ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި ޑީން އޮފް ސްޓޫޑެންޓްސް، މަޖްދުއްދީން ދަނާލުގެ ޙާލަތު ބައްލަވާލައްވައިފިއެވެ.
7 އޮކްޓޯބަރު 2020 ވީ ބުދަ ދުވަހު ޑީން އޮފް ސްޓޫޑެންޓްސް އާޝިޔާ ލީލާ އަޙްމަދު ގެ އިތުރުން އެމް.އެން.ޔޫ ސީނިއަރ އެޑްމިން އައިޝަތު ރިފްގާ، އާއި މަޖުދުއްދީން ދަނާލުގެ މުދީރު މުޙައްމަދު ނިޒާރު، އާއި ދަނާލުގެ އެޑްމިނިސްޓަރ އޮފިސަރ ނަޒީހާ ޙުސައިން ބައިވެރިވެވަޑައިގަތެވެ. އަދި އެމް.އެން.ޔޫ.އެސް.ޔޫ ގެ 8 ވަނަ ދައުރުގެ މެމްބަރުންނާއި، 9 ވަނަ ދައުރަށް އިންތިހާބުވި ބައެއް މެމްބަރުންގެ އިތުރުން ޔޫނިއަންގެ އެޑްވައިޒަރީ ބޯޑު މެމްބަރު އަރުޝަދު އަޝްރަފް ވަނީ ބައިވެރިވެވަޑައިގެންފައެވެ.
ދަނާލު ބައްލަވާލެއްވުމަށް ކުރިޔަށް ދިޔަ ހަރަކާތުގައި ދަނާލުގެ ކަންކަން ހުރި ގޮތް އޮޅުންފިލުވާ ރަނގަޅު ކުރަންޖެހޭ ކަންކަން މަޝްވަރާ ކުރެއްވިއެވެ. އެގޮތުން ޑީން އޮފް ސްޓޫޑެންޓްސް ލީލާ މިސް ވަނީ ދަނާލުގެ ސާފުތާހިރުކަމަށް ތައުރީފު ކުރައްވާފައެވެ.
”ތަނުގެ ސާފުތާހިރުކަމުން އެނގެނީ ތަން ރަނގަޅަށް ބެލެހެއްޓޭކަން. ސާފުތާހިރުކަން ދެމެހެއްޓުމަކީ ކުދިންގެ ޒިންމާއެއް“
ޑީން އޮެފް ސްޓޫޑެންޓްސް އަލްފާޟިލާ ލީލާ އަޙްމަދު
މީގެ އިތުރުން ދަނާލުގައި ދިރިއުޅޭ ކުދިންނަށް އިތުރަށް ދެވިދާނެ ޚިދުމަތްތަކާ ބެހޭގޮތުން މަޝްވަރާކުރެވުނެވެ. އެގޮތުން ދަނާލަށް ރަނގަޅު އިންޓަރނެޓް ކަނެކްޝަނެއް ލުމާއި، ލޯކަލް ޗެނަލް ތަކުގެ އިތުރުން އިތުރު އެހެން ޗެނަލްތައް ފެންނާނެ ގޮތަށް ކޭބަލް ޓީވީގެ ހިދުމަތް ލިބޭނެ ގޮތް ހެދުމަށް ވަނީ މަޝްވަރާކުރެވުނެވެ.
މީގެ ކުރިންވެސް އެމް.އެން.ޔޫ.އެސް.ޔޫ އިން ވަނީ އެމް.އެން.ޔޫގެ އެކި ދަނާލުތަކުގައި އުޅޭ ދަރިވަރުންނާ ބައްދަލުކޮށް އެ ދަރިވަރުންގެ ޝަކުވާތަކާއި ކަންބޮޑުވުންތައް ޔުނިވަރސިޓީގެ މެނޭޖްމަންޓާ ޙިއްޞާކޮށް މައްސަލަތަކަށް ޙައްލު ހޯދައިދީފައެވެ. މިގޮތުން 2018 ވަނަ އަހަރު ކުޅުދުއްފުށީ ކެމްޕަހުގެ ދަނާލުގެ ދަރިވަރުންނާ ކުރެވުނު ބައްދަލުވުމާއި، ހަމަ އެ އަހަރު ތިނަދޫ ކެމްޕަސް ދަނާލަށް ކުރެވުނު ޒިޔާރަތް އަދި މާލޭ ކެމްޕަހުގެ ދަނާލު ދަރިވަރުންނާއެކު ބޭއްވުނު ބައްދަލުވުން ފާހަގަކޮށްލެވެއެވެ. އަދި 2019 ވަނަ އަހަރު ތިނަދޫ ކެމްޕަހުގެ ދަނާލުގެ ދަރިވަރުންނާވެސް ޔޫނިއަން އިން ވަނީ ބައްދަލުކޮށްފައެވެ.
ލިޔުނީ: މުޙައްމަދު އަޙްނަފް،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
