އިދިކޮޅަށް ސެޓެއް ނުދީ ސީ.އެފް.އެސްއިން ފިރިހެން ޑިވިޝަނުގެ ޗެމްޕިއަންކަން ހޯދައިފި!

އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގައި ކުޅުނު ހުރިހާ މެޗަކުން މޮޅުވެ، ސީ.އެފް.އެސް.އިން މުބާރާތުގެ ޗެމްޕިއަންކަން ފުރަތަމަ ފަހަރަށް ހޯދައިފިއެވެ.

އެމް.އެން.ޔޫ.އެސް.ޔޫގެ ފަރާތުން އެމް.އެން.ޔޫގެ ފެކަލްޓީތަކާއި ސެންޓަރ ތަކަށް އަމާޒުކޮށްގެން ބާއްވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ މުބާރާތުގައި ދެ ޑިވިޝަނުން ޖުމްލަ 15 ޓީމު ވާދަކޮށްފައި ވާއިރު، މުބާރާތުގެ ފިރިހެން ޑިވިޝަނުގެ ފައިނަލުގައި ސީ.އެފް.އެސް އަދި އެމް.އެން.ޔޫ ބީ.އެސްގެ ކުރިމަތިލުން ސީދާ 3 ސެޓުން ކާމިޔާބުކުރީ ސީ.އެފް.އެސްއިންނެވެ.

ގިނަ ސަޕޯޓަރުންތަކެއްގެ ސަޕޯޓާއިއެކު ކުޅުންތެރިންގެ ޖޯޝު އިތުރު ކޮށްދިން،  ފައިނަލުގެ މި މެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައެވެ. މެޗުގެ ފުރަތަމަ ސެޓު ސީ.އެފް.އެސްއިން 25-18 އިން ގެންގޮސްފައި ވާއިރު، އެމް.އެން.ޔޫ ބީ.އެސް އިން ވަނީ އެ ޓީމުގެ ކުޅުން ރަނގަޅުކޮށް ދެވަނަ ސެޓުގެ ކުރީކޮޅު ބޮޑު ލީޑެއް ނަގައިފައެވެ. ނަމަވެސް ސީ.އެފް.އެސްއިން ވަނީ އެމް.އެން.ޔޫ ބީ.އެސްއަށް މި ސެޓު ގެންދިޔުމުގެ ފުރުސަތު ގެއްލުވާލާފައެވެ. ސީ.އެފް.އެސްއިން މި ސެޓު ގެންދިޔައީ، 28-26 އިންނެވެ. މެޗުގެ ތިންވަނަ ސެޓު ފަސޭހަ ކަމާއިއެކު ސީ.އެފް.އެސްއިން ވަނީ 25-11 އިން ގެންގޮސް މުބާރާތުގެ ޗެމްޕިއަންކަން ހޯދާފައެވެ.

މިއީ ސީ.އެފް.އެސްއިން މުބާރާތުގެ ޗެމްޕއިންކަން ހޯދި ފުރަތަމަ ފަހަރެވެ. އަދި މިއަހަރުގެ މުބާރާތް ސީ.އެފް.އެސްއިން ކާމިޔާބުކުރިއިރު އެޓީމުން މުބާރާތް ކާމިޔާބުކުރީ އެއްވެސް ސެޓަކުން ބަލިނުވެއެވެ. ނިމިދިޔަ އަހަރު ސީ.އެފް.އެސް މުބާރާތުން ކެޓީ ސެމީ ފައިނަލުގައި 2019 ވަނަ އަހަރުގެ ޗެމްޕިއަން އެފް.އެޗް.ޓީ.އެސް އަތުން 3-2 އިން ބަލިވެގެންނެވެ.

މުޅި މުބާރާތުން ފިރިހެން ޑިވިޝަނުގެ އެންމެ މޮޅު ކުޅުންތެރިއަކަށް ސީ.އެފް.އެސްގެ ޖާރޒީ ނަމްބަރު 07، މުހައްމަދު ޝަމްވީލް ހޮވިފައިވާއިރު، މުބާރާތުގެ އެންމެ މޮޅު ހަގެ ކުޅުންތެރިއަކަށް ހޮވުނީ، ސި.އެފް.އެސްގެ ޖާރޒީ ނަމްބަރު 10، މާދިހް މުހައްމަދްއެވެ.

މުބާރާތުގެ އެންމެ މޮޅު 6 ކުޅުންތެރިންނަކީ:

ހުސެއިން ޝާހް، ޖާރޒީ ނަމްބަރު 12 – ސީ.އެފް.އެސް

ހަސަން ޖައިލަމް ރިޔާޒް، ޖާރޒީ ނަމްބަރު 8 – އެމް.އެން.ޔޫ ބީ.އެސް

އަހުމަދް އަތޫފް، ޖާރޒީ ނަމްބަރު 6 – އެފް.އީ.އެސް.ޓީ

އިބްރާހިމް ރަޒީން، ޖާރޒީ ނަމްބަރު 16 – އެމް.އެން.ޔޫ ބީ.އެސް

އަލީ އާރިފް، ޖާރޒީ ނަމްބަރު 12 – އެފް.އީ

އަހްމަދު މުޒްލިފް، ޖާރޒީ ނަމްބަރު 4 – ސީ.އެފް.އެސް

މުބާރާތުގެ އެންމެ މޮޅު ލިބަރޯ އަކަށް އެފް.އީ.އެސް.ޓީގެ ޖާރޒީ ނަމްބަރު 16، ފާރިޝް އާދަމް ހޮވިފައިވާއިރު، މުބާރާތުގެ ފިރިހެން ޑިވިޝަނުގެ އެންމެ މޮޅު ކޯޗަކަށް ހޮވުނީ، އެމް.އެން.ޔޫ ބީ.އެސްގެ ކޯޗު، ސޮފްވާން އަހުމަދްއެވެ.

އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 6ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2015 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑިވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.

ލިޔުނީ: ޝަމާ މުޙައްމަދު،
އެމް.އެން.ޔޫ.އެސް.ޔޫ މީޑިއާ