ރާއްޖެ ޓީވީއިން ގެނެސްދޭ ޚަބަރު ފީތާ ޕްރޮގްރާމްގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބައިވެރިވެއްޖެ އެވެ.
އާދީއްތަ ދުވަހުގެ ހަވީރު ގެނެސްދިން މި ޕްރޮގްރާމްގައި އެމް.އެން.ޔޫ.އެސް.ޔޫގެ ފަރާތުން ބައިވެރިވީ ނުވަ ވަނަ ދައުރުގެ އިންތިޚާބީ ރައީސް ޢަބްދުﷲ ޝަހުނީޒާއި، އިންތިޚާބީ ނައިބު ރައީސް (އަމަލީ) ޙުސައިން ޢަލީ އާއި އިންތިޚާބީ ސެކްރެޓަރީ ފާޠިމަތު ނަޝާތު ވަޙީދާއި އިންތިޚާބީ މީޑިއާ ކޯޑިނޭޓަރ ޝުޢައިބް މުޙައްމަދު އިޤްބާލެވެ.
މި ޕްރޮގްރާމް މެދުވެރިކޮށް އެމް.އެން.ޔޫ.އެސް.ޔޫގެ އިންތިޚާބީ ހިންގާ ކޮމިޓީން ވަނީ 9 ވަނަ ދައުރަށް ރޭވިފައިވާ ބައެއް ޙަރަކާތްތަކާއި ބެހޭ ތަފްސީލު ދެއްވާފައެވެ. އެގޮތުން އަންނަ އަހަރު މުޅިން އަލަށް ހިންގުމަށް ނިންމާފައިވާ ބައެއް ޙަރަކާތްތަކުގެ ތަފްޞީލު ދެއްވާފައެވެ. އަދި އެމް.އެން.ޔޫ.އެސް.ޔޫއިން މިހާރު ހިންގަމުން ގެންދާ ބައެއް ހަރަކާތްތަކުގެ ތަފްޞީލުވެސް ވަނީ ދެއްވާފައެވެ.
ރާއްޖެ ޓީވީގެ ޚަބަރު ފީތާ ޕްރޮގްރާމަކީ، މަދަނީ ޖަމިއްޔާތައް، ކޮލެޖް/ ޔުނިވަރސިޓީ އަދި އެނޫންވެސް ފަރާތްތަކުން ކުރަމުން ގެންދާ މަސައްކަތްތައް ގެނެސްދެމުން އަންނަ ޕްރޮގްރާމެކެވެ. މީގެ ކުރިންވެސް އެމް.އެން.ޔޫ.އެސް.ޔޫއިން ވަނީ ދެ ފަހަރެއްގެ މަތިން މި ޕްރޮގްރާމްގައި ބައިވެރިވެފައެވެ.
ލިޔުނީ:
މުޙައްމަދު އަޙްނަފް،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
