ދިވެހިރާއްޖޭގެ ޤައުމީ ޔުނިވަރސިޓީގެ ގަމު އަދި ހިތަދޫ ކެމްޕަހުގައި ޤާއިމް ކޮށްފައިވާ އެމް.އެން.ޔޫ ދަރިވަރުންގެ ޔޫނިއަންގެ 2 ގޮފި ކަމުގައިވާ އަހުރަ އާއި ދޮންދީނި ގޮތްޕާ އެމް.އެން.ޔޫ.އެސް.ޔޫ ބައްދަލުކޮށްފިއެވެ.
މި ބައްދަލުވުމުގައި އަހުރަ އަދި ދޮންދީނި ހިންގާ ކޮމިޓީގެ އިތުރުން ދަރިވަރުންގެ ޔޫނިއަންގެ ހިންގާ ކޮމިޓީއާއި އެޑްވައިޒަރީ ބޯޑުގެ މެމްބަރުން ވަނީ ބައިވެރިވެފައެވެ. ބައްދަލުވުން ކުރިއަށް ގޮސްފައިވަނީ 2020 ވަނަ އަހަރުގެ އޮގަސްޓް މަހުގެ 29 ވީ ހޮނިހިރު ދުވަހުގައެވެ. އަދި ބައަދަލުވުން ބޭއްވުނީ ގޫގުލް މީޓް މެދުވެރިކޮށެވެ.
ބައްދަލުވުމުގެ ފުރަތަމަ ކަމަކަށް ޔޫނިއަންގެ ފަރާތުން ދަރިވަރުންގެ ޔޫނިއަންގެ ނައިބު ރައީސް(ގޮފިތައް) ޢަބްދުﷲ ޝަހުނީޒް ބައިވެރިންނާ މުޚާތަބުކޮށް ވަނީ ބައްދަލުވުން ކުރިއަށް ދާނެ ގޮތް ހިއްސާ ކޮށްފައެވެ. އަދި ޔޫނިއަން ހިންގާ ކޮމިޓީއާއި ޔޫނިއަންގެ އެޑްވައިޒަރީ ބޯޑުގެ ބައެއް މެމްބަރުން ވެސް ބައްދަލުވުމުގައި ބައިވެރިންނާ ވާހަކަދައްކަވާފައިވެއެވެ.
ބައްދަލުވުމުގައި އަހުރަ އަދި ދޮންދީނި ގޮފީގެ ހިންގާ ކޮމިޓީގެ މެމްބަރުންނަށް ޔައުމިއްޔާ ލިޔާނެ ގޮތް ތަފްސީލުކޮށް ޔޫނިއަންގެ ސެކްރެޓަރީ އައިމިނަތު ހަމީޒާ އަޙްމަދު ކިޔައިދެއްވާފައިވާއިރު، ޚަޒާންދާރެއްގެ މަސްޢޫލިއްޔަތު އަދާކުރާނެ ގޮތް ވަރަށް ތަފްސީލުކޮށް ޔޫނިއަންގެ ޚަޒާންދާރު ހުސައިން ޒައިދް ކިޔައިދެއްވިއެވެ. އަދި މީޑިއާ ހިންގާނެ ގޮތާއި މީޑިއާގެ ބައެއް މުހިންމު މައުލޫމާތު ޔޫނިއަންގެ މީޑިއާ ކޯޑިނޭޓަރ ހިއްސާކުރެއްވިއެވެ.
އެއަށްފަހު، ދޮންދީނި އަދި އަހުރަ ގޮފީގެ ހިންގާ ކޮމިޓީގެ ބައެއް މެމްބަރުން ވާހަކަދެއްކެވިއެވެ. އެގޮތުން ދިމާވާ ދަތިތަކާއި މިއަހަރު ކުރިޔަށް ހިންގަން ރާވައިފައިވާ ހަރަކާތްތަކުގެ ވާހަކަ ހިއްސާ ކުރެއްވިއެވެ.
މި ބައްދަލުވުމަކީ މިއަހަރު ކެމްޕަހުގެ ގޮފިތަކާއެކު ބޭއްވުނު ފުރަތަމަ ބައްދަލުވުމެވެ. މީގެ ކުރިން މިއަހަރު ވަނީ މާލޭ ކެމްޕަހުގެ ގޮފިތަކާ އެކު 2 ބައްދަލުވުމެއް ބޭއްވިފައެވެ.
ލިޔުނީ: މުޙައްމަދު އަޙްނަފް
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
