އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް 2020ގެ ފިރިހެން ޑިވިޝަނުގެ ސެމީ ފައިނަލުގެ ފުރަތަމަ ޖާގަ އެމް.އެން.ޔޫ ބިޒްނަސް ސްކޫލްއިން ކަށަވަރުކޮށްފިއެވެ.
އެމް.އެން.ޔޫ ބީ.އެސްއިން މުބާރާތުގެ ސެމީ ފައިނަލުގެ ފުރަތަމަ ޖާގަ ކަށަވަރުކުރީ ބުދަ ދުވަހުގެ ރޭ އެސް.އެންއާ ދެކޮޅަށް ކުޅުނު މެޗުގައި ސީދާ ދެސެޓުން އެސް.އެން ބަލިކޮށްގެނެވެ. އެމް.އެން.ޔޫ ބީ.އެސްއިން ސެޓުތައް ގެންދިޔައީ 25-21 އަދި 25-21 އިންނެވެ. އެމް.އެން.ޔޫ ބީ.އެސް އިން މިހާތަނަށް ކުޅުނު ދެމެޗުންވެސް މޮޅުވެފައި އޮތުމާއެކު އެ ޓީމް ވެގެންދިޔައީ ފިރިހެން ޑިވިޝަނުގެ ގްރޫޕް ބީއިން، ޕޮއިންޓް ތާވަލްގެ އެއްވަނަ ހޯދާފައިވާ ޓީމަށެވެ. އަދި ހަމައެއާއެކު، ސެމީ ފައިނަލުގެ ފުރަތަމަ ޖާގަ ވެސް ކަށަވަރުކުރީ އެމް.އެން.ޔޫ ބީ.އެސް އިންނެވެ. މި މެޗުގެ އެންމެ މޮޅު ކުޅުންތެރިއަކީ އެމް.އެން.ޔޫ ބީ.އެސްގެ ޖާޒީ ނަންބަރު 7، ހަސަން ޝާމިލެވެ.
ބުދަ ދުވަހުގެ ރޭ ޖުމްލަ ތިން މެޗެއް ކުޅެފައިވާއިރު، ފުރަތަމަ މެޗުގައި ގްރޫޕް އޭ ގެ ސީ.އެފް.އެސް އަދި އެފް.އެލް.އައި.އެސް ގެ ކުރިމަތިލުން ސީ.އެފް.އެސް އިން ކާމިޔާބުކުރީ ފަސޭހަ މޮޅަކާއެކު ސީދާ ދެސެޓުންނެވެ. ސީ.އެފް.އެސްއިން މެޗުތައް ގެންދިޔައީ 25-8 އަދި 25-14 އިންނެވެ. މި މޮޅާއެކު ސީ.އެފް.އެސް އިން ވަނީ މުބާރާތުގެ ސެމީ ފައިނަލުގެ އުންމީދު އާކޮށްފައެވެ. މިމެޗުގެ އެންމެ މޮޅު ކުޅުންތެރިއަކީ ސީ.އެފް.އެސްގެ ޖާޒީ ނަންބަރު 12، ޙުސައިން ޝާހެވެ.
ބުދަ ދުވަހުގެ ރޭ ކުޅުނު ފަހު މެޗުގައި އެންމެ ފަހުގެ ޗެމްޕިއަން އެފް.އެޗް.ޓީ.އެސް އަދި ރަނަރަޕް އެފް.އީ.އެސް.ޓީ ބައްދަލުކޮށްފައިވާއިރު، ވާދަވެރި ކުޅުމަކަށްފަހު މި މެޗު ކާމިޔާބުކުރީ އެންމެ ފަހުގެ ރަނަރަޕް އެފް.އީ.އެސް.ޓީ އިންނެވެ. މި މެޗު އެފް.އީ.އެސް.ޓީ އިން ކާމިޔާބުކުރީ ސީދާ ދެ ސެޓުންނެވެ. އެފް.އީ.އެސް.ޓީއިން ސެޓުތައް ގެންދިޔައީ، 25-23 އަދި 25-23 އިންނެވެ. މިމެޗުގެ އެންމެ މޮޅު ކުޅުންތެރިއަކީ އެފް.އީ.އެސް.ޓީގެ ޖާޒީ ނަންބަރު 93، މުޙައްމަދު އާދަމެވެ.
މުބާރާތުގެ ފަސްވަނަ ދުވަހުގެ މެޗުތައް 05 މާރިޗް ވާ ބުރާސްފަތި ދުވަހުގެ ރޭ 20:00ގައި ކުޅެން ހަމަޖެހިފައިވާއިރު، އެންމެ ފުރަތަމަ މެޗުގައި ވާދަ ކުރާނީ އަންހެން ޑިވިޝަނުން ސީ.އެފް.އެސް އަދި އެފް.އެޗް.ޓީ.އެސްއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 5ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2016 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑިވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.
ލިޔުނީ: ޝަމާ މުޙައްމަދު،
އެމް.އެން.ޔޫ.އެސް،ޔޫ މީޑިއާ
