ތާރީޙު ބަދަލުކޮށް ސީ.އެފް.އެސް އިން ފުރަތަމަ ފަހަރަށް ފައިނަލަށް

ކުޅުނު ހުރިހާ މެޗަކުން މޮޅުވެގެން ސީ.އެފް.އެސްއިން މުބާރާތުގެ ފައިނަލުގެ ޖާގަ ކަށަވަރުކޮށްފިއެވެ.

އެމް.އެން.ޔޫ.އެސް.ޔޫގެ ފަރާތުން އިންތިޒާމުކޮށްގެން ބާއްވާ އެމް.އެން.ޔޫ.އެސް.ޔޫ ވޮލީ މުބާރާތް 2020ގެ ފިރިހެން ޑިވިޝަނުގެ ސެމީ ފައިނަލް މެޗުތަކުގައި ޓީމުތަކުން ވަނީ ވާދަވެރި ކުޅުމެއް ދައްކާފައެވެ.

07 މާރޗްވީ ހޮނިހިރު ދުވަހުގެ ހެނދުނު ކުރިޔަށް ދިޔަ ސެމީ ފައިނަލުގެ ފުރަތަމަ މެޗުގައި ގްރޫޕް ބީގެ ދެވަނަ ޓީމު އެފް.އީ ބަލިކޮށް ސީދާ ތިން ސެޓުން މެޗު ކާމިޔާބުކުރީ ސީ.އެފް.އެސް އިންނެވެ.

ފުރަތަމަ ސެޓުގައި އެފް.އީއިން ރަނގަޅު ކުޅުމެއް ދެއްކި ނަމަވެސް ސީ.އެފް.އެސްއިންވަނީ 5 ޕޮއިންޓްގެ ފަރަގުން، 25-20 އިން ފުރަތަމަ ސެޓު ކާމިޔާބުކޮށްފައެވެ. ދެވަނަ ސެޓު ސީ.އެފް.އެސްއިން ފަސޭހަ ކަމާއެކު ގެންދިޔައީ 25-14 އިންނެވެ. ފަހު ސެޓުގައި އެފް.އީއިން އެ ޓީމުގެ ކުޅުން ރަނގަޅުކުރި ނަމަވެސް ސީ.އެފް.އެސްއިން ވަނީ އެޓީމުގައި ތިބި ހުނަރުވެރި ކުޅުންތެރިންގެ ބޭނުންހިފައި މި ސެޓު 26-25ގެ ހަނި ތަފާތަކުން ކާމިޔާބުކޮށްފައެވެ. ސީ.އެފް.އެސްގެ މި މޮޅާއިއެކު އެފް.އީއަށްވަނީ މުބާރާތުގެ ފައިނަލުގައި ވާދަކުރުމުގެ ފުރުސަތުގެއްލިފައެވެ. މިމެޗުގެ އެންމެ މޮޅު ކުޅުންތެރިއަކީ ސީ.އެފް.އެސްގެ ޖާރޒީ ނަމްބަރު 7، މުހައްމަދު ޝަމްވީލްއެވެ.

ނިމިދިޔަ އަހަރު ސީ.އެފް.އެސް ސެމީ ފައިނަލުގައި ވި ބައްޔާއެކު ސީ.އެފް.އެސްއަށް ފައިނަލުގައި ވާދަ ކުރުމުގެ ފުރުސަތު ގެއްލުނު ނަމަވެސް، މިއަހަރު ސީ.އެފް.އެސްއިން ވަނީ ސެމީ ފައިނަލު މެޗުން މޮޅުވެ، މުބާރާތް ކާމިޔާބުކުރުމުގެ އުންމީދު އާ ކޮށްފައެވެ.

މުބާރާތުގެ ފައިނަލު މެޗުގައި ސީ.އެފް.އެސް އަދި އެމް.އެން.ޔޫ ބީ.އެސްގެ ކުރިމަތިލުން އޮންނާނީ މިރޭ 20:00 ގައެވެ.

އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ މުބާރާތުގެ ފިރިހެން ޑިވިޝަނުގެ ޗެމްޕިއަންކަން ފުރަތަމަ ހޯދީ 2015 އަހަރު އެފް.އެޗް.ޓީ.އެސްއިންނެވެ. 2016 ވަނަ އަހަރު އެފް.އެސް.އެލް އިން ޗެމްޕިއަންކަން ހޯދާފައި ވާއިރު 2017 ވަނަ އަހަރު މުބާރާތް ކާމިޔާބުކުރީ އެފް.އީއިންނެވެ. ޖެހިގެން އައި 2018 ވަނަ އެފް.އެޗް.ޓީ.އެސް އަތުން މޮޅުވެގެން އެފް.އެސް.އެލްއިން މުބާރާތް ކާމިޔާބުކުރި އިރު 2019 ވަނަ އަހަރު އެފް.އެޗް.ޓީ.އެސްއިންވަނީ މުބާރާތުގެ ޗެމްޕިއަންކަން ހޯދާފައެވެ.

އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 5ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2016 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑިވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.

ލިޔުނީ: ޝަމާ މުޙައްމަދު،
އެމް.އެން.ޔޫ.އެސް.ޔޫ މީޑީއާ