ދިވެހިރާއްޖޭގެ ޤައުމީ ޔުނިވަރސިޓީގެ ޑީން އޮފް ސްޓޫޑެންޓްސް ”އަހުރަ“ އަދި ”ދޮންދީނި“ ގޮތްޕާ ބައްދަލުކުރައްވައިފިއެވެ.
ކެމްޕަސްތަކުގައި ހިންގޭ ހަރަކާތްތަކުގައި އެ ކެމްޕަހުގައި ކިޔަވަމުންދާ ދަރިވަރުންގެ ބައިވެރިވުމަކީ ވަރަށް މުހިންމު ކަމެކެވެ. އެގޮތުން މި 2 ކެމްޕަހުގައި ވެސް ގޮފިތަކުން މިއަހަރު ހިންގުމަށް ހަމަޖައްސާފައިވާ ހަރަކާތްތަކާއި ހިންގިފައިވާ ހަރަކާތްތަކުގެ ތަފްސީލު ވަނީ ޑީން އޮފް ސްޓޫޑެންޓްސް އާ ހިއްސާ ކުރައްވާފައެވެ. އަދި ކެމްޕަސްތަކުގައި ހިންގިދާނެ ބައެއް ހަރަކާތްތަކާ ގުޅޭގޮތުން ޑީން އޮފް ސްޓޫޑެންޓްސް ނާދިޔާ އަހްމަދު ވަނީ އަހުރަ އަދި ދޮންދީނި ގޮތްޕަށް އިރުޝާދުދެއްވާފައެވެ.
މި ބައްދަލުވުމުގައި 2 ކެމްޕަހުގައި ކިޔަވަމުން ގެންދާ ދަރިވަރުންނަށް ހުރި ގޮންޖެހުންތައް އެދަރިވަރުން ވަނީ ޑީން އޮފް ސްޓޫޑެންޓްސް އާ ހިއްސާ ކޮށްފައެވެ. ވަކިން ޙާއްސަކޮށް އޮންލައިން ކޮށް ކްލާސްތައް ގެންދާއިރު ދިމާވާ ދަތިދައް ވެސް ވަނީ ހިއްސާ ކޮށްފައެވެ.
މި 2 ބައްދަލުވުމުގައި، ސެލްފްސަރވިސް ބޭނުންކުރާނެ ގޮތާއި ރެޖިސްޓްރޭޝަން ފުރިހަމަ ކުރާނެ ގޮތް ދަރިވަރުންނަށް ކިޔައިދެއްވާފައިވެއެވެ. އަދި އެމް.އެން.ޔޫގެ ކޮންމެ ކަމެއްގައި ވެސް ކުރިއަށް ދާންވީ ގޮތް ކިޔައިދެއްވާފައިވެއެވެ. ކިތަންމެ ބޮޑު މައްސަލައެއް ކުރިމަތިވިޔަސް ހައިރާކީ އަށް ޢަމަލު ކުރުމަށް ނާދިޔާ މިސް ނަސޭޙަތްތެރިވިއެވެ.
ކޮންމެ ދަރިވަރަކީވެސް ޔުނިވަރސިޓީއަށް އަހުރުލުވެރި ވެފައިވާ ދަރިވަރަކަށް ވުމަކީ މުހިންމު ކަމެކެވެ. އެގޮތުން ކެމްޕަހުންނާއި އެމް.އެން.ޔޫ އިން ދަރިވަރުންނާ ހިއްސާކުރާ މެއިލްތައް ގަވާއިދުން ބެލުމަށާއި ކޮންމެ މައްސަލައެއް ދިމާވިއަސް ކޯޑިނޭޓަރ އާ ނުވަތަ ޔުނިވަރސިޓީއާ ހިއްސާ ކުރުމަށް ވިދާޅުވިއެވެ.
މި 2 ބައްދަލުވުން ކުރިޔަށް ގޮސްފައިވަނީ 3 ސެޕްޓެމްބަރ 2020 ވީ ބުރާސްފަރި ގޫގުލް މީޓް މެދުވެރިކޮށެވެ. އަހުރަ އަދި ދޮންދީނި މެމްބަރުންގެ އިތުރުން ދަރިވަރުންގެ ޔޫނިއަންގެ ހިންގާ ކޮމިޓީގެ ބައެއް މެމްބަރުންވެސް ވަނީ ބައިވެރިވެވަޑައިގެންފައެވެ.
ދޮންދީނި ގޮތްޕަކީ އެމް.އެން.ޔޫ ހިތަދޫ ކެމްޕަހުގައި ޤާއިމްކޮށްފައިވާ އެމް.އެން.ޔޫ.އެސް.ޔޫގެ ގޮތްޕެވެ. އަދި އަހުރަ ގޮތްޕަކީ އެމް.އެމް.ޔޫ ގަމު ކެމްޕަހުގައި ޤާއިމްކޮށްފައިވާ އެމް.އެން.ޔޫ.އެސް.ޔޫގެ ގޮތްޕެެވެ.
ލިޔުނީ: މުޙައްމަދު އަޙްނަފް
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
