ދިވެހި ރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުން އިމްތިޒާމުކޮށްގެން ބާއްވާ 5ވަނަ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް 2020″ މާރިޗު 01ވީ އާދީއްތަ ދުވަހުގެރޭ ފަށައިފިއެވެ“.
މި މުބާރާތުގެ ފެށުމުގެ ރަސްމިއްޔާތު ކުރިޔަށް ދިޔައީ މުބާރާތް ބާއްވަން ހަމަޖެހިފައިވާ އެމް.އެން.ޔޫ ޕީ.އީ ހޯލުގައެވެ. މުބާރާތުގެ ފެށުމުގެ ރަސްމިއްޔާތު ޝަރަފުވެރި ކޮށްދެއްވީ ދިވެހި ރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ ޑރ. މުހައްމަދު ޝަރީފެވެ. މި ރަސްމިއްޔާތުގައި ވައިސް ޗާންސެލަރގެ އިތުރުން ފިއުލް އެކްސްޕްރެސް މޯލްޑިވްސްގެ މެނޭޖިންގ ޑިރެކްޓެ އަލްފާޟިލް މުޙައްމަދު ޝިހާބާއި، ޑެޕިއުޓީ ވައިސް ޗާންސެލަރ އަލްފާޟިލާ އައިޝަތު ޝާހީން އިސްމާލްއާއި، ޑީން އޮފް ސްޓޫޑެންޓްސް އަލްފާޟިލާ ނާދިޔާ އަހުމަދާއި، ފެކަލްޓީތަކުގެ ޑީނުންނާއި އެމް.އެން.ޔޫ.އެސް.ޔޫގެ ހިންގާ ކޮމެޓީގެ މެންބަރުންނާއި އެމް.އެން.ޔޫ.އެސް.ޔޫ އެޑްވައިޒަރީ ބޯޑު މެންބަރުން ބައިވެރިވެވަޑައިގެންނެވިއެވެ.
މި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން އެމް.އެން.ޔޫގެ ވައިސް ޗާންސެލަރ ޑރ. މުޙައްމަދު ޝަރީފް ވަނީ ބައިވެރިވި ހުރިހާ ޓީމުތަކަށް މަރުހަބާ ދަންނަވާ އެޓީމުތަކަށް ކާމިޔާބީއަށް އެދިވަޑައިގެންފައެވެ. މީގެ އިތުރުން ވައިސް ޗާންސެލަރވަނީ، ކިޔެވުމާއި އިތުރު ހަރަކާތްތަކާއި ގުޅޭގޮތުން ވާހަކަފުޅު ދައްކަވާފައެވެ. އިތުރަށް ވާހަކަފުޅު ދައްކަވަމުން ވައިސް ޗާންސެލަރ ވަނީ، އިތުރު ހަރަކާތްތަކުގައި ބައިވެރިވިނަމަވެސް ކިޔެވުމަށް ދޭންޖެހޭ އަހައްމިއްޔަތު ކުޑަ ނުކުކުރުމަށް ދަރިވަރުންނަށް ގޮވާލާ ނަޞޭހަތްތެރިވެޑައިގެންފައެވެ. ހަމަ އެއާއެކު، މިދުވަސްވަރަކީ ތަފާތު ބަލިތައް ފެތުރެމުންދާ ދުވަސްވަރެއްކަމުން ހުރިހާ ދަރިވަރުންވެސް ސާފްޠާހިރުކަމަށް ސަމާލުކަން ދިނުމަށް ވައިސް ޗާންސެލަރ އިލްތިމާސް ކުރެއްވިއެވެ.
މުބާރާތުގެ ހުޅުވުމުގެ ރަސްމިއްޔާތައް ފަހު ޖުމްލަ 3 މެޗެއް އާދިއްތަދުވަހުގެރޭ ކުޅެފައިވާއިރު، މިރޭގެ ފުރަތަމަ މެޗުގައި ބައްދަލުކުރީ އަންހެން ޑިވިޝަނުގެ ގްރޫޕް އޭގެ ސްކޫލް އޮފް ނާރސިންގ އަދި ފެކަލްޓީ އޮފް އެޑިއުކޭޝަންއެވެ. މި މެޗު ސީދާ 2 ސެޓުން ކާމިޔާބުކޮށްފައި ވަނީ ސްކޫލް އޮފް ނާރސިންގ އިންނެވެ. މި މެޗުގެ ސެޓުތައް ނާރސިންގ އިން ގެންދިޔައީ 25-05 އަދި 25-11 ގެ ނަތީޖާއަކުންނެވެ. މި މެޗުގެ އެންމެ މޮޅު ކުޅުންތެރިއަކަށް ހޮވިގެންދިޔައީ، ސްކޫލް އޮފް ނަރސިންގ ގެ ޖާރޒީ ނަންބަރު 9، އާމިނަތު ސަމްހާ އަބްދުލް ސައްތާރެވެ.
މުބާރާތުގެ ދެވަނަ މެޗުގައި އަންހެން ޑިވިޝަނުގެ ބީ ޓީމުގެ ސީ.އެފް.އެސް އަދި އެފް.އީ.އެސް.ޓީ ބައްދަލުކުރި މެޗުން ދެ ސެޓު ގެންގޮސްގެން ކުރި ހޯދީ ސީ.އެފް.އެސްއެވެ. މި މެޗު ސީ.އެފް.އެސް އިން ކާމިޔާބުކުރީ ވެސް ސީދާ 2 ސެޓުންނެވެ. މި މެޗުގެ ސެޓުތައް ސީ.އެފް.އެސްއިން 25-12 އަދި 25-10ގެ ނަތީޖާއަކުންނެވެ. މިމެޗުގެ އެންމެ މޮޅު ކުޅުންތެރިޔާގެ މަޤާމު ހާޞިލްކުރީ، ސެންޓަރ ފޮރ ފައުންޑޭޝަން ސްޓަޑީޒްގެ ޖާރޒީ ނަންބަރު 4، އާމިނަތު ފިރުޝާއެވެ.
އާދީއްތަދުވަހުގެ އެންމެ ފަހު މެޗުން އަންހެން ޑިވިޝަނުގެ އޭ ޓީމުގެ ބިޒްނަސް ސްކޫލް މޮޅުވީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްއާ ވާދަކޮށް 2 ސެޓު ކާމިޔާބުކޮށްގެނެވެ. ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ސެޓު ބިޒްނަސް ސްކޫލްއިން ކާމިޔާބުކުރީ 25-16ގެ ނަތީޖާއަކުންނެވެ. އަދި ދެވަނަ ސެޓު ކާމިޔާބުކުރީ 25-14ގެ ނަތީޖާއަކުންނެވެ. މިމެޗުގެ އެންމެ މޮޅު ކުޅުންތެރިއަކަށް ހޮވިގެންދިޔައީ އެމް.އެން.ޔޫ ބިޒްނަސް ސްކޫލްގެ ޖާރޒީ ނަންބަރު 4، ޝަމްހާ ރިޔާޒެވެ.
މުބާރާތުގެ ދެވަނަ ދުވަހުގެ މެޗުތައް ފަށަން ހަމަޖެހިފައިވަނީ 02 މާރޗްވާ ހޯމަ ދުވަހުގެ ރޭގަނޑު 20:00ގައެވެ. އެގޮތުން މުބާރާތުގެ ދެވަނަ ދުވަހުގެ ފުރަތަމަ މެޗުގައި ބައްދަލުކުރާނީ ފިރިހެން ޑިވިޝަނުން ސީ.އެފް.އެސް އަދި އެފް.އީ.އެސް.ޓީއެވެ.
ލިޔުނީ: ޝަމާ މުޙައްމަދު،
އެމް.އެން.ޔޫ.އެސް.ޔޫ މީޑިއާ
