ވޭތުވެދިޔަ ދެ މަހެއްހާ ދުވަހުގެ ތެރޭގައި އެމް.އެން.ޔޫ.އެސް.ޔޫ އާއެކު ކުރެވުނު މަސައްކަތުގައި ޔޫނިއަންއިން ދަރުމައަށް ކުރަމުންގެންދާ މަސައްކަތްތައް އެނގިވަޑައިގެންފައިވާ ކަމަށާއި، އެ މަސައްކަތްތަކަށް ފަޚުރުވެރިވާ ކަމަށް ޑީން އޮފް ސްޓޫޑެންޓެސް އާޝިޔާ ލީލާ އަހުމަދު ވިދާޅުވެއްޖެއެވެ.
ލީލާ މިސް މިހެން ވިދާޅުވީ، އެމް.އެން.ޔޫ.އެސް.ޔޫގެ 9 ވަނަ ދައުރުގެ ހިންގާ ކޮމެޓީ އިފްތިތާޙު ކުރުމަށް 8 ނޮވެމްބަރ 2020 ވަނަ ދުވަހު ބޭއްވި ހަފްލާގައި ވާހަކަފުޅު ދައްކަވަމުންނެވެ.
”ވޭތުވެދިޔަ ދެމަހެއްހާ ދުވަހު އެމް.އެން.ޔޫ.އެސް.ޔޫ އާއެކު މަސައްކަތް ކުރުމުން ތިޔަ ޓީމުން ޤައުމަށް، ދަރުމައަށް ކުރަމުން އަންނަ މަސައްކަތްތައް އެނގި އެ މަސައްކަތްތަކަށް ފަޚުރުވެރިވަން ”
ޑީން އޮފް ސްޓޫޑެންޓްސް އަލްފާޟިލާ ލީލާ އަހުމަދު
ލީލާ މިސްގެ ވާހަކަފުޅުގައި ދިވެހިރާއްޖެއަށް ކުރިމަތިވެފައިވާ ކޮވިޑް-19 ގެ މި ނާޒުކު ދަނޑިވަޅުގައި، އެންމެ ފުރަތަމަ ދުވަހުން ފެށިގެން މިއަދާ ހަމަޔަށް އެމް.އެން.ޔޫ.އެސް.ޔޫ އިން އިސްނަގައިގެން ކުރަމުން ގެންދާ މަސައްކަތްތައް ފާހަގަކުރެއްވިއެވެ.
އަދި އެމް.އެން.ޔޫ.އެސް.ޔޫއިން ކުރަމުންދާ މަސައްކަތްތަކަކީ ޝުކުރު ޙައްޤު މަސައްކަތްތަތަކެއް ކަމަށާއި، އަންނަން އޮތް ޖީލުތަކަށް އެނގޭނެ ގޮތަށް ލިޔެވިފައި އޮންނަން ޖެހޭނެ ވާހަކަތަކެއް ކަމަށް ވިދާޅުވެ ލީލާ މިސް ވަނީ ޔޫނިއަންގެ މަސައްކަތްތަކަށް ތަޢުރީފް ކުރައްވާފައެވެ.
ޔުނިވަރސިޓީ ދައުރުގައި ދަރިވަރުންނަށްޓަކައި ފަހި ކޮށްދެވޭ ތަފާތު އެކި އެކި ފުރުޞަތުތަކުގެ ބޭނުން ހުރިހާ ދަރިވަރުންވެސް ހެޔޮގޮތުގައި ހިފުމަށް ލީލާ މިސް ނަސޭހަތްތެރިވެވަޑައިގެންނެވިއެވެ.
އަދި އޭގެ އިތުރުން ހަރުދަނާ އިސްވާރަކަށް ވުމަށްޓަކައި ދަރިވަރެއްގެ ކިބައިގައި ހުންނަންޖެހޭ ސިފަތައް ފާހަގަ ކުރައްވަމުން، ޔުނިވަރސިޓީން ދަސްވެނިމޭ ދަސްވެނިންނަކީ، ގައުމު ބިނާ ކުރާނޭ ދަރިވަރުންތަކެއްކަން ކަށަވަރު ކުރުމަކީ އެމް.އެން.ޔޫ.އެސް.ޔޫގެ އަމާޒެއް ކަމުގައި ހެދުމަށް އިލްތިމާސްކުރެއްވިއެވެ.
ލީލާ މިސް ވިދާޅުވި ގޮތުގައި، ޔުނިވަރސިޓީ ގައި އުޅޭ ކޮންމެ ދަރިވަރަކީ ޢިލްމާއި ހިލްމު ލިބިގެންވާ، ދުޅަހެޔޮ ޞިއްޙަތެއްގެވެރި އަދި ޤާބިލް ދަރިވަރަކަށް ހެދުމަށްޓަކައި އެމް.އެން.ޔޫގެ މެނޭޖްމެންޓުން އަބަދުވެސް އެހީތެރިކަން ފޯރުކޮށްދޭނެއެވެ.
ތަޢުލީމީ ދާއިރާގައި ދިގު މުއްދަތަކަށް ޚިދުމަތް ކުރައްވާފައިވާ ލީލާ މިސް އެމް.އެން.ޔޫގެ ޑީން އޮފް ސްޓޫޑެންޓްސް މަޤާމަށް ހަވާލުވި އެންމެ ފުރަތަމަ ދުވަހުން ފެށިގެންވެސް ގެންދަވަނީ އެމް.އެން.ޔޫ.އެސް.ޔޫ އާއި ވަރަށް ގާތް ގުޅުމެއް ބާއްވަމުންނެވެ. ލީލާ މިސް ފާހަގަކުރެވިފައިވަނީ ދަރިވަރުންނާ ގުޅޭ، ދަރިވަރުންގެ އިހުސާސްތައް ދަންނަ އެކުވެރި ފަރާތެއްގެ ގޮތުގައެވެ. ކުރިއަށް އޮތް ދުވަސްތަކުގައިވެސް ލީލާ މިސްގެ ފުރިހަމަ އެއްބާރުލުން އެމް.އެން.ޔޫ.އެސް.ޔޫ އަށް ލިބޭނެ ކަމުގެ ފުރިހަމަ ޔަޤީންކަން އެބައޮތެވެ.
ލިޔުނީ: ހަސްނާ ވިޝާމް،
އެމް.އެން.ޔޫ.އެސް.ޔޫ މީޑިއާ
