތް ބާއްވައިފިއެވެ. މިދިޔަ އަހަރު ވަނީ މީގެ 2 ހަރަކާތެއް ބާއްވާފައެވެ.
އެމް.އެން.ޔޫ.އެސް.ޔޫގެ ”ނިއު ލީޑަރސް ނައިޓް“ ބާއްވާފައިވަނީ 2020 ވަނަ އަހަރުގެ ފެބުރުވަރީ 14 ވީ ހުކުރު ދުވަހުގެ ރޭ އެމް.އެން.ޔޫގެ އެފް.އީ ޕީ.އީ ހޯލްގައެވެ. މި ޙަރަކާތުގައި އެމް.އެން.ޔޫ.އެސް.ޔޫއަށް އަލަށް ގުޅުނު 140ށް ވުރެ ގިނަ ދަރިވަރުން ވަނީ ބައިވެރިވެފައެވެ. އަދި އެމް.އެން.ޔޫ.އެސް.ޔޫގެ ހިންގާ ކޮމިޓީގެ 7 މެންބަރުން (ރައީސް ޢަލީ ޝަމޫން، ނައިބު ރައީސް – ޢިލްމީ އަރުޝަމް މުޙައްމަދު، ނައިބު ރައީސް – އަމަލީ ޙުސައިން ޢަލީ، ޚަޒާންދާރު ޙުސައިން ޒައިދް، ސެކްރެޓަރީ އާމިނަތު ހަމީޒާ އަޙްމަދު، އެސިސްޓެންޓް ސެކްރެޓަރީ މައިސަރާ އަބްދުއްސައްތާރު، މީޑިއާ ކޯޑިނޭޓަރ މުޙައްމަދު އަޙްނަފް)ގެ އިތުރުން ލީޑާސް ގުރޫޕްގައި ހަރަކާތްތެރިވާ ދަރިވަރުން ވަނީ ބައިވެރިވެފައެވެ.
މި ޙަރަކާތް ހުށަހަޅައިދެއްވާފައިވަނީ އެމް.އެން.ޔޫ.އެސް.ޔޫގެ 6 ވަނަ ދައުރުގެ ރައީސް އަރުޝަދު އަޝްރަފެވެ. ހަމައެއާއެކު، އެމް.އެން.ޔޫ.އެސް.ޔޫގެ ހިންގާ ކޮމިޓީގެ ބައެއް މެންބަރުން ވަނީ ނިއު ލީޑަރުންނާ މުހާތަބުކޮށް ވާހަކަ ދައަކަވާފައެވެ. މިގޮތުން، ނިއު ލީޑަރސްއަށް އަމާޒުކޮށްގެން ކުރިއަށް ގެންދެވުނު ތަފާތު ކުޅިވަރުތަކާއި، މުނިފޫހިފިލުވުމުގެ އެކިއެކި ހަރަކާތްތައް ވަނީ ކުރިއަށްގޮސްފައެވެ. އަދި ގުރުއަތުން ހޮވާލެވުނު ދަރިވަރުންނަށް ވަނީ އެކިއެކި ފަރާތްތަކުން ދެއްވާފައިވާ ހަދިޔާއާއި ވައުޗާ ދެވިފައެވެ.
“ނިއު ލީޑަރސް ނައިޓް” އަކީ އެމް.އެން.ޔޫގެ އިންޓޭކްތަކާ ދިމާކޮށް، އެމް.އެން.ޔޫއަށް އަލަށް ގުޅޭ ދަރިވަރުންގެ ތެރެއިން، އެމް.އެން.ޔޫ.އެސް.ޔޫގެ ޙަރަކާތްތަކުގައި އަމަލީގޮތުން އުޅެން ބޭނުންވާ ދަރިވަރުންނަށް އަމާޒުކޮށް ބާއްވާ ތަޢާރަފުގެ ޙަރަކާތެކެވެ.
އެމް.އެން.ޔޫ.އެސް.ޔޫ ލީޑާރސް ގްރޫޕަކީ އެމް.އެން.ޔޫ.އެސް.ޔޫގެ ޙަރަކާތްތަކުގައި އުޅުމަށް އިސްވެ އުޅުމަށް ޝަޢުޤުވެރިވާ ދަރިވަރުންނަށް އަމާޒުކޮށް 2018ވަނަ އަހަރު ހަދާފައިވާ ގްރޫޕެކެވެ. މި ގްރޫޕަށް ވަނުމަށް އެމް.އެން.ޔޫގެ ކޮންމެ ދަރިވަރަކަށްވެސް ފުރުޞަތު އޮތްއިރު، ހަމަ އެކަނި ކޮށްލަންޖެހޭނެ ކަމަކީ އެމް.އެން.ޔޫ.އެސް.ޔޫގެ އޮފީހަށް ދުރުވެ، ނަންނޯޓުކޮށްލުމާއެކު ފޯމެއް ފުރާލުމެވެ.
ލިޔުނީ: މުޙައްމަދު އަޙްނަފް
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
