”ރާއްޖެ ޓީވީ“އިން ސިލްސިލާކޮށް ގެނަސްދޭ ޕްރޮގުރާމެއް ކަމަށްވާ ”ޚަބަރު ފީތާ“ ގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބައިވެރިވެއްޖެ އެވެ.
ޖުލައި 27 ވަނަ ދުވަހު ގެނަސްދިން މިޕްރޮގްރާމްގައި އެމް.އެން.ޔޫ.އެސް.ޔޫ ގެ ރައީސް އަލީ ޝަމްޢޫން އާއި ނައިބު ރައީސް(ގޮފިތައް) އަބްދުﷲ ޝަހުނީޒް ވަނީ ބައިވެރިވަޑައިގެންފައެވެ.
މި ޕްރޮގްރާމްގައި ވާހަކަދައްކަވަމުން އެމް.އެން.ޔޫ.އެސްޔޫގެ ރައީސް އަލީ ޝަމްޢޫން ވަނީ ވަރަށް ފުރިހަމަ ގޮތެއްގައި އެމް.އެން.ޔޫ.އެސް.ޔޫގެ ތައާރަފެއް ދެއްވައިފައެވެ. އެގޮތުން އަލީ ޝަމްޢޫން ވަނީ އެމް.އެން.ޔޫ.އެސް.ޔޫ އަކީ 6 ނޮވެންބަރ 2012 ވަނަ އަހަރުން ފެށިގެން ރަޖިސްޓަރ ކޮށްގެން ހިންގަމުން އަންނަ މަދަނީ ޖަމިއްޔާއެއްކަން ފާހަގަ ކުރައްވާފައެވެ.
”ރާއްޖެ ޓީވީ“އިން ކުރެއްވި ސުވާލަކަށް ޖަވާބު ދެއްވަމުން ރައީސް އަލީ ޝަމްޢޫން ވިދާޅުވެފައި ވަނީ ދަރިވަރުން ބާރުވެރިކުރުމަށް ތަފާތު ހަރަކާތްތަކެއް ބާއްވަމުން ދާކަމަށެވެ. އޭގެ ތެރޭގައި ފުރެޝާސް ނައިޓް ، ލީޑާރސް ނައިޓް އަދި ވޯކުޝޮޕްތައް ކުރިއަށް ގެންދާކަމަށެވެ. އަދި މީގެ އިތުރުން ތަފާތު ގޮފިތަކެއް ހަދައި އެކި ފެކަލްޓީގައި ހަރަކާތްތަކެއް ހިންގަމުންދާކަމެވެ. މީގެ އިތުރުން ކޮންމެ އަހަރަކު ބާއްވާ ޒުވާނުންގެ ފޯރަމްގެ އިތުރުން މިނިވަން ދުވަހުގެ ހަރަކާތްތަކުގައި ވެސް ދަރިވަރުން ބައިވެރިވަމުންދެއެވެ.
އެހެނިހެން ޔުނިވާރސިޓީތަކާއި ގުޅުން ބަދަހިކުރުމަށް ތަފާތު ޙަރަކާތްތަކެއް ބާއްވަމުންދާކަމަށް ރައީސް ޝަމްޢޫން ޖަވާބު ދެއްވަމުން ވިދާޅުވިއެވެ. އޭގެ ތެރެއިން ކޮންމެ އަހަރަކުހެން ކުރިއަށް ގެންދާ “ އެމް.އެން.އެސް.ޔޫ ފުޓްސަލް ފިސްޓާ“ އާއި މިއަހަރު ކޯވިޑް އާއި ގުޅިގެން ބޭރުގެ 23 އެސޯޝިއަންއެއް ގައި ކިޔަވާ ދަރިވަރުންނާއި ގުޅިގެން ބޭއްވި ”ހެލްޕް މޯލްޑިވިސް“ ކެންޕެއިން ފާހަގަކުރެއްވިއެވެ.
މިޖަމިއްޔާ އޮތުމުގެ މުހިއްމު ކަމަކީ ކޮބައިތޯ ސުވާލު ކުރެއްވުމުން ޖަވާބުގައި ނައިބް ރައީސް(ގޮފިތައް) އަބްދުﷲ ޝަހުނީޒް ވިދާޅުވީ މިޖަމިއްޔާގެ މުހިއްމު ކަމަކީ ދަރިވަރުންނަށް ލުއި ފަސޭހަ ކޮށްދިނުމަށެވެ. އަދި މުޖުތަމައާއި ގުޅިގެން ތަފާތު ހަރަކާތްތަކެއް ވެސް މިޖަމިއްޔާގެ ދަށުން ކުރިއަށް ގެންދަމުން ދިއުންކަމަށެވެ. އޭގެ ތެރެއިން ލާމް އަތޮޅުގެ ގޮތްޕެއް ކަމަށްވާ ”އަހުރަ“ އިން ރަށުގައި ވޮލީ މުބާރާތެއް ކޮންމެ އަހަރަކުވެސް ހިންގަމުން ދާކަމަށެވެ. މީގެ އިތުރުންވެސް ޢިލްމީ އަދި އިޖްތިމާއީ ހަރަކާތްތަކެއްވެސް އަބަދުވެސް ކުރިއަށް ދާކަމަށް ނައިބް ރައީސް ވިދާޅުވިއެވެ.
”ކޮވިޑް-19 އާއި ގުޅިގެން އެމް.އެން.ޔޫ.އެސް.ޔޫގެ ގިނަ ޙަރަކާތްތަކެއް ވަނީ ފަސްކުރަންޖެހިފަ!“
ޢަލީ ޝަމްޢޫން، ރައީސް
ނަމަވެސް އޮންލައިންކޮށް ދީނީ ކުއިޒް ފަދަ އެކިއެކި އޮންލައިން ހަރަކާތްތަކެއް ބޭއްވިގެން ދިޔަކަމަށް ޝަމްޢޫން ވިދާޅުވިއެވެ. އަދި މިއާއިއެކު އޮންލައިންކޮށް ކުލާސްތައް ނަގަމުން ދިޔުމުގެ ސަބަބުން ދިމާވާ ދަތިތައް ހައްލުކުރުމަށް މެނޭޖްމަންޓާއި ގުޅިގެން މަސައްކަތްތައް ކުރިއަށް ގެންދެވުން ކަމަށް ޝަމްއޫން ވަނީ ވިދާޅުވެފައެވެ.
މަދަނީ ޖަމިއްޔާތަކާއި ކޮލެޖް ޔުނިވަރސިޓީތަކުގެ މައުލޫމާތު ގެނަސްދިނުމުގެ މަގުސަދުގައި ”ރާއްޖެ ޓީވީން“ ގެނަސްދޭ ހަބަރު ފީތާ ޕްރޮގްރާމުގައި އެމް.އެން.ޔޫ.އެސް.ޔޫ.އިން ބައިވެރިވި މިއީ ދެވަނަ ފަހަރެވެ. މީގެ ކުރިން މި ޕްރޮގްރާމްގައި އެމް.އެން.ޔޫ.އެސް.ޔޫގެ މީޑިއާ ޓީމު މެމްބަރު އަބްދުﷲ އަތޫފް އާތިފްގެ އިތުރުން އިންޖިނިއަރިންގ ސައިންސް އެންޑް ޓެކްނޮލޮޖީގެ ރައީސް އިބްރާހީމް ޣާނިމް ޝާހިދު ވަނީ ބައިވެރިވެފައެވެ.
ލިޔުނީ: ފާޠިމަތު ޝާމިލާ،
އެމް.އެން.ޔޫ.އެސް.ޔޫ މީޑިއާ
