އެމް.އެން.ޔޫ އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގައި ސެންޓަރ ފޮރ ފައުންޑޭޝަން ސްޓަޑީޒް (ސީ.އެފް.އެސް) ބަލިކޮށް ސްކޫލް އޮފް ނަރސިންގ (އެސް.އެން) އިން މުބާރާތުގެ ފައިނަލުގެ ޖާގަ ކަށަވަރުކޮށްފިއެވެ.
ދެ ޑިވިޝަނަށް ބަހާލައިގެން ޖުމްލަ 15 ޓީމާއެކު ކުރިޔަށްދާ އެމް.އެން.ޔޫ.އެސް ވޮލީ މުބާރާތް 2020ގެ އަންހެން ޑިވިޝަނުގެ ސެމީ ފައިނަލުގައި، ފޯރިގަދަ ކުޅުމެއް ފެނިގެންދިޔަ މިމެޗުގައި، އެސް.އެންއިން ސީ.އެފް.އެސްގެ މައްޗަށް ކުރި ހޯދީ ސީދާ ތިން ސެޓު އިންނެވެ.
ފުރަތަމަ ސެޓު އެސް.އެންއިން ފަސޭހަކަމާއެކު 25-11ގެ ނަތީޖާއަކުން ކާމިޔާބުކޮށްފައި ވަނިކޮށް ދެ ވަނަ ސެޓުގައި ސީ.އެފް.އެސްއިން ވަނީ ރަނގަޅު ކުޅުމެއް ދައްކައި ޕޮއިންޓްގެ ފަރަގު ކުޑަ ކުރުމަށް މަސައްކަތް ކޮށްފައެވެ. ނަމަވެސް އެސް.އެން އިން ވަނީ މެޗުގެ ދެވަނަ ސެޓު ވެސް 25-18 އިން ކާމިޔާބުކޮށްފައެވެ. 25-15 ގެ ނަތީޖާއަކުން އެސް.އެންއިން ވަނީ ފަސޭހަ ކަމާއެކު މެޗުގެ ތިންވަނަ ސެޓުވެސް ގެންގޮސްފައެވެ. މި މެޗުގެ އެންމެ މޮޅު ކުޅުންތެރިއަކަށް ހޮވުނީ އެސް.އެންގެ ޖާރޒީ ނަމްބަރު 7، އާމިނަތު ފިރުޝާއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ މުބާރާތުގެ ފައިނަލުގައި އެސް.އެން ވާދަ ކުރާނީ ނިމިދިޔަ އަހަރުގެ ޗެމްޕިއަން އެމް.އެން.ޔޫ ބީ.އެސްއާއެވެ.
މުބާރާތުގެ އަންހެން ޑިވިޝަނުގެ ފައިނަލް މެޗު ކުޅެން ހަމަޖެހިފައިވަނީ 07 މަރޗްވާ ހޮނިހިރު ދުވަހުގެ ހަވީރު 16:00 ގައެވެ.
މި މުބާރާތުގެ 2015، 2016 އަދި 2017 ވަނަ އަހަރުގެ އަންހެން ޑިވިޝަނުގެ ޗެމްޕިއަން ޓީމަކީ ފެކަލްޓީ އޮފް އެޑިއުކޭޝަން (އެފް.އީ) އެވެ. ޖެހިގެން އައި 2018 ވަނަ އަހަރު އެމް.އެން.ޔޫ.ބި.އެސް އިން މުބާރާތް ކާމިޔާބުކޮށްފައިވާއިރު، 2019 ގައި އެމް.އެން.ޔޫ ބީ.އެސް އިންވަނީ ތަށި ދިފާޢު ކޮށްފައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 5ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2016 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑިވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.
ލިޔުނީ: ޝަމާ މުޙައްމަދު،
އެމް.އެން.ޔޫ.އެސް.ޔޫ މީޑިއާ
