ދިވެހި ރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން ކުރިއަށްއޮތް ފަސް އަހަރަށް އެކުލަވާލާ އާ ސްޓްރެޓީޖިކް ޕްލޭން ތައްޔާރު ކުރުމުގެ ގޮތުން ލަނޑުދަނޑިތައް ކަނޑައަޅައި މުޅިން އަލަށް ދަރިވަރުންގެ ޚިޔާލާ މަޝްވަރާ ހޯދައިފިއެވެ.
2020 މާރިޗު 12 ވަނަ ދުވަހު އެމް.އެން.ޔޫ ސެންޓްރަލް ”އޭ“ ބްލޮކް ސެމިނަރ ރޫމްގައި ”ސްޓްރެޓީޖިކް ޕްލޭން ޑިސްކަޝަން“ މިނަމުގައި މަސައްކަތު ބައްދަލުވުމެއް ވަނީ ކުރިއަށް ގެންގޮސްފައެވެ. 2020 އިން 2025 އަށް އެކުލަވާލާ ސްޓްރެޓީޖިކް ޕްލޭންގެ ދަށުން ކަނޑައަޅާ 10 ގޯލް ވަނީ ދަރިވަރުންނާ ހިއްސާކޮށްފައިވާއިރު، މި ގޯލްތަކާމެދު ދަރިވަރުންގެ ޚިޔާލާއި މަޝްވަރާ ހޯދާފައިވެއެވެ. މިއީ މިފަދަ ފުރުސަތެއް ދަރިވަރުންނަށް ހުޅުވާލި ފުރަތަމަ ފަހަރެވެ.
މި މަސައްކަތު ބައްދަލުވުމުގައި ޑެޕިއުޓީ ވައިސް ޗާންސެލަރ ޑރ. އައިޝަތު ޝެހެނާޒް އާދަމް އަދި އަލްފާޟިލާ އައިޝަތު ޝާހީން އިސްމާއިލް ބައިވެރިވެފައިވެއެވެ. މީގެ އިތުރުން، ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދާއި، އެމް.އެން.ޔޫގެ ޑިރެކްޓަރ އޮފް ބިޒްނަސް ޑެވެލޮޕްމެންޓް އަލްފާޟިލާ ހިދާޔާ މޫސާ އަދި އެމް.އެން.ޔޫ މަރކެޓިންގެ ބޭފުޅުން ވަނީ ބައިވެރިވެފައެވެ. އަދި އެމް.އެން.ޔޫ.އެސް.ޔޫގެ ހިންގާ ކޮމިޓީ މެމްބަރުންނާއި ގޮފިތަކުގެ ހިންގާ ކޮމިޓީ މެމްބަރުންގެ އިތުރުން އެމް.އެން.ޔޫ.އެސް.ޔޫ ލީޑަރސް ގުރުޕްގެ މެމްބަރުން ހިމެނޭ ގޮތަށް 30 އަށްވުރެ ގިނަ ދަރިވަރުން ވަނީ ބައިވެރިވެފައެވެ. މި 30 ދަރިވަރުންގެ ތެރޭގައި އެމް.އެން.ޔޫގެ ހުރިހާ ފެކަލްޓީތަކެއްގެ ދަރިވަރުން ހިމެނެއެވެ.
ދިގު މުއްދަތުގެ ލަނޑުދަނޑިތަކެއް ކާމިޔާބު ކުރުމައްޓަކާ އެކުލަވާލެވޭ މިޕްލޭންގައި ދަރިވަރުން ހިއްސާ ކުރުމުގެ މައިގަނޑު މަގްސަދަކީ ކަނޑައެޅިފައިވާ ލަނޑުދަނޑިތަކަށާއި، ޖުމްލަކޮށް މުޅި ޕްލޭނަށް ދަރިވަރުންގެ ލަފަޔާއި ޚިޔާލު ހޯދުމެވެ. ހަމައެހެންމެ، ހެދިފައިވާ ޕްލޭންގައި ދަރިވަރުންގެ ކަންބޮޑުވުންތަކާއި، ދިމާވާ މައްސަލަތައް ދެނެގަނެވި އެކަމަށް ހައްލު ހޯދުމެވެ.
ލިޔުނީ: އާމިނަތު ހަމީޒާ އަޙްމަދު
ސެކްރެޓަރީ، އެމް.އެން.ޔޫ.އެސް.ޔޫ
