ޔޫތު ލީޑަރސް ނެޓްވޯކް (ވައި.އެލް.އެން)ގެ ފަރާތުން 2020 ވަނަ އަހަރު ބާއްވާ ފުރަތަމަ ޒުވާނުންގެ ފޯރަމް ނ. ވެލިދޫގައި ފެށިގެން ކުރިއަށް އެބަދެއެވެ.
”ހަރުދަނާ ޒުވާނުން – މުޖުތަމަޢުގެ ކުރިއެރުން“ މި ޝިޢާރުގެ ދަށުން 27 ފެބުރުވަރީން 01 މާރޗަށް ކުރިއަށް ގެންދިއުމަށް ހަމަޖެހިފައިވާ މި ފޯރަމަކީ ވެލިދޫގެ އިތުރުން ނ. އަތޮޅުގެ އެހެން ހުރިހާ ރަށެއްގެ ޒުވާނުންނަށް ވެސް އަމާޒުކޮށްގެން ކުރިއަށްގެންދެވޭ ފޯރަމެކެވެ.
ވައި.އެލް.އެންގެ އެހެނިހެން ފޯރަމްތަކެކޭވެސް އެއްފަދައިން މި ފޯރަމްގައިވެސް ތަފާތު އެކި މުއައްސަސާތަކުން ސެޝަންތައް ނަގައިދިނުމަށް ހަމަޖެހިފައިވާކަން ފާހަގަކޮށްލެވެއެވެ. ފޯރަމް ފެށިގެންދިޔައީ މޯލްޑިވްސް ޕޮލިސް ސަރވިސްގެ ސެޝަނުންނެވެ. މި ސެޝަން ކުރިއަށްދިޔައީ ބުރާސްފަތިދުވަހުގެ މެންދުރު 02.00ން ފެށިގެން ހަވީރު 06.00ގެ ނިޔަލަށެވެ. ބުރާސްފަތިދުވަހުގެރޭ ފޯރަމްގެ ހުޅުވުމުގެ ރަސްމިއްޔާތު ބޭއްވިގެންދިޔައިރު މި ރަސްމިއްޔާތު ޝަރަފުވެރިކޮށްދެއްވާފައިވަނީ މިނިސްޓްރީ އޮފް ސްޓޭޓް ފޯ ހޯމް އެފެއާޒް އަލްފާޟިލް މުޙައްމަދު މާހިރު ޢީސާއެވެ. މި ރަސްމިއްޔާތަށްފަހު ކުރިއަށްދިޔައީ ޔޫތު ލީޑަރސް ނެޓްވޯކްގެ ސެޝަން އެވެ. ހުކުރުދުވަހުގެ ފުރަތަމަ ސެޝަން އޮތީ މެންދުރުފަހު 02.00ގައެވެ. މި ސެޝަން ނަންގަވައިދިނީ ނޭޝަނަލް ޑްރަގް އޭޖެންސީގެ ފަރާތުންނެވެ. ހުކުރުދުވަހުގެރޭ ފޯރަމްގެ ބައިވެރިންނާއި އޮފިޝަލުންނަށް ވެލިދޫ ޒުވާނުންގެ ފަރާތުން ބާބެކިއުއެއް ދެއްވާފައިވެއެވެ. ފޯރަމްގެ 4 ވަނަ ސެޝަން އޮންނާނީ ހޮނިހިރުދުވަހުގެ ހެނދުނު 08.45ގައެވެ. މި ސެޝަން ނަންގަވައި ދެއްވާނީ މިނިސްޓްރީ އޮފް އާރޓްސް، ކަލްޗަރ އެންޑް ނޭޝަނަލް ހެރިޓޭޖްގެ ފަރާތުންނެވެ. 5 ވަނަ ސެޝަން ފެށުމަށް ހަމަޖެހިފައިވަނީ 10.15ގައި ކަމަށްވާއިރު މި ސެޝަން ނަންގަވައިދެއްވާނީ މިނިސްޓްރީ އޮފް ހޯމް އެފެއާޒްގެ ލީގަލް ސެކްޝަންގެ ފަރާތުންނެވެ. ފޯރަމްގެ 6 ވަނަ ސެޝަން ހޮނިހިރުދުވަހުގެ މެންދުރުފަހު 12.45ށް ތާވަލުކުރެވިފައިވާއިރު މި ސެޝަން ނަންގަވައިދެއްވާނީ ޖުވެނައިލް ޖަސްޓިސް ޔުނިޓް (ޖޭ.ޖޭ.ޔޫ)ގެ ފަރާތުންނެވެ. ހޮނިހިރުދުވަހުގެ ހަވީރު އިޖްތިމާޢީ ޙަރަކާތެއް ބޭއްވުމަށް ރޭވިފައިވާއިރު، ފޯރަމްގެ ނިންމުމުގެ ރަސްމިއްޔާތު އޮންނާނީ ހޮނިހިރުދުވަހުގެ ރެޔެވެ. މި ރަސްމިއްޔާތުގައި ފޯރަމްގެ ހުރިހާ ބައިވެރިންނަށް ފޯރަމް ނިންމިކަމުގެ ލިޔުން ޙަވާލުކުރެވޭނެކަމަށް ވައި.އެލް.އެން އިން ”އެމް.އެން.ޔޫ.އެސް.ޔޫ މީޑިއާ“އަށް މަޢުލޫމާތު ދެއްވިއެވެ.
2018 ވަނަ އަހަރުން ފެށިގެން ވައި.އެލް.އެންގެ ކޮންމެ ފޯރަމެއްގައިވެސް އެމް.އެން.ޔޫ ދަރިވަރުންގެ ޔޫނިއަންގެ މެންބަރުން އޮފިޝަލުންގެ ގޮތުގައި ބައިވެރިވުމުގެ ފުރުޞަތުދަނީ ދެމުންނެވެ. މިގޮތުން ވެލިދޫ ފޯރަމްގައިވެސް އެމް.އެން.ޔޫ.އެސް.ޔޫގެ ޖުމްލަ 6 މެންބަރެއް ފޯރަމް އޮފިޝަލުންގެ ގޮތުގައި ބައިވެރިވުމަށްވަނީ ވެލިދުއަށް ދަތުރުކޮށްފައެވެ.
މި 6 މެންބަރުންގެ ޓީމުގައި ހިމެނެނީ:
- އާމިނަތު ހަމީޒާ އަޙްމަދު – އެމް.އެން.ޔޫ.އެސް.ޔޫގެ ސެކްރެޓަރީ
- 02. ޙައްވާ ޝިޢުރާ ޙުސައިން – ސޮސައިޓީ ފޯ ހޮސްޕިޓާލިޓީ އެންޑް ޓުއަރިޒަމް ސްޓަޑީޒްގެ ނާއިބު ރައީސް (ޢިލްމީ)
- 03. އީފާ އިބްރާހީމް – ބިޒްނަސް ސްކޫލް ސްޓޫޑެންޓްސް އެސޯސިއޭޝަންގެ ސެކްރެޓަރީ
- 04. ޒާޔާ ޙަސަން ޢިމްރާން – އެމް.އެން.ޔޫ.އެސް.ޔޫ ލީޑަރ
- 05. ދަޔާނާ ޙަސަން – އެމް.އެން.ޔޫ.އެސް.ޔޫ ލީޑަރ
- 06. ފާޠިމަތު މިހުދާ މުޙައްމަދު – އެމް.އެން.ޔޫ.އެސް.ޔޫ ލީޑަރ
މިއަހަރުގެ ފުރަތަމަ ފޯރަމް ނ. ވެލިދޫގައި ކުރިއަށްދާއިރު، އެންމެ ފަހުން މިފަދަ ފޯރަމެއް ބާއްވާފައިވަނީ އއ. އަތޮޅުގެ ޒުވާނުންނަށް އަމާޒުކޮށް އއ. މަތިވެރީގައެވެ.
މިނިސްޓްރީ އޮފް ހޯމް އެފެއާޒްގެ ސިވިކް އެޑިއުކޭޝަން ޔުނިޓްގެ ސީދާ ބެލުމުގެ ދަށުން ހިނގަމުންދާ ޔޫތު ލީޑަރސް ނެޓްވޯކަކީ މިނިސްޓްރީ އޮފް ހޯމް އެފެއާޒްއާ ހަވާލުކޮށްފައިވާ ޒިންމާދާރު ޒުވާން ލީޑަރުން ބިނާކުރުމުގެ މަސްޢޫލިއްޔަތު އަދާކުރުމަށް އެހީތެރިވުމަށް އުފައްދާފައިވާ ޖަމިއްޔާއެކެވެ. މި ޖަމިއްޔާ އެކުލެވިފައިވަނީ ދިވެހިރާއްޖޭގެ މަތީ ތަޢުލީމު ފޯރުވައިދޭ ބޮޑެތި މުއައްސަސާތަކުގައި ކިޔަވާ ދަރިވަރުން ތަމްސީލުކުރާ ދަރިވަރުންތަކެއްގެ މައްޗަށެވެ. މިގޮތުން ދިވެހިރާއްޖޭގެ ޤައުމީ ޔުނިވަރސިޓީ ތަމްސީލުކުރާ 5 މެންބަރެއް މި ނެޓްވޯކުގައި ހިމެނޭއިރު، ޖަމިއްޔާގެ ރައީސާއަކީވެސް ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރެކެވެ.
ވައި.އެލް.އެންގައި ހިމެނޭ އެމް.އެން.ޔޫ ތަމްސީލުކުރާ ދަރިވަރުން:
- ސަނާ ޝަފީޤު – ރައީސާ
- 02. އަނާ އަޙްމަދު – އެމް.އެން.ޔޫ.އެސް.ޔޫގެ ކުރީގެ ސެކްރެޓަރީ
- 03. އާމިނަތު ރައުދާ މުޙައްމަދު – އެމް.އެން.ޔޫ.އެސް.ޔޫގެ ކުރީގެ އެސިސްޓެންޓް ސެކްރެޓަރީ
- 04. މަރިޔަމް ޙުވައިނާ ޙަސަން – އިންޖިނިއަރިންގ، ސައިންސް އެންޑް ޓެކްނޮލޮޖީ އެސޯސިއޭޝަންގެ ރައީސާ
- 05. މުޙައްމަދު ޝާބިން އިލްހާމް ރަޝީދު – ސްޓޫޑެންޓްސް އިނީޝިއޭޓިވް އޮފް އާރޓްސްގެ ރައީސް
ވައި.އެލް.އެން އިން އިންތިޒާމުކޮށްގެން ބާއްވާ މިފަދަ ޒުވާނުންގެ ފޯރަމްތަކުގެ ބޭނުމަކީ ދިވެހި ޒުވާނުންނަކީ ޒިންމާދާރު އަދި ހަރުދަނާ ބަޔަކަށްހަދާ، ދިވެހި ޤައުމު ބިނާކުރުމުގައި ޒުވާނުންގެ ޙިއްޞާ އިތުރުކުރުމެވެ. އަދި ޒުވާނުންނަކީ ޒިންމާދާރު ވަޒީފާތަކުގައި އުޅޭ ބަޔަކަށްހަދާ، ދިވެހި ޒުވާނުންގެ މުސްތަޤްބަލު އުޖާލާކުރުމަށް އެހީތެރިވެދިނުމެވެ.
ލިޔުނީ: މުޙައްމަދު ޝާން ޢާމިރު،
އެމް.އެން.ޔޫ.އެސް.ޔޫ މީޑިއާ
