ފަސްވަނަ އެމް.އެން.ޔޫ.އެސް.ޔޫ އިންޓަ ފެކަލްޓީ ވޮލީ މުބާރާތުގެ ފައިނަލުން އެންމެ ފަހުގެ ރަނަރަޕް ފެކަލްޓީ އޮފް ހެލްތް ސައިންސް (އެފް.އެޗް.އެސް) ބަލިކޮށް ޗެމްޕިއަން (އެމް.އެން.ޔޫ.ބީ.އެސް) އިން ފައިނަލަށް ދަތުރުކޮށްފިއެވެ.
ނިމިދިޔަ އަހަރުގެ ފައިނަލުގައި މި ދެޓީމު ވާދަކުރި މެޗު އެމް.އެން.ޔޫ ބީ.އެސް އިން ކާމިޔާބުކުރީ ތިން ސެޓު އެއް ސެޓުންނެވެ.
ހުކުރު ދުވަހުގެރޭ ކުޅުނު ސެމީ ފައިނަލުގެ ދެވަނަ މެޗު އެމް.އެން.ޔޫ ބީ.އެސް އިން ކާމިޔާބުކުރީ ފަސޭހަކަމާއިއެކު ސީދާ ތިން ސެޓުންނެވެ. މެޗުގެ ފުރަތަމަ ސެޓު އެފް.އެޗް.އެސް އަށް އެއްވެސް ފުރުސަތެއްނުދީ އެމް.އެން.ޔޫ.ބީ.އެސް އިން ކާމިޔާބުކުރީ 25-8 އިންނެވެ. ނަމަވެސް މެޗުގެ ދެވަނަ ސެޓުގައި އެފް.އެޗް.އެސް އިން ވަނީ އެޓީމުގެ ކުޅުން ރަނގަޅުކޮށްފައެވެ. ނަމަވެސް މި ސެޓު ވެސް ބީ.އެސް އިން ވަނީ ކާމިޔާބުކޮށްފައެވެ. މި ސެޓު ބީ.އެސް އިން ކާމިޔާބުކުރީ 25-23 އިންނެވެ. މެޗުގެ ފަހު ސެޓު ބީ.އެސް އިން ވަނީ ފަސޭހަކަމާއިއެކު ކާމިޔާބުކޮށްފައެވެ. މި ސެޓު ބީ.އެސް އިން ކާމިޔާބުކުރީ 25-14 އިންނެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ މުބާރާތް 2020 ގެ ފައިނަލުގައި އެމް.އެން.ޔޫ.ބީ.އެސް އަދި އެސް.އެންގެ ކުރިމަތިލުން ވެގެންދާނީ ފޯރިގަދަ ކުރިމަތިލުމެއްގެ ގޮތުގައެވެ. މި މުބާރާތުގެ ގްރޫޕް ސްޓޭޖްގައި ވެސް މި ދެ ޓީމު ވާދަކޮށްފައިވެއެވެ. މި މެޗު އެސް.އެން އިން ވަނީ 2 ސެޓު 1 ސެޓުން ކާމިޔާބުކޮށްފައެވެ.
މި މުބާރާތުގެ 2015، 2016 އަދި 2017 ވަނަ އަހަރުގެ އަންހެން ޑިވިޝަނުގެ ޗެމްޕިއަން ޓީމަކީ ފެކަލްޓީ އޮފް އެޑިއުކޭޝަން (އެފް.އީ) އެވެ. ޖެހިގެން އައި 2018 ވަނަ އަހަރު އެމް.އެން.ޔޫ.ބި.އެސް އިން މުބާރާތް ކާމިޔާބުކޮށްފައިވާއިރު، 2019 ގައި އެމް.އެން.ޔޫ ބީ.އެސް އިންވަނީ ތަށި ދިފާޢު ކޮށްފައެވެ.
މުބާރާތުގެ ފައިނަލުގައި އެމް.އެން.ޔޫ ބީ.އެސް އަދި އެސް.އެން ބައްދަލުކުރާނީ 07 މާރޗްވާ ހޮނިހިރު ދުވަހުގެ ހަވީރު 16:00ގައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 5ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2016 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑިވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.
ލިޔުނީ: ޝަމާ މުޙައްމަދު،
އެމް.އެން.ޔޫ.އެސް.ޔޫ މީޑީއާ
