ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންއިން 1441 ވަނަ އަހަރުގެ ރަމަޟާން މަހުގެ ހަރަކާތްތައް ތަފާތު ގޮތަކަށް ބާއްވައިފިއެވެ.
މުޅި ދުނިޔެއަށް ދިމާވެފައިވާ ކޯވިޑް-19 ގެ ބަލިމަޑުކަމުގެ ސަބަބުން، އެމް.އެން.ޔޫގެ ކިޔެވުން ހުއްޓާލުމާ ގުޅިގެން އެމް.އެން.ޔޫ.އެސް.ޔޫ އިން ރޯދަމަހު ބާއްވަމުން އަންނަ ހަރަކާތްތަކަށްވެސް ބޮޑެތި ބަދަލުތަކެއް ވަނީ އައިސްފައެވެ. އެހެންކަމުން 1441 ވަނަ އަހަރުގެ ރަމަޟާން މަހުގައި ވަނީ މުޅިން ތަފާތު ގޮތަކަށް ހަރަކާތްތައް ކުރިޔަށް ގެންދެވިފައެވެ.
އެމް.އެން.ޔޫ.އެސް.ޔޫއިން މި ރަމަޟާންމަހުގައި މައިގަނޑު 3 ހަރަކާތެއް ހިންގައިފައިވެއެވެ. މި ހުރިހާ ހަރަކާތަކީވެސް އޮންލައިންކޮށް މީސްމީޑިއާގައިި ކުރިއަށް ގެންދެވިފައިވާ ހަރަކާތްތަކެވެ. އެގޮތުން އެމް.އެން.ޔޫ.އެސް.ޔޫގެ ފޭސްބުކް ޕޭޖް، އިންސްޓަގްރާމް އަދި ޓުވިޓަރ މެދުވެރިކޮށް ”ޑެއިލީ އިންސައިޓްސް“ ގެ ނަމުގައި އިނގިރޭސި ބަހުން ދީނީ މައުލޫމާތު ޙިއްސާ ކުރެވިފައިވެއެވެ. އަދި އެމް.އެން.ޔޫ.އެސް.ޔޫގެ ފޭސްބުކް ޕޭޖް، އިންސްޓަގްރާމް އަދި ޓުވިޓަރ މެދުވެރިކޮށް ”ޙިކުމަތުގެ ބަސް“ ގެ ނަމުގައި ދިވެހި ބަހުން ދީނީ މައުލޫމާތު ޙިއްސާ ކުރެވިފައިވެއެވެ. މީގެ އިތުރުން އެމް.އެން.ޔޫ.އެސް.ޔޫގެ އިންސްޓަގްރާމް ޕޭޖް މެދުވެރިކޮށް ”ދުވަހުގެ ސުވާލު“ ގެ ނަމުގައި ދީނީ ކުއިޒް އެއް ހިންގުނެވެ. އަދި ރަމަޟާން މަހުގެ ފަހު ދިހައިގައި ވަނީ ”ހެޔޮ ޢަމަލުތައް ކުރުމުގައި ދެމިހުރުން“ ނަމުގައި ދީނީ ދަރުހެއް އެމް.އެން.ޔޫ.އެސް.ޔޫގެ ފޭސްބުކް ޕޭޖްއިން ގެނެސްދީފައެވެ.
ޙިކުމަތުގެ ބަސް ޑެއިލީ އިންސައިޓްސް
މި ހަރަކާތްތައް އެމް.އެން.ޔޫ.އެސް.ޔޫއިން އިންތިޒާމުކޮށްގެން ބޭއްވިފައިވަނީ ވަކި ބަޔަކަށް އަމާޒުނުކޮށް އެންމެނަށް ހުޅުވާލައިގެންނެވެ. އަދި ”ޑެއިލީ އިންސައިޓްސް“، ”ޙިކުމަތުގެ ބަސް“ އަދި ”ދުވަހުގެ ސުވާލު“ ކޮންމެ ދުވަހަކު ޙިއްސާ ކުރެވިފައިވެއެވެ.
މުޅި ދުނިޔެއަށް ކުރިމަތިވެފައިވާ ކޯވިޑް-19 ގެ ބަލިމަޑުކަމުގެ ސަބަބުން، ރަމަޟާން މަހުގައި ބާއްވަމުން އަންނަ ”އެމް.އެން.ޔޫ.އެސް.ޔޫ ދީނީ ސުވާލު މުބާރާތް“ މިއަހަރު ކުރިއަށް ނުގެންދިއުމަށް ނިންމުނީ އެމް.އެން.ޔޫގެ ގިނަ އަދަދެއްގެ ދަރިވަރުން ދަރުމަވެރިންގެ ގޮތުގައި މާލެއާއި އެކި އަތޮޅުތަކުގައި ހަރަކާތްތެރިވަމުންދާތީ، ގިނަ ދަރިވަރުންނަށް ބައިވެރިނުވެވޭ ގޮތަށް އެއްވެސް ހަރަކާތެއް ހިންގަން ދަރިވަރުންގެ ޔޫނިއަންއިން ބޭނުންނުވާތީއެވެ.
އެމް.އެން.ޔޫ.އެސް.ޔޫ އިން ދީނީ މިފަދަ ޙަރަކާތްތައް އިންތިޒާމު ކުރުމުގެ ބޭނުމަކީ، މި ޔޫނިއަންގެ މެންބަރުންނަކީ ދީނަށް ލޯބި ކުރާ އަހުލާޤު ރަނގަޅު ބަޔަކަށް ހެދުމެވެ. އަދި ވާދަވެރި މާހައުލެއްގައި އެކުވެރިކަމާއެކު ދީނީ ޝިޢާރުތައް ޤާއިމު ކުރާ ބަޔަކަށް ހެދުމެވެ.
ލިޔުނީ: މުޙައްމަދު އަޙުނަފް
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
