ޗެމްޕިއަން އެފް.އެޗް.ޓީ.އެސް ބަލިކޮށް ސީ.އެފް.އެސް ސެމީގެ ޖާގަ ކަށަވަރުކުރިއިރު، އެސް.އެން ބަލިކޮށް އެފް.އީ އިން ސެމީއަށް ދަތުރުކޮށްފިއެވެ.
ހުކުރު ދުވަހު މެންދުރު ކުޅުނު ފިރިހެން ޑިވިޝަނުގެ ގްރޫޕް ސްޓޭޖް ގެ ފުރަތަމަ މެޗުގައި ޗެމްޕިއަން އެފް.އެޗް.ޓީ.އެސް ބަލިކޮށް ގްރޫޕް އޭގެ އެއްވަނަ ޓީމު ސީ.އެފް.އެސްއިން ސެމީ ފައިނަލުގެ ޖާގަ ކަށަވަރުކޮށްފިއެވެ. މެޗުގެ ސެޓުތައް ސީ.އެފް.އެސްއިން ގެންދިޔައީ 25-13 އަދި 25-19 އިންނެވެ. މިމެޗުގެ އެންމެ މޮޅު ކުޅުންތެރިއަކީ ސީ.އެފް.އެސްގެ ޖާރޒީ ނަމްބަރު 10، މާދިހް މުހައްމަދެވެ. ސީ.އެފް.އެސް ގްރޫޕް އޭގެ އެއްވަނައިގައި އޮތީ މިހާތަނަށް ކުޅުނު ހުރިހާ މެޗަކުން މޮޅުވެގެން ޖުމްލަ 9 ޕޮއިންޓާއެކުއެވެ. މި ދެޓީމު ވަނީ ހަތަރުވަނަ އެމް.އެން.ޔޫ.އެސް.ޔޫ ވޮލީ މުބާރާތުގެ ސެމީ ފައިނަލުގައި ބައްދަލުކޮށްފައެވެ. އެ މެޗު ވާދަވެރި ކުޅުމަކަށްފަހު ކާމިޔާބުކުރީ އެފް.އެޗް.ޓީ.އެސް އިންނެވެ.
ހުކުރު ދުވަހު ކުޅުނު ދެވަނަ މެޗުގައި ގްރޫޕް ބީއިން އެފް.އީ އަދި އެސް.އެންގެ ކުރިމަތިލުން ސީދާ ދެސެޓުން ކާމިޔާބުކުރީ އެފް.އީއިންނެވެ. އެފް.އީއިން ސެޓުތައް ގެންދިޔައީ 25-23 އަދި 25-22އިންނެވެ. މިމޮޅާއިއެކު އެފް.އީ އަށް ވަނީ ސެމީ ފައިނަލުގެ ޖާގަ ކަށަވަރުވެފައެވެ. އެފް.އީއިން ސެމީ ފައިނަލުގެ ޖާގަ ކަށަވަރުކުރީ 3 ޕޮއިންޓްއާއެކު ގްރޫޕް ބީގެ ދެވަނަ ޓީމުގެ ގޮތުގައެވެ.
ގްރޫޕް ސްޓޭޖްގައި ކުޅުނު ފިރިހެން ޑިވިޝަނުގެ ފަހު މެޗުގައި މިދިޔަ އަހަރުގެ ރަނަރަޕް އެފް.އީ.އެސް.ޓީ އިން ސެމީ ފައިނަލުގެ ޖާގަ ކަށަވަރުކުރީ ސީދާ ދެސެޓު ގެންގޮސްގެން އެފް.އެލް.އައި.އެސް ބަލިކުރުމަށްފަހުއެވެ. އެފް.އީ.އެސް.ޓީއިން ސެޓުތައް ގެންދިޔައީ 25-21 އަދި 25-22 އިންނެވެ. އެފް.އެލް.އައި.އެސްގެ މި ބައްޔާ އެކު އެ ޓީމަށް ވަނީ ސެމީ ފައިނަލުގައި ވާދަކުރުމުގެ ފުރުސަތު ގެއްލިފައެވެ. ވާދަވެރި ކުޅުމެއް ފެނިގެންދިޔަ މިމެޗުގެ އެންމެ މޮޅު ކުޅުންތެރިއަކަށް ހޮވުނީ އެފް.އީ.އެސް.ޓީގެ ޖާރޒީ ނަމްބަރު 6، އަހްމަދު އަތޫފްއެވެ.
ގްރޫޕް ސްޓޭޖުގައި އެފް.އީ.އެސް.ޓީއިން ހޯދި މި ކާމިޔާބީއާއެކު ގްރޫޕް އޭގެ ދެވަނަ އަށް ޖެހިލީ 6 ޕޮއިންޓްއާއެކުއެވެ. ކުޅުނު ހުރިހާ މެޗަކުން މޮޅުވެގެން 9 ޕޮއިންޓްއާއެކު ގްރޫޕް އޭގެ އެއްވަނާގައި އޮތީ ސީ.އެފް.އެސްއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2020ގެ ފިރިހެން ޑިވިޝަނުގެ ސެމީ ފައިނަލް މެޗުތައް ކުޅެން ހަމަޖެހިފައިވަނީ 08 މާރޗްވާ ހޮނިހިރު ދުވަހު ހެނދުނު 08:00ގައެވެ. އެގޮތުން ސެމީ ފައިނަލުގައި ގްރޫޕް އޭގެ އެއްވަނަ ޓީމު ކަމުގައިވާ ސީ.އެފް.އެސް ބައްދަލު ކުރާނީ ގްރޫޕް ބީގެ ދެވަނަ ޓީމު އެފް.އީ އާއި ދެކޮޅަށެވެ. އަދި ގްރޫޕް ބީގެ އެއްވަނަ ޓީމު އެމް.އެން.ޔޫ ބީ.އެސް ނިކުންނާނީ 2019 ވަނަ އަހަރުގެ ރަނަރަޕް ޓީމު އެފް.އީ.އެސް.ޓީއާ ދެކޮޅަށެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 5ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2016 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑިވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.
ލިޔުނީ: ޝަމާ މުޙައްމަދު،
އެމް.އެން.ޔޫ.އެސް،ޔޫ މީޑިއާ
