އެސް.އެން, ސީ.އެފް.އެސް އަދި އެފް.އެޗް.އެސްއިން ސެމީގެ ޖާގަ ކަށަވަރުކޮށްފި

ބުރާސްފަތި ދުވަހުގެ ރޭ ކުޅުނު ގްރޫޕް ސްޓޭޖް މެޗުތަކުން ވި މޮޅާއެކު، އެސް.އެން، ސީ.އެފް.އެސް އަދި އެފް.އެޗް.އެސްއިން މުބާރާތުގެ ސެމީ ފައިނަލުގެ ޖާގަ ކަށަވަރުކޮށްފިއެވެ.

06 މާރިޗް ވީ ބުރާސްފަތި ދުވަހުގެރޭ ކުޅުނު އަންހެން ޑިވިޝަނުގެ ގްރޫޕް ސްޓޭޖް މެޗުތަކުގައި ޖުމްލަ 3 މެޗު ކުޅެފައިވާއިރު، ފުރަތަމަ މެޗުގައި ބައްދަލުކުރީ ގްރޫޕް ބީއިން ސީ.އެފް.އެސް އަދި އެފް.އެޗް.ޓީ.އެސްއެވެ. މި މެޗު ވާދަވެރި ކުޅުމަކަށްފަހު  ސީދާ ދެސެޓުން މެޗު ކާމިޔާބުކުރީ ސީ.އެފް.އެސްއިންނެވެ. މި މެޗުގެ ސެޓުތައް ސީ.އެފް.އެސްއިން ކާމިޔާބުކުރީ 26-24 އަދި 25-23 ގެ ހަނި ތަފާތަކުންނެވެ. މި މޮޅާއެކު ސީ.އެފް.އެސްއަށް ވަނީ ސެމީ ފައިނަލުގެ ޖާގަ ކަށަވަރުވެފައެވެ. ގްރޫޕް ސްޓޭޖްގައި ސީ.އެފް.އެސްއިން ހޯދި މި ކާމިޔާބީއާއެކު ގްރޫޕް ބީގެ ދެވަނައަށް ޖެހިލީ 6 ޕޮއިންޓްއާއެކުއެވެ. އެފް.އެޗް.ޓީ.އެސްއިން މިހާތަނަށް ކުޅުނު ދެމެޗުން ބަލިވެފައިވުމާއެކު، އެ ޓީމު ވަނީ މުބާރާތުން ކަޓައިފައެވެ. މިމެޗުގެ އެންމެ މޮޅު ކުޅުންތެރިއަކަށް ހޮވުނީ ސީ.އެފް.އެސްގެ ޖާރޒީ ނަންބަރު 2، ސުހާ އަހްމަދު ހާފިޒެވެ.

ގްރޫޕް ސްޓޭޖްގެ ދެވަނަ މެޗުގައި އެފް.އީ.އެސް.ޓީ އަދި އެފް.އެޗް.އެސްގެ ކުރިމަތިލުން ފަސޭހަ ކަމާއެކު ސީދާ ދެސެޓުން ކާމިޔާބުކުރީ އެފް.އެޗް.އެސްއިންނެވެ. އެފް.އެޗް.އެސްއިން ސެޓުތައް ގެންދިޔައީ 25-16 އަދި 25-7 އިންނެވެ. މިމެޗުގެ އެންމެ މޮޅު ކުޅުންތެރިއަކީ އެފް.އެޗް.އެސްގެ ޖާރޒީ ނަންބަރު 16، އާމިނަތު އަފާފް ނިޒާމެވެ. މި ނަތީޖާއާއެކު އެފް.އެޗް.އެސް ވަނީ 6 ޕޮއިންޓްއާއެކު ގްރޫޕް ބީއިން ސެމީ ފައިނަލަށް ދަތުރުކޮށްފައެވެ. އެކަމަކު ގްރޫޕް ބީގެ އެއްވަނަ ޓީމް ކަށަވާނީ އެފް.އެޗް.އެސް އަދި ސީ.އެފް.އެސް ބައްދަލުކުރާ މެޗަށް ފަހުގައެވެ. ގްރޫޕް ބީގެ އެފް.އީ.އެސް.ޓީ ވެސް މުބާރާތުން ކެޓީ މިހާތަނަށް ކުޅުނު އެއްވެސް މެޗެއް ކާމިޔާބު ނުކުރެވުމުންނެވެ.

ބުރާސްފަތި ދުވަހުގެރޭ ކުޅުނު ފަހުމެޗުގައި އެސް.އެންއިން އެފް.އެލް.އައި.އެސްގެ މައްޗަށް ކުރި ހޯދީ ސީދާ ދެ ސެޓުންނެވެ. އެސް.އެންއިން ސެޓުތައް ގެންދިޔައީ 25-12 އަދި 25-19 އިންނެވެ. މިހާތަނަށް ކުޅުނު ހުރިހާ މެޗަކުން މޮޅުވެފައިވާ އެސް.އެން ވަނީ ޖުމްލަ 8 ޕޮއިންޓްއާއެކު ގްރޫޕް އޭގެ އެއްވަނަ ޓީމުގެ ގޮތުގައި މުބާރާތުގެ ސެމީ ފައިނަލުގެ ޖާގަ ކަށަވަރުކޮށްފައެވެ. މިމެޗުގެ އެންމެ މޮޅު ކުޅުންތެރިއަކީ އެސް.އެންގެ ޖާރޒީ ނަންބަރު 5، މަރިޔަމް ނިޝާއެވެ.

އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 5ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2016 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑްވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.

ލިޔުނީ: އާމިނަތު ޝަމާ މުޙައްމަދު،
އެމް.އެން.ޔޫ.އެސް.ޔޫ މީޑިއާ