2020 ވަނަ އަހަރުގެ އެމް.އެން.ޔޫ ދަރިވަރުންގެ ޔޫނިއަންގެ 2 ވަނަ ލީޑަރުންގެ ބައްދަލުވުން ވަރޗުއަލްކޮށް ކުރިއަށް ގެންގޮސްފިއެވެ. މި ބައްދަލުވުން ބާއްވާފައިވަނީ 2020 ވަނަ އަހަރުގެ އޯގަސްޓް 8 ވީ ހޮނިހިރު ދުވަހު ގޫގުލް މީޓް މެދުވެރިކޮށެވެ.
މި ބައްދަލުވުމުގައި ޖުމްލަ 13 ލީޑަރުން ބައިވެރިވެފައިވާއިރު، ޔޫނިއަން ހިންގާ ކޮމިޓީގެ ބައެއް މެމްބަރުން ބައިވެރިވެފައިވެއެވެ. އަދި ޙާއްސަކޮށް ޔޫނިއަންގެ އެޑްވައިޒަރީ ބޯޑުގެ މެމްބަރުން މި ބައްދަލުވުމުގައި ބައިވެރިވެވަޑައިގަތުމީ ބައްދަލުވުން އިތުރަށް ފުރިހަމަވެގެންދިޔަ ސަބަބެއްކަމުގައިވިއެވެ.
މި ބައްދަލުވުމުގައި ފުރަތަމަ ކުރިއަށް ގޮސްފައިވަނީ ޔޫނިއަން ހިންގާ ކޮމިޓީގެ މެމްބަރުންނާއި އެޑްވައިޒަރީ ބޯޑުގެ މެމްބަރުންގެ ތައާރަފްވުމެވެ. އެއަށްފަހު އައު ލީޑަރުން ތަޢާރަފުވުމާއެކު، އެ ލީޑަރުންގެ ބައެއް ޝުޢޫރުތައްވެސް ވަނީ ހިއްސާ ކޮށްފައެވެ.
އިސް ލީޑަރުން ނުވަތަ ކުރީގެ ލީޑަރުންގެ ޝުޢޫރަކީ މިފަދަ އައު ލީޑަރުންނަށް އެތަކެއް ހިތްހަމަޖެހުމެއް ނުވަދަ އުންމީދެއް ގެނުވާނެ ކަމާމެދު ޝައްކެއް ނެތެވެ. މި ބައްދަލުވުމަގައި 3 އިސް ލީޑަރުން ކަމުގައިވާ ސެންޓަރ ފޯ ފައުންޑޭޝަންގެ ދަރިވަރު ހައްވާ ލައިލާ ލުޠުފީ، ސެންޓަރ ފޯ ފައުންޑޭޝަންގެ ދަރިވަރު އަޙްމަދު ވިޝާހް އަދި ސްކޫލް އޮފް ނަރސިންގ ގެ ދަރިވަރު ފާތިމަތު ޝަމްހާ ޢަލީ ބައިވެރިވެ އައު ލީޑަރުންނާ ވަނީ ބައެއް ތަޖުރިބާތައް ހިއްސާ ކޮށްފައެވެ. މި ލީޑަރުންެ ވާހަކައިގަވެސް ދަރިވަރުންގެ ޔޫނިއަންގައި ދަރުމަވެރި މަސައްކަތް ކުރުމަކީ ވަރަށް ގިނަ ހުނަރާއި ތަޖުރިބާ ލިބޭނެ ކަމެއް ކަމުގައި ހިއްސާކުރިއެވެ. އަދި އެމް.އެން.ޔޫ ދަރިވަރުންގެ ޔޫނިއަންއަކީ އެއް އާއިލާއެއްކަމަށް ސިފަކުރިއެވެ.
ބައްދަލުވުމުގައި ދެން ކުރިއަށް ގޮސްފައިވަނީ ދަރިވަރުންގެ ޔޫނިއަންގެ ރައީސް ޝަމްޢޫންގެ ވާހަކަފުޅު ދެއްކެވުމެވެ. ޝަމްޢޫންގެ ވާހަކަފުޅުގައި ލީޑަރސް ގްރޫޕަކީ ތަފާތު އެކި ފުރުސަތުތައް ލިބިގެންދާނެ ގްރޫޕެއްކަން ފާހަގަކުރެއްވިއެވެ. މީގެ ތެރޭގައި ނޭޝަނަލް ލެވެލް އިން ފެށިގެން އިންޓަނޭޝަލް ލެވެލްގެ ހަރަކާތްތަކުގައި ވެސް ބައިވެރިވާން ފުރުސަތު ލިބޭނެ ކަމަށް ވިދާޅުވިއެވެ.
އެއަށްފަހު އެޑްވައިޒަރީ ބޯޑުގެ މެމްބަރުންކަމުގައިވާ ޔޫނިއަންގެ 6 ވަނަ ދައުރުގެ ރައީސް ޢަރުޝަދު ޢަޝްރަފް، ޔޫނިއަންގެ 7 ވަނަ ދައުރުގެ ރައީސް މުޙައްމަދު ޝާން އާމިރު، ނައިބު ރައީސް (ޢަމަލީ) ޙަސަން ޝާހު އަދި ނައިބު ރައީސް (ޢިލްމީ) އާދަމް ރުޝްދީ ވަނީ ބައްދަލުވުމުގައި ވާހަކަފުޅު ދައްކަވާފައެވެ.
ޢަރުޝަދުގެ ވާހަކަފުޅުގައި، މިއަހަރަކީ އެންމެނަށްވެސް ޗެލެންޖިންގ އަހަރެއްކަމާއި އެހެނަސް ކިޔެވުމަށް އިސްކަންދިނުމަށް ނަސޭޙަތްރެރިވިއެވެ. އަދި ކުއްޖާ ކުރިއެރުމަށް ލިބޭ ފުރުސަތުތަކުގެ ބޭނުން ހިފައި ކުރިއަށް ނިކުތުމަކީ ކުއްޖާ އަށް ލިބިގެންދާނެ ކުރިއެރުމެއްކަމާއި އެހެން ފަރާތަކާ ހެދި ކުއްޖާއަށް ލިބޭ ފުރުސަތުތަށް ދޫކޮށް ނުލުމަށް ވެސް ވަނީ ނަސޭހަތްތެރިވެވަޑައިގެންފައެވެ. އަދި ރަނގަޅު ފުރިހަމަ މަސައްކަތެއް ކުރެވޭނީ ކިޔެވުމާއެކު އިތުރު ހަރަކާތްތަކުގައި ވެސް ބައިވެރިވެގެންކަމަށް ވިދާޅުވިއެވެ.
ޝާން އަދި ޝާހުގެ ވާހަކަފުޅުގައި ދަރިވަރުން ކިޔަވަމުންދާ ކޯހުގެ މައްސަލައެއް ކުރިމަތިވެއްޖެނަމަ މީސް މީޑިއާއަށް އެ މައްސަލަ ޙިއްސާ ނުކޮށް އެންމެ ފުރަތަމަ ކަމަކަށްވެސް ދަރިވަރުންގެ ޔޫނިއަންއާ މައްސަލަ ޙިއްސާ ކުރުމަށް ނަސޭޙަތްތެރިވެވަޑައިގަތެވެ. އަދި ގަވާއިދުން ލީޑަރސްގެ ވައިބަރ ގްރޫޕްތައް ބެލުމަށް ޝާން އިރުޝާދުދެއްވިއެވެ.
ބައްދަލުވުމުގެ އެންމެ ފަހު ނަމްބަރެއްގެ ގޮތުން ކުޑަ ގޭމް އެއް ކުރިއަށް ގެންދެވުނެވެ. މިފަދަ ގޭމް ތަކަކީ ލީޑަރުންގެ މެދުގައި އެއްބައިވަންތަކަމާއި އުފާވެރި މާހައުލެއް ބޭއްވުމަށް ކުރެވޭ މަސައްކަތްތަކެވެ.
އެމް.އެން.ޔޫ.އެސް.ޔޫ ލީޑަރސް ގްރޫޕަކީ އެމް.އެން.ޔޫ.އެސްޔޫގެ ޙަރަކާތްތަކުގައި އިސްވެ އުޅުމަށް ޝަޢުޤުވެރިވާ ދަރިވަރުންނަށް އަމާޒުކޮށް 2018ވަނަ އަހަރު ހަދާފައިވާ ގްރޫޕެކެވެ. މި ގްރޫޕަށް ވަނުމަށް އެމް.އެންޔޫގެ ކޮންމެ ދަރިވަރަކަށްވެސް ފުރުސަތު އޮތްއިރު، ހަމަ އެކަނި ކޮއްލަންޖެހޭނެ ކަމަކީ އެމް.އެން.ޔޫ.އެސް.ޔޫގެ އޮފީހަށް ދުރުވެ، ނަންނޯޓުކޮށްލުމާއެކު ފޯމެއް ފުރާލުމެވެ. ނަމަވެސް، މިހާރުގެ ޙާލަތު ތަން ނުދިނުމުގެ ސަބަބުން މިކަންކަން ކުރެވެމުން ދަނީ އޮންލައިންކޮށްކަން ފާހަގަކުރަމެވެ.
ލިޔުނީ: މުޙައްމަދު އަޙްނަފް
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
