ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ 2 ވަނަ އަށް އެންމެ މަތީ ޝަރަފުކަމަށްވާ ” މަރުހޫމް އަޙްމަދު ޢަބްދުﷲ ނަޞީރުގެ ހަނދާނުގައި ދެވޭ ދަރިވަރުންގެ ޔޫނިއަންގެ ޝަރަފްވެރިކަމުގެ އިނާމު” އެމް.އެން.ޔޫ.އެސް.ޔޫ ތަރަހަ ގޮފީގެ ކުރީގެ ރައީސް ޢަބްދުﷲ ޢަޠޫފް އާތިފަށް ދީފިއެވެ.
ދަރިވަރުންގެ ޔޫނިއަންގެ 2 ވަނަ އަށް އެންމެ މަތީ ޝަރަފް ދެވިފައިވަނީ އެމް.އެން.ޔޫ.އެސް.ޔޫގެ މާލޭ ކެމްޕަހުގެ ގޮފިތަކުގެ ހިންގާ ކޮމިޓީ އިފްތިތާހުކުރުމަށް 22 ފެބުރުވަރީ 2020ވީ ހޮނިހިރުދުވަހުގެރޭ ސެންޓްރަލް އެޑްމިނިސްޓްރޭޝަން (ސީ.އޭ) އޮޑިޓޯރިއަމްގައި ބޭއްވުނު ރަސްމިއްޔާތުގައެވެ. މި އިނާމް ހަވާލުކޮށްދެއްވީ އެމް.އެން.ޔޫގެ ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދެވެ.
ޢަބްދުﷲ ޢަޠޫފް އާތިފަކީ މީގެ ދެތިން އަހަރު ކުރިން ފެށިގެން އެމް.އެން.ޔޫ.އެސް.ޔޫގެ ގިނަ ހަރަކާތްތަކުގައި ޢަމަލީ ގޮތުން ބައިވެރިވެ، ދަރިވަރުންގެ ޔޫނިއަންއަށް އަގުހުރި ޚިދުމަތްތަކެއް ކޮށްދެއްވާފައިވާ އަދި ކުރައްވަމުން ގެންދަވާ ބޭފުޅެކެވެ. ހަމައެއާއެކު، ދަރިވަރުންގެ ޔޫނިއަންގެ ތަރަހަ ގޮތްޕައްވެސް އެތަކެއް ޚިދުމަތްތަކެއް މިހާރުވެސް ކޮށްދެއްވަމުން ގެންދަވާ ލާމަސީލު ލީޑަރެކެވެ.
މި އިނާމަކީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންއަށް ތަފާތު އެކި ރޮނގުން ގިނަ ޚިދުމަތްތަކެއް ކުރައްވާފައިވާ ފަރާތްތަކަށް އެކަމުގެ އަގުވަޒަންކޮށް އެރުވޭ ޝަރަފުގެ އިނާމެކެވެ. މި އިނާމު މީގެ ކުރިން ވަނީ ޖުމްލަ 32 ބޭފުޅަކު ޙާސިލްކުރައްވާފައެވެ.
ލިޔުނީ: މުޙައްމަދު އަޙްނަފް
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
