އެމް.އެން.ޔޫ ދަރިވަރުންގެ ޔޫނިއަންގެ 9 ވަނަ ދައުރުގެ ރައީސަކަށް ޝަހުނީޒް އިންތިޚާބުވެވަޑައިގެންފި

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން(އެމް.އެން.ޔޫ.އެސް.ޔޫ) ގެ ހިންގާ ކޮމެޓީ އިންތިހާބު ކާމިޔާބު ކުރައްވާ 9 ވަނަ ދައުރުގެ ރައީސަކަށް ޢަބްދުﷲ ޝަހުނީޒް އިންތިހާބުވެވަޑައިގަންނަވައިފި އެވެ.

އެމް.އެން.ޔޫ.އެސް.ޔޫގެެ 9 ވަނަ ދައުރުގެ ހިންގާ ކޮމިޓީ އިންތިހާބުގެ ނަތީޖާ ފާޅުކޮށްފައިވަނީ 20 ސެޕްޓެމްބަރ 2020 ވަނަ ދުވަހު އިންތިޚާބު ކޮމިޓީންނެވެ.

އެމް.އެން.ޔޫ ދަރިވަރުންގެ ޔޫނިއަންގެ ހިންގާ ކޮމެޓީއަށް ކުރިމަތިލުމަށް އިޢުލާން ކޮށްފައިވަނީ 06 ސެޕްޓެމްބަރ 2020 ވަނަ ދުވަހުން 17 ސެޕްޓެމްބަރ 2020 ވަނަ ދުވަހުގެ ނިޔަލަށެވެ. އަދި މި މުއްދަތު ހަމަވިއިރު ހިންގާ ކޮމެޓީއަށް ކުރިމަތި ލައްވާފައިވަނީ ކޮންމެ މަޤާމަކަށް ވެސް އެންމެ ކެނޑިޑޭޓެކެވެ. އެހެންކަމުން، އެ މަޤާމުތަކަށް ކުރިމަތިލި މެންބަރުން ވަނީ މަޤާމަށް އިންތިޚާބުވެފައެވެ.

ދަރިވަރުންގެ ޔޫނިއަންގެ 9 ވަނަ ދައުރުގެ ހިންގާ ކޮމިޓީ އިންތިޚާބު ކާމިޔާބު ކުރައްވާފައިވަނީ:-

1. ރައީސް: ޢަބްދުﷲ ޝަހުނީޒް
2. ނައިބު ރައީސް (ޢިލްމީ): އާމިނަތު މިހުދާ މުޙައްމަދު
3. ނައިބު ރައީސް (ޢަމަލީ): ޙުސައިން ޢަލީ
4. ނައިބު ރައީސް (ގޮފިތަށް): ޙުސައިން ޒައިދު
5. ޚަޒާންދާރު: އަޙުމަދު ޙައްޔާން ރަޝީދު
6. ސެކްރެޓަރީ: ފާޠިމަތު ނަޝާޠު ވަޙީދު
7. އެސިސްޓެންޓް ސެކްރެޓަރީ: ޢާއިޝަތު އީފާ އިބްރާހީމް
8. މީޑިއާ ކޯޑިނޭޓަރ : ޝުޢައިބު މުޙައްމަދު އިޤްބާލް

ދަރިވަރުންގެ ޔޫނިއަންގެ 9 ވަނަ ދައުރުގެ ރައީސަކަށް ހޮވިވަޑައިގެންނެވި، ޢަބްދުﷲ ޝަހުނީޒަކީ ދަރިވަރުންގެ ޔޫނިއަންގެ ފެކަލްޓީ އޮފް ސައިންސްގެ ގޮފި ”ސޮސައިޓީ އޮފް ސައިންސް“ ގެ ޚަޒާންދާރުކަމުގެ މަޤާމް 2017 ވަނަ އަހަރު އަދާކުރެއްވި ބޭފުޅެކެވެ. އަދި މީގެ އިތުރުން ދަރިވަރުންގެ ޔޫނިއަންގެ 6 އަދި 7 ވަނަ ދައުރުގެ ޚަޒާންދާރުގެ މަޤާމުގައި ހުންނެވިއިރު، 8 ވަނަ ދައުރުގެ ޔޫނިއަންގެ ނައިބު ރައީސް (ގޮފިތައް) ގެ މަޤާމް އަދާކުރައްވާފައިވެއެވެ.

ނައިބު ރައީސް (ޢިލްމީ) ގެ މަޤާމަށް ހޮވިވަޑައިގެންނެވި އާމިނަތު މިހުދާ މުޙައްމަދަކީ ދަރިވަރުންގެ ޔޫނިއަންގެ ލީޑަރެއްގެ ގޮތުގައި 2019 ވަނަ އަހަރުން ފެށިގެން ހަރަކާތްތެރިވި ކުޅަދާނަ އިސްވާރެކެވެ. އަދި ޔޫތު ލީޑާރސް ނެޓްވާރކް ގެ ފޯރަމްތައް ރާވައި ހިންގުމުގައި ދަރިވަރުންގެ ޔޫނިއަންގެ ފަރާތުން މަސައްކަތް ކޮށްދެއްވި ފަރާތެކެވެ.

ނައިބު ރައީސް (އަމަލީ) ގެ މަޤާމަށް ހޮވިވަޑައިގެންނެވި ޙުސައިން ޢަލީ އަކީ ޔޫނިއަން ފެށުނީއްސުރެ ޔޫނިއަންގެ ހަރަކާތްތަކުގައި އެންމެ އިސްކޮށް ހަރަކާތްތެރިވި އެއް ބޭފުޅާއެވެ. ޔޫނިއަންގެ 4 ވަނަ ދައުރުގެ ނައިބު ރައީސް (ގޮފިތައް) ގެ މަޤާމު އަދާކުރެއްވިއިރު، 6 އަދި 7 ވަނަ ދައުރު ޙުސައިން ޢަލީ ފެނިގެންދިޔައީ ޔޫނިއަންގެ އެޑްވައިޒަރީ ބޯޑު މެމްބަރެއްގެ ގޮތުގައެވެ. އަދި ޖެހިގެން އައި 8 ވަނަ ދައުރު، ނައިބު ރައީސް (އަމަލީ) ގެ މަޤާމު ވަނީ ފުރުއްވާފައެވެ. އަދި ޙުސައިން ޢަލީ އަކީ ދަރިވަރުންގެ ޔޫނިއަން އިން ދެވޭ އެންމެ މަތީ ޝަރަފް ”ޝަރަފްވެރިކަމާއި ޢިއްޒަތްތެރިކަމުގެ ނިޝާނުގެ ވެރިޔާ“ ހާސިލްކޮށްފައިވާ ބޭފުޅެކެވެ.  

ނައިބު ރައީސް (ގޮފިތައް) ގެ މަޤާމަށް ހޮވިވަޑައިގެންނެވި ޙުސައިން ޒައިދަކީ 2018 ވަނަ އަހަރު ޔޫނިއަންގެ ލީޑާރސް ގްރޫޕްގައި މަސައްކަތްކުރި އިސްވާރެކެވެ. އަދި ޖެހިގެން އައި 2019 ވަނަ އަހަރު ސޮސައިޓީ ފޯ ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް) ގެ ނައިބު ރައީސް (އަމަލީ) ގެ މަގާމުގައި ހުންނެވިއިރު، 2020 ވަނަ އަހަރު އެމް.އެން.ޔޫ.އެސް.ޔޫގެ ޚަޒާންދާރުގެ މަޤާމު ފުރުއްވާފައިވެއެވެ.

ޚަޒާންދާރުގެ މަޤާމަށް ހޮވިވަޑައިގެންނެވި އަޙުމަދު ޙައްޔާން ރަޝީދަކީ 2019 ވަނަ އަހަރު ސޮސައިޓީ އޮފް ޝަރިއްޔާ އެންޑް ލޯ (އެސް.އެސް.އެލް) ގެ ނައިބު ރައީސް (އަމަލީ) ގެ މަޤާމު ފުރުއްވި ބޭފުޅާއެވެ. އަދި މިވަގުތު އެސް.އެސް.އެލް ގެ ރައީސްގެ މަޤާމު ފުރުއްވަނީ ވެސް ޙައްޔާނެވެ.

ސެކްރެޓަރީ ގެ މަޤާމަށް ހޮވިވަޑައިގެންނެވި، ފާޠިމަތު ނަޝާޠު ވަޙީދަކީ 2019 ވަނަ އަހަރު އެމް.އެން.ޔޫ.އެސް.ޔޫ ލީޑަރސް ގްރޫޕްގައި ހަރަކާތްތެރިވި އިސްވާރެކެވެ. ޖެހިގެން އައި 2020 ވަނަ އަހަރު ނިއަރެސްގެ ނައިބު ރައީސް (ޢިލްމީ) ގެ މަޤާމު ފުރުއްވާފައިވަނީ ނަޝާޠު އެވެ.

އެސިސްޓެންޓް ސެކްރެޓަރީގެ މަޤާމަށް ހޮވިވަޑައިގެންފައިވަނީ ޢާއިޝަތު އީފާ އިބްރާހީމެވެ. އީފާ 2018 ވަނަ އަހަރު ތަރަހައިގެ ސެކްރެޓަރީގެ މަޤާމުގައި ހުންނެވިއިރު، 2019 އަދި 2020 ވަނަ އަހަރު ބިޒްނަސް ސްކޫލް ސްޓޫޑެންޓް އެސޯސިއޭޝަނުގެ ސެކްރެޓަރީގެ މަޤާމު ފުރުއްވާފައިވެއެވެ.

މީޑިއާ ކޯޑިނޭޓަރުގެ މަޤާމަށް ހޮވިވަޑައިގެންނެވި، ޝުޢައިބު މުޙައްމަދު އިޤްބާލް އެންމެ ފުރަތަމަ އަދާކުރެއްވީ ބިޒްނަސް ސްކޫލް ސްޓޫޑެންޓް އެސޯސިއޭޝަނުގެ މީޑިއާ ކޯރޑިނޭޓަރ ކަމެވެ. އަދި ޝުޢައިބަކީ 2018 ވަނަ އަހަރުން ފެށިގެން މިއަދާއި ހަމައަށް ޔޫނިއަންގެ އޮފިޝަލް ފްޓޯގްރާފަރ ގެ މަޤާމު އަދާކުރައްވަމުން އަންނަ ފަރާތެވެ.

ލިޔުނީ: ހަސްނާ ވިޝާމް،
އެމް.އެން.ޔޫ.އެސް.ޔޫ މީޑިއާ