ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ 2020 ވަނަ އަހަރުގެ މާލޭ ކެމްޕަހުގެ ގޮފިތަކުގެ ހިންގާ ކޮމެޓީ ޖަމިއްޔާތަކުގެ ރަޖިސްޓްރާ އިފްތިތާހުކޮށްދެއްވައިފިއެވެ.
ގޮފިތައް އިފްތިތާޙުކުރުމަށް ބޭއްވުނު ރަސްމިއްޔާތު ބޭއްވުނީ 22 ފެބުރުވަރީ 2020ވީ ހޮނިހިރުދުވަހުގެރޭ 20:30ގައި ސެންޓްރަލް އެޑްމިނިސްޓްރޭޝަން (ސީ.އޭ) އޮޑިޓޯރިއަމްގައެވެ.
ރަސްމިއްޔާތު ޝަރަފުވެރިކޮށްދެއްވާފައި ވަނީ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓްގެ ސީނިއާ ޕޮލިސީ ޑިރެކްޓަރ އަދި ޖަމިއްޔާތަކުގެ ރެޖިސްޓްރާރ އަލްފާޟިލް އަޙްމަދު އިރާޝެވެ. އަދި މީގެ އިތުރުން ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ ޑރ. މުޙައްމަދު ޝަރީފާއި އެމް.ޓީ.ސީ.ސީގެ ޗީފް އޮޕަރޭޓިންގ އޮފިސަރ އަލްފާޟިލް ޝާހިދު ޙުސައިން މޫސާ ބައިވެރިވެވަޑައިގެންނެވިއެވެ.
މި ރަސްމިއްޔާތު ފެށިގެން ގޮސްފައިވަނީ ކިރިތި ޤުރުއާނުގެ ބަރަކާތުންނެވެ. ޤުރުއާން ކިޔެވީ ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީގެ ދަރިވަރު އަލީ މުޝްފިޤް މުޙައްމަދު ޝަރީފެވެ. އަދި ޙަފްލާ ކުރިއަށް ދާނެ ގޮތުގެ ތަޢާރަފުކޮށްދީފައިވަނީ ސެންޓަރ ފޯ ފައުންޑޭޝަން ސްޓަޑީޒްގެ ދަރިވަރު ހައްވާ ލައިލާ ލުޠުފީއެވެ.
މި ރަސްމިއްޔާތުގައި ގޮފިތަކުގެ މީޑިއާ ކޯޑިނޭޓަރުންނަށް މަޤާމް ހަވާލުކޮށްދެއްވާފައިވަނީ އެމް.އެން.ޔޫގެ ޑެޕިއުޓީ ވައިސް ޗާންސެލަރ އަލްފާޟިލާ ޢާއިޝަތު ޝާހީން އިސްމާޢީލެވެ. ސެކްރެޓަރީންނަށް މަޤާމު ޙަވާލުކޮށްދެއްވީ މިނިސްޓްރީ އޮފް ހޯމް އެފެއާޒްގެ ޑެޕިއުޓީ ޑިރެކްޓަރ އަލްފާޟިލް ޢައްބާސް މުޙައްމަދު ކަމަށްވާއިރު، ޚަޒާންދާރުގެ މަޤާމަށް ހޮވުނު މެންބަރުންނަށް މަޤާމު ޙަވާލުކޮށްދެއްވީ އެމް.އެން.ޔޫގެ ޑެޕިއުޓީ ވައިސް ޗާންސެލަރ އަލްފާޟިލް ޙުސައިން ޙަލީމެވެ. މީގެ އިތުރުން ނައިބު ރައީސް/ރައީސާ (އަމަލީ)ގެ މަޤާމަށް ހޮވުނު މެންބަރުންނަށް އެމް.ޓީ.ސީ.ސީގެ ޗީފް އޮޕަރޭޓިންގ އޮފިސަރ އަލްފާޟިލް ޝާހިދު ޙުސައިން މޫސާ މަޤާމް ޙަވާލުކޮށްދެވިއިރު، ނައިބު ރައީސް/ރައީސާ (ޢިލްމީ)ގެ މަޤާމަށް ހޮވުނު މެންބަރުންނަށް މަޤާމު ޙަވާލުކޮށްދެއްވީ އެމް.އެމް.ޔޫގެ ވައިސް ޗާންސެލަރ ޑރ. މުޙައްމަދު ޝަރީފެވެ. އަދި ގޮފިތަކުގެ ރައީސުން/ރައީސާއިންނަށް މަޤާމު ޙަވާލުކޮށްދެއްވީ ރަސްމިއްޔާތުގެ ޝަރަފްވެރި މެޙްމާން، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގެ ސީނިއާ ޕޮލިސީ ޑިރެކްޓަރ އަދި ޖަމިއްޔާތަކުގެ ރެޖިސްޓްރާރ އަލްފާޟިލް އަޙްމަދު އިރާޝެވެ.
މި ރަސްމިއްޔާތުގައި ދަރިވަރުންގެ ޔޫނިއަންގެ ނައިބު ރައީސް (ގޮފިތައް) ޢަބްދުﷲ ޝަހުނީޒް ވާހަކަފުޅު
ދައްކަވާފައިވާއިރު، އެބޭފުޅާގެ ވާހަކައިގައި، އެމް.އެން.ޔޫ.އެސް.ޔޫ އިން ހިންގާ ހަރަކާތްތަކުގެ އަދަދު އިތުރުކުރުމުގެ ބަދަލުގައި ބޭނުންވަނީ ހިންގޭ ހަރަކާތްތަކުގެ ފެންވަރު ރަނގަޅުކޮށް ގިނަ އިސްވާރުން ހަރަކާތްތަކުގައި ބައިވެރިކުރުވުން ކަމަށް ފާހަގަކޮށްފައިވެއެވެ.
ދަރިވަރުންގެ ޔޫނިއަންގެ ރައީސް މި ރަސްމިއްޔާތުގައިި ވާހަކަފުޅު ދައްކަވާފައިވާއިރު، އެބޭފުޅާގެ ވާހަކާގައި، ގޮފިތަކުގެ ހިންގާ ކޮމިޓީއަށް އިންތިޚާބުނުވުމަކީ ދަރުމަވެރި މަސައްކަތް ކުރުމަށް އޮތް ހުރަހެއް ނޫން ކަމުގައި ފާހަގަކުރެއްވިއެވެ. އަދި ދަރުމަވެރި މަސައްކަތް ކުރުމުގެ ދޮރު އަބަދުވެސް ހުންނާނީ ހުޅުވިފައިކަން ފާހަގަ ކުރެއްވިއެވެ.
އެމް.އެން.ޔޫ.އެސް.ޔޫގެ ފަރާތުން ދެވޭ 2ވަނަ އަށް އެންމެ މަތީ ޝަރަފް، ”މަރުހޫމް އަޙްމަދު ޢަބްދުﷲ ނަސީރުގެ ހަނދާނުގައި ދެވޭ އެމް.އެން.ޔޫ.އެސް.ޔޫގެ ޝަރަފްވެރިކަމުގެ އިނާމު“ ވަނީ މިރަސްމިއްޔާތުގައި 1 ބޭފުޅަކަށް އަރުވާފައެވެ. ހަމަ އެހެންމެ، އެމް.އެން.ޔޫ.އެސް.ޔޫއިން އިންތިޒާމުކޮށްގެން ސިލްސިލާގޮތެއްގައި ކުރިއަށް ގެންދާ ފުޓްސަލް ފިއެސްޓާއާއި ދަރިވަރުންގެ ޔޫނިއަންގެ ލީޑަރސް ގްރޫޕާ ބެހޭގޮތުން ވީޑިއޯ ރިޕޯޓެއް ވަނީ ދައްކާފައެވެ.
މި ރަސްމިއްޔާތުގައި އެމް.އެން.ޔޫގެ ވައިސް ޗާންސެލަރ ޑރ. މުޙައްމަދު ޝަރީފް ވިދާޅުވީ އެމް.އެން.ޔޫ.އެސް.ޔޫގެ މަސައްކަތް ދަރިވަރުން ވަނީ ބަލައިގަނެފައި ކަމަށާއި ދަރިވަރުންގެ ޔޫނިއަންއަކީ އެމް.އެން.ޔޫގެ ކުރިއެރުމަށް މުހިންމު ޖަމިއްޔާއެއް ކަމަށެވެ.
އެމް.އެން.ޔޫ.އެސް.ޔޫގެ ކުރީގެ ރައީސް އަދި މިހާރުގެ އެޑްވައިޒަރީ ބޯޑު މެންބަރ އަރުޝަދު އަޝްރަފް ވިދާޅުވީ މި މަސައްކަތް އެންމެ ފުރަތަމަ ފެށިއިރު ގިނަ ގޮންޖެހުންތަކެއް ކުރިމަތިވި ކަމަށާއި އެންމެ ބޮޑު ގޮންޖެހުމަކަށް ކުރިމަތިވި ގޮންޖެހުމަކީ ޒުވާން ކުދިންތަކެއް ގޮވައިގެން ނުކުންނަން ޖެހުން ކަމަށެވެ. ނަމަވެސް މިއަދު ޔޫނިއަންގެ ހުރިހާ ހަރަކާތެއް ހިންގުމުގައި އެންމެ ބޮޑު އެހީއެއް ލިބެމުން އަންނަނީ 17 އަހަރާއި 21 އަހަރާއި ދެމެދުގެ ޒުވާން ކުދިންގެ ފަރާތުން ކަމަށް އަރުޝަދު ވިދާޅުވިއެވެ.
ރަސްމިއްޔާތުގެ އެންމެ ފަހު ނަމްބަރެއްގެ ގޮތުން، ރަސްމިޔާތުގެ ޝަރަފްވެރި މެެހެމާނު މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގެ ސީނިއާ ޕޮލިސީ ޑިރެކްޓަރ އަދި ޖަމިއްޔާތަކުގެ ރެޖިސްޓްރާރ އަލްފާޟިލް އަޙްމަދު އިރާޝް ވާހަކަފުޅު ދައްކަވާފައިވާއިރު، އެބޭފުޅާގެ ވާހަކާގައި އެމް.އެން.ޔޫ.އެސް.ޔޫ އަކީ މިހާރު ރާއްޖޭގައި އޮތް އެންމެ މެންބަރުން ގިނަ ޖަމިއްޔާ ކަމަށާއި މި ޖަމިއްޔާއަކީ ޔޫތް މިނިސްޓްރީއާއި ވަރަށް ގާތް ގުޅުމެއް ބާއްވާ ޖަމިއްޔާއެއް ކަމަށް ވިދާޅުވިއެވެ. އަދި އެމް.އެން.ޔޫ.އެސް.ޔޫ އަކީ ހުރިހާ ޖަމިއްޔާއަކަށް ނަމޫނާ ޖަމިއްޔާއެއް ކަމަށް ވިދާޅުވެފައިވެއެވެ.
މި ރަސްމިއްޔާތުގައި މާލޭ ކެމްޕަސްތަކުގެ 10 ގޮފީގެ 60 ދަރިވަރުންނަށް ވަނީ މަޤާމު ހަވާލުކުރެވިފައެވެ.
ލިޔުނީ: މުޙައްމަދު އަޙްނަފް
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
