ޑީން އޮފް ސްޓޫޑެންޓްސް އެމް.އެން.ޔޫ.އެސް.ޔޫ ގެ 9 ވަނަ ދައުރަށް އިންތިޚާބުވި މެމްބަރުންނާއި ބައްދަލު ކުރައްވައިފި

ދިވެހި ރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ޑީން އޮފް ސްޓޫޑެންޓްސް، އަލްފާޞިލް އައިޝަތު ލީލާ އަހުމަދު ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ 9 ވަނަ ދައުރަށް އިންތިޚާބުވި މެމްބަރުންނާއި ބައްދަލުކުރައްވައިފިއެވެ.

އެމް.އެން.ޔޫ.އެ.ސް.ޔޫ އޮފީހުގައި 2020 ސެޕްޓެމްބަރ 24 ވަނަ ދުވަހު ބޭއްވުނު މި ބައްދަލުވުމުގައި ލީލާ މިސް ވަނީ އެމް.އެން.ޔޫ.އެ.ސް.ޔޫ ގެ ހިންގާ ކޮމެޓީއަށް އަލަށް އިންތިޚާބުވި މެމްބަރުންނާއި ބައްދަލުކުރައްވާ މަރުހަބާ ކިޔުއްވާފައެވެ. އަދި ކުރީ އަހަރުތަކާއި އެއްގޮތައް މި އަހަރުވެސް ޔޫނިއަންގެ ހިންގުން ހަރުދަނާކޮށް، ޔޫނިއަންއާއި އެމްއެންޔޫ އާއި ދެމެދު  އޮންނަ ގުޅުން ބަދަހި ކުރުމަށް ކުރެވިދާނެ ކަންކަމާއިމެދު ވަނީ މަޝްވަރާ ކުރައްވާފައެވެ.

މީގެ އިތުރުން ލީލާ މިސް ވަނީ ދަރިވަރުން ބާރުވެރި ކުރުވުމަށް ކުރެވެން ހުރި މަސައްކަތްތަކާއި މި ފެށޭ ދައުރުގައި ކުރަން ރާވާފައިވާ ކަންކަމާއިމެދު ހިޔާލު ހޯދައި މަޝްވަރާ ކޮށްފައެވެ. ލީލާ މިސް އިތުރަށް ވިދާޅުވީ ދަރިވަރުންގެ ޔޫނިއަނުން އިސްނަގައިގެން މުޅި ރާއްޖެއަށް އަމާޒުކޮށް ތަފާތު ބަދަލެއް ގެނެވޭނެ ހަރަކާތެއް ބޭއްވުމަށް މަސައްކަތް ކުރުމަކީ މިސްގެ އެދުމެއް ކަމަށެވެ.

މި ބައްދަލުވުމުގައި އެމް.އެން.ޔޫ.އެސް.ޔޫ ގެ އިންތިޚާބީ ރައީސް ޢަބްދުﷲ ޝަހުނީޒް ވިދާޅުވީ ޔޫނިއަނުން އަންނަ އަހަރަށް އަމާޒުކޮށް ކްލަބް ހެދުމުގެ މަސައްކަތް މިހާރު ފެށިފައިވާ ކަމަށާއި، އެގޮތުން ކްލަބް ހެދުމުގެ އުސޫލުގެ 50 އިންސައްތަ މަސައްކަތް މިހާރު ނިމިފައިވާ ކަމަށެވެ. އަދި އުންމީދަކީ އަންނަ އަހަރު ފެށުމާއިއެކު، ކްލަބްތަކުގެ މަސައްކަތް ފެށިގެން ދިޔުން ކަމަށް ޝަހުނީޒް ވިދާޅުވިއެވެ. އަދި މި ބައްދަލުވުމުގައި އަންނަ އަހަރު ޔޫނިއަނުން ކުރަން ކަނޑައަޅާފައިވާ ބައެއް ހަރަކާތްތަކުގެ ތަފްސީލު ޝަހުނީޒް ވަނީ ލީލާ މިސް އަށް އަރުވައިފައެވެ.

ލިޔުނީ: ޢަބްދުﷲ އަތޫފް އާތިފް،
އެމް.އެން.ޔޫ.އެސް.ޔޫ މީޑިއާ