އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް 2020 ގެ ދެވަނަ ދުވަހުގެ މެޗުތައް ކުޅެ ނިމިއްޖެއެވެ.
އާދީއްތަ ދުވަހުގެ ރޭ ފެށި އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް 2020 ގެ ދެވަނަ ދުވަހުގައި ފިރިހެން ޑިވިޝަނުގެ ޖުމްލަ 3 މެޗު ކުޅެފައިވާއިރު، ފުރަތަމަ މެޗުގައި ބައްދަލުކުރީ ގްރޫޕް އޭ އިން ސީ.އެފް.އެސް އަދި އެފް.އީ.އެސް.ޓީއެވެ. ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ މި މެޗު ނިމުނީ ސީދާ ދެސެޓުން ސީ.އެފް.އެސް މޮޅު ވެގެންނެވެ. މެޗުގެ ސެޓުތައް ސީ.އެފް.އެސްއިން ގެންދިޔައީ 25-21 އަދި 25-20 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ސީ.އެފް.އެސްގެ ޖާޒީ ނަންބަރު 7، މުޙައްމަދު ޝަމްވީލެވެ.
ހޯމަ ދުވަހުގެރޭ ކުޅުނު ދެވަނަ މެޗުގައި ގްރޫޕް ބީގެ އެމް.އެން.ޔޫ ބިޒްނަސް ސްކޫލްއިން ފެކަލްޓީ އޮފް އެޑިއުކޭޝަންގެ މައްޗަށް ކުރި ހޯދައި މެޗު ކާމިޔާބުކުރީ ވެސް ސީދާ ދެސެޓުންނެވެ. މެޗުގެ ސެޓުތައް އެމް.އެން.ޔޫ ބީ.އެސްއިން ގެންދިޔައީ 25-12 އަދި 25-19އިންނެވެ. މެޗުގެ މޮޅު ކުޅުންތެރިއަކަށް ހޮވިގެންދިޔައީ، އެމް.އެން.ޔޫ ބީ.އެސްގެ ޖާޒީ ނަންބަރު 8، ހަސަން ޖައިލަމް ރިޔާޒެވެ.
ހޯމަ ދުވަހުގެރޭ ކުޅުނު ފަހުމެޗުގައި ވާދަކުރީ ގްރޫޕް އޭއިން އެފް.އެލް.އައި.އެސް އަދި އެފް.އެޗް.ޓީ.އެސް އެވެ. މި މެޗު ދެ ސެޓު ގެންގޮސްގެން ކާމިޔާބުކުރީ އެފް.އެޗް.ޓީ.އެސްއިންނެވެ. އެފް.އެޗް.ޓީ.އެސްއިން މެޗުގެ ސެޓުތައް ގެންދިޔައީ 25-12 އަދި 12-25 އިންނެވެ. ވާދަވެރި ކުޅުމެއް ފެނިގެންދިޔަ މިމެޗުގެ އެންމެ މޮޅު ކުޅުންތެރިއަކީ އެފް.އެޗް.ޓީ.އެސްގެ ޖާޒީ ނަންބަރު 17، ރިފާން އަލީއެވެ.
މުބާރާތުގެ ތިންވަނަ ދުވަހުގައި ކުޅެން ހަމަޖެހިފައިވާ ތިން މެޗުގައިވެސް ބައްދަލުކުރާނީ އަންހެން ޑިވިޝަނުގެ ޓީމުތަކެވެ. އެގޮތުން މުބާރާތުގެ ތިންވަނަ ރޭގެ މެޗުތައް ފަށަން ހަމަޖެހިފައިވަނީ 03 މާރިޗުވާ އަންގާރަ ދުވަހުގެ ރޭގަނޑު 20:00ގައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 5ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2016 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑްވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.
ލިޔުނީ: ޝަމާ މުޙައްމަދު،
އެމް.އެން.ޔޫ.އެސް.ޔޫ މީޑިއާ
