އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2020ގެ އަންހެން ޑިވިޝަނުގެ ގްރޫޕް ސްޓޭޖް މެޗުތައް ނިމި ސެމީ ފައިނަލުގައި ވާދަ ކުރާ ޓީމުތައް ކަށަވަރުވެއްޖެއެވެ.
ހުކުރު ދުވަހު ހެނދުނު ކުޅުނު ފުރަތަމަ މެޗުގައި އެމް.އެން.ޔޫ ބީ.އެސް އަދި އެފް.އީ ބައްދަލުކޮށްފައިވާއިރު މި މެޗު ދެ ސެޓު އެއް ސެޓުން ކާމިޔާބުކުރީ އެމް.އެން.ޔޫ ބީ.އެސް އިންނެވެ. މެޗުގެ ފުރަތަމަ ސެޓު ބީއެސް އިން ފަސޭހަކަމާއެކު ކާމިޔާބު ކޮށްފައިވަނިކޮށް ފަހަތުން އަރައި ދެވަނަ ސެޓު ވާދަވެރި ކުޅުމަކަށްފަހު އެފްއީއިން ވަނީ ކާމިޔާބު ކޮށްފައެވެ. ނަމަވެސް ފަހު ސެޓު ބީ.އެސް އިން ވަނީ ފަސޭހަކަމާއިއެކު ކާމިޔާބުކޮށްފައެވެ. މި މެޗުގެ ސެޓުތައް ދިޔައީ 25-09، 25-23 އަދި 15-08 އިންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވުނީ ބީ.އެސްގެ ޖާޒީ ނަމްބަރު 12 އިނާސާ އަބްދުއްރަހީމް އެވެ. މި މޮޅާއިއެކު ބީ.އެސް އިން ވަނީ ސެމީގެ ޖާގަ ކަށަވަރު ކޮށްފައެވެ.
ހުކުރު ދުވަހު ހެނދުނު ކުޅުނު ދެވަނަ މެޗުގައި އެފް.އެޗް.އެސް އަދި ސީ.އެފް.އެސް ބައްދަލުކުރި މެޗު ފަސޭހަކަމާއިއެކު އެފް.އެޗް.އެސް އިން ވަނީ ކާމިޔާބުކޮށްފައެވެ. މި ދެޓީމު މީގެ ކުރިން ނިމިދިޔަ އަހަރުގެ ސެމީ ފައިނަލުގައި ވެސް ވަނީ ވާދަކޮށްފައެވެ. އެ މެޗު ވެސް އެފް.އެޗް.އެސް އިން ވަނީ ކާމިޔާބުކޮށްފައެވެ. ހުކުރު ދުވަހު ހެނދުނު ކުޅުނު މެޗުގެ ސެޓުތައް އެފް.އެޗް.އެސް އިން ގެންދިޔައީ 25-17 އަދި 25-16 އިންނެވެ. މި މެޗުގެ އެންމެ މޮޅު ކުޅުންތެރިޔަކީ އެފް.އެޗް.އެސްގެ ޖާޒީ ނަމްބަރު 16 އާމިނަތު އަފާފް ނިޒާމް އެވެ.
ހުކުރު ދުވަހު ހެނދުނު ކުޅުނު ފަހު މެޗުގައި ވާދަކުރީ އެފް.އީ.އެސް.ޓީ އަދި އެފް.އެޗް.ޓީ.އެސްއެވެ. މިމެޗު އެފް.އެޗް.ޓީ.އެސްއިން ކާމިޔާބުކުރީ ސީދާ ދެސެޓުންނެވެ. އެފް.އެޗް.ޓީ.އެސްއިން މެޗުތައް ގެންދިޔައީ 25-12 އަދި25-18 އިންނެވެ. އަދި މިއީ މިދެ ޓީމު މި މުބާރާތުގައި ކުޅޭނެ އެންމެ ފަހު މެޗެވެ. މިމެޗުގެ އެންމެ މޮޅު ކުޅުންތެރިއަކީ އެފް.އެޗް.ޓީ.އެސްގެ ޖާޒީ ނަމްބަރު 7، ނަރީމާ އިދްރީސްއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 ގެ ފިރިހެން ޑިވިޝަނުގެ ގްރޫޕް ސްޓޭޖްގެ ބާކީ ކުޅޭ މެޗުތައް މިއަދު މެންދުރު 14:00 ގައި ކުޅެން ހަމަޖެހިފައިވާއިރު މުބާރާތުގެ އަންހެން ޑިވިޝަނުގެ ސެމީ ފައިނަލްގެ މެޗުތައް ކުޅެން ހަމަޖެހިފައިވަނީ މިރޭ 20:00ގައެވެ.
މުބާރާތުގެ އަންހެން ޑިވިޝަނުގެ ސެމީ ފައިނަލުގައި ޗެމްޕިއަން ބީ.އެސް ވާދަ ކުރާނީ މިދިޔަ އަހަރުގެ ރަނަރަޕް ޓީމް އެފް.އެޗް.އެސްއާ ދެކޮޅަށެވެ. ސެމީ ފައިނަލުގެ ދެވަނަ މެޗުގައި ވާދަ ކުރާނީ ގްރޫޕް އޭގެ އެއްވަނަ ޓީމު އެސް.އެން އަދި ގްރޫޕް ބީގެ ދެވަނަ ޓީމު ސީ.އެފް.އެސްއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 5ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2016 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑްވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.
ލިޔުނީ: އާމިނަތު ޝަމާ މުޙައްމަދު،
އެމް.އެން.ޔޫ.އެސް.ޔޫ މީޑިއާ
