ދިވެހިރާއްޖޭގެ ޤައުމީ ޔުނިވަރސިޓީގެ މެނޭޖްމަންޓާއެކު ދަރިވަރުންގެ ޔޫނިއަން އިން އޮލިމްޕިކް ކޮމިޓީގެ ޖެނެރަލް ސެކްރެޓަރީ އަލްފާޟިލް އަޙްމަދު މަރްޒޫޤު އާއި ބައްދަލުކުރައްވައިފިއެވެ.
އޮލިމްޕިކް ކޮމިޓީގެ ޖެނެރަލް ސެކްރެޓަރީގެ އިތުރުން ކޮމަންވެލްތު ގޭމްސް ފެޑެރޭޝަންގެ ސްޕޯޓްސް ކޮމިޓީގެ މެންބަރު އަދި އޮލިކްޕިކް ކައުންސިލް އޮފް އޭޝިއާގެ މީޑިއާ ކޮމިޓީ މެންބަރުކަންވެސް އަދާކުރައްވާ މަރްޒޫޤު (މަރޭ) އާއެކު ބޭއްވުނު މި ބައްދަލުވުމުގައި އެމް.އެން.ޔޫގެ ވައިސް ޗާންސެލަރ ޑރ. މުޙައްމަދު ޝަރީފް، ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް، ވައިސް ޗާންސެލަރ އަލްފާޟިލާ ޢާއިޝަތު ޝާހީން އިސްމާޢީލް، ވައިސް ޗާންސެލަރ އަލްފާޟިލް ޙުސައިން ޙަލީމް، ޑީން އޮފް ސްޓޫޑެންޓްސް އަލްފާޟިލާ އާޝިޔާ ލީލާ އަޙްމަދު ވަނީ ބައިވެރިވެވަޑައިގެންފައެވެ.
”ގިނަ އެތުލީޓުން ކުޅިވަރުގެ ޙަޔާތް ނިމުމަށްފަހު ނުވަތަ ”ލައިފް އާފްޓާ ސްޕޯޓްސް“ގައި މި ތިބެނީ ކުރާނެ ކަމެއް ނޭނގިފަ. މިކަން ބަދަލުކުރުމަށް ޔުނިވަރސިޓީއަށް މުޙިއްމު މަސައްކަތްތަކެއް ކުރެވިދާނެ!“
– އޮލިމްޕިކް ކޮމިޓީގެ ޖެނެރަލް ސެކްރެޓަރީ އަޙްމަދު މަރްޒޫޤް
ދަރިވަރުންގެ ޔޫނިއަންގެ ފަރާތުން ޔޫނިއަންގެ ނައިބު ރައީސް (ގޮފިތައް) ޢަބްދުﷲ ޝަހުނީޒް، ސެކްރެޓަރީ އާމިނަތު ޙަމީޒާ އަޙްމަދު ބައިވެރިވެލެއްވިއިރު، އެމް.އެން.ޔޫ ކައުންސިލްގައި ދަރިވަރުން ތަމްސީލު ކުރައްވާ މެންބަރު އަލްފާޟިލް އިބްރާހިމް ޣާނިމް ޝާހިދުވަނީ ބައިވެރިވެލައްވާފައެވެ. މީގެ އިތުރުން ދަރިވަރުންގެ ޔޫނިއަންގެ އެޑްވައިޒަރީ ބޯޑުގެ މެންބަރުންކަމަށްވާ އަރުޝަދު އަޝްރަފް އަދި މުޙައްމަދު ޝާން ޢާމިރު ވެސް ވަނީ މި ބައްދަލުވުމުގައި ބައިވެރިވެލައްވާފައެވެ.
އެމް.އެން.ޔޫގެ ކޮންފަރެންސް ރޫމުގައި ކުރިއަށްދިޔަ މި ބައްދަލުވުމުގައި އަލްފާޟިލް މަރްޒޫޤް އަޙްމަދު (މަރޭ) ވަނީ ވަރަށް ގިނަ ކަންކަން ފާހަގަ ކުރައްވާފައެވެ. މިގޮތުން އެތުލީޓުން އެމް.އެން.ޔޫ އަށް ޝައުޤުވެރިކޮށް ވެއްދުމަށް މަސައްކަތްކުރުމަކީ މުޙިއްމު ކަމެއްގެ ގޮތުގައި މަރޭ ވަނީ ފާހަގަކުރައްވާފައެވެ. އަދި ޚާއްޞަކޮށް އެތުލީޓުންގެ ”ލައިފް އާފްޓާ ސްޕޯޓްސް“ ނުވަތަ ކުޅިވަރުން ރިޓަޔާވުމަށްފަހު އެތުލީޓުންގެ ޙަޔާތުގައި ކުރާނެ ކަމެއް ނެތި ހުންނަންޖެހޭ ފަހަރުތައް އަންނަކަމަށާއި، މިފަދަ އެތުލީޓުންނަށް ޔުނިވަރސިޓީގެ ދޮރުތައް ހުޅުވާލައި، އެ ފަރާތްތަކަށް ކިޔެވުމުގެ ފުރުޞަތު ފަހިކޮށްދިނުމުގެ އިތުރުން އެ ފަރާތްތަކާ ގުޅިގެން ތަފާތު ގިނަ ކާމިޔާބު މަސައްކަތްތަކެއް ކުރެވިދާނެކަން މަރޭ ފާހަގަކުރެއްވިއެވެ.
ހަމަ އެހެންމެ، އެމް.އެން.ޔޫ ދަރިވަރުންގެ ޔޫނިއަންގައި ކުލަބްތައް އުފެއްދުމަށް އަމިއްލަ ޙައިޞިއްޔަތުން އެހީތެރިކަން ދިނުމާއި އަދި އޮލިމްޕިކް ކޮމިޓީގެ ފަރާތުން އެހީތެރިކަން ހޯދުމަށް މަސައްކަތްކޮށްދެއްވާނެކަމަށް މަރޭ ވަނީ ވިދާޅުވެފައެވެ. މީގެ އިތުރުން ކޮލެޖް ޔުނިވަރސިޓީތަކުގެ ސްޕޯޓްސް އެސޯސިއޭޝަންއެއް އުފެއްދުމަކީ ވަރަށް މުޙިއްމުކަމެއްގެ ގޮތުގައި އެބޭފުޅާ ވަނީ ފާހަގަކުރައްވާފައެވެ.
އަދި ހަމަ އެހެންމެ، އިންޓަނޭޝަނަލް ޔުނިވަރސިޓީ ސްޕޯޓްސް ފެޑެރޭޝަންގެ ވޯލްޑް ގޭމްސްގައި ފުރުޞަތުތައް އޮތްކަމާއި، އެ ފެޑެރޭޝަންގެ މެންބަރުކަން ލިބިއްޖެނަމަ ލިބިގެންދާނެ ތަފާތު ފައިދާތަކުގެ ތަފްޞީލުވެސް މަރޭވަނީ ފާހަގަކުރައްވާފައެވެ.
މި ބައްދަލުވުމުގައި އެމް.އެން.ޔޫގެ ވައިސް ޗާންސެލަރ ޑރ. މުޙައްމަދު ޝަރީފް ވަނީ މަރޭއަށް މަރުޙަބާ ވިދާޅުވެ، މަރޭ އަދި އޮލިމްޕިކް ކޮމިޓީއާއެކު މަސައްކަތްކުރުމަށް އެމް.އެން.ޔޫ ތައްޔާރަށް އޮތް ކަމަށް ހާމަކުރައްވާފައެވެ. އަދި މިފަދަ ބައްދަލުވުމެއްގައި ބައިވެރިވެދެއްވިކަމަށްޓަކައި މަރޭއަށް ޝުކުރު އަދާކުރެއްވިއެވެ.
މި ބައްދަލުވުމުގައި ވާހަކަ ދައްކަވަމުން ވައިސް ޗާންސެލަރ އަލްފާޟިލް ޙުސައިން ޙަލީމް ފާހަގަކުރެއްވި ގޮތުގައި ދަރިވަރުންގެ ޔޫނިއަން އަކީ މިހާރުވެސް ވަރަށް ފުރިހަމަ މަސައްކަތްތަކެއް ކުރައްވަމުންދާ ޔޫނިއަންއެއްކަމަށާއި، އަދި ކްލަބްތައް އުފެއްދުމަކީ ދެމެހެއްޓެނިވި ގޮތެއްގައި ކުޅިވަރު ޙަރަކާތްތައް ކުރިއަށް ގެންދިއުމަށް ކޮށިގެންދާނެ މަގެކެވެ.
ސެޕްޓެންބަރ 17ވީ ބުރާސްފަތިދުވަހުގެ މެންދުރު 1200ގައި ބޭއްވުނު މި ބައްދަލުވުމުގައި ވާހަކަފުޅު ދައްކަވަމުން އެމް.އެން.ޔޫ ޑީން އޮފް ސްޓޫޑެންޓްސް އަލްފާޟިލާ އާޝިޔާ ލީލާ އަޙްމަދު ވިދާޅުވީ ދަރިވަރުންގެ ޔޫނިއަންއިން ކްލަބް އުފެއްދުމުގެ މަސައްކަތްތައް ފަށާފައިވާކަމަށާއި، ކުޑަދުވަސްކޮޅެއްގެ ތެރޭގައި ހުރިހާ ކަމެއް ފައިނަލް ކުރެވިގެންދާނެކަމަށެވެ. އަދި ކުޅިވަރު ޙަރަކާތްތަކާއި ޢިލްމީ ޙަރަކާތްތައް ހަމަހަމަކޮށް ހިންގުމަށް އިތުރަށް ސަމާލުކަން ދޭނެ ވާހަކަވެސް ވަނީ ފާހަގަކުރައްވާފައެވެ.
މި ބައްދަލުވުމުގައި ޔޫނިއަންގެ ފަރާތުން ވާހަކަ ދައްކަވަމުން އެޑްވައިޒަރީ ބޯޑުގެ މެންބަރު އަރުޝަދު އަޝްރަފް ފާހަގަކުރެއްވި ގޮތުގައި އެމް.އެން.ޔޫގެ ދަރިވަރުންނަކީ ޔުނިވަރސިޓީ ލެވެލްގައާއި ޤައުމީ ލެވެލްގައި ގިނަ ޙަރަކާތްތަކެއް ރާވާ، އިންތިޒާމުކުރުމުގައި ޙަރަކާތްތެރިވެފައިވާ ދަރިވަރުންނެވެ. އަދި ކްލަބް އުފެއްދުމުގައި އޮލިކްޕިކް ކޮމިޓީގެ ސެކްރެޓަރީ ޖެނެރަލްގެ އިރުޝާދުތަކަކީ ވަރަށް މުޙިއްމު އިރުޝާދުތަކެއް ކަމަށާއި، އޮލިމްޕިކް ކޮމިޓީއާއެކު މަސައްކަތްކުރުމަށް ދަރިވަރުންގެ ޔޫނިއަން އޮތީ ތައްޔާރަށްކަމަށްވެސް ވަނީ ވިދާޅުވެފައެވެ.
ލިޔުނީ: ޢަބްދުﷲ އަތޫފް އާތިފް،
އެމް.އެން.ޔޫ.އެސް.ޔޫ މީޑިއާ
އެމް.އެން.ޔޫ.އެސް.ޔޫގެ ރަސްމީ މީޑިއާ ޕްލެޓްފޯމްތައް:
