ދަތި އުނދަގޫ ހާލަތުގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހަރަކާތްތަކަށް މަޑު ޖެހުމެއްނައިސް ކުރިޔަށް ގެންދެވިފައިވަނީ 8 ވަނަ ދައުރުގެ ރައީސް ޢަލީ ޝަމްޢޫން އާއި އޭނާގެ ޓީމުގެ ކުޅަދާނަކަމުން ކަމަށް އެމް.އެން.ޔޫ.އެސް.ޔޫގެ ކުރީގެ ރައީސް އަދި އެޑްވައިޒަރީ ބޯޑު މެމްބަރު މުޙައްމަދު ޝާން ޢާމިރް ވިދާޅުވެއްޖެ އެވެ.
ޝާން މިހެން ވިދާޅުވީ އެމް.އެން.ޔޫ.އެސް.ޔޫގެ 9 ވަނަ ދައުރުގެ ހިންގާ ކޮމެޓީ އިފްތިތާހު ކުރުމަށް 8 ނޮވެމްބަރު 2020 ވަނަ ދުވަހު ބޭއްވުނު ރަސްމިއްޔާތުގައި ވާހަކަދައްކަވަމުންނެވެ.
ޝާންގެ ވާހަކައިގައި ނިމިދިޔަ 8 ވަނަ ދައުރަކީ އެމް.އެން.ޔޫ.އެސް.ޔޫއަށް ގިނަ ގޮންޖެހުންތަކަކާއި ކުރިމަތިވި ދައުރެއް ކަމަށާއި، ކޯވިޑް-19 ގެ ސަބަބުން ހިންގަން ކުރިން ރޭވިފައިވާ ބޮޑެތި ގިނަ ހަރަކާތްތަކެއް މަޑު ޖައްސާލަން ޖެހުނުކަން ވަނީ ފާހަގަ ކުރައްވާފައެވެ. އެކަމަކު ކޯވިޑް-19 ގެ ހާލަތުގައި ވެސް ޝަމްޢޫން އާއި އޭނާގެ ޓީމުން ވަރުބަލި ކަމެއް ނެތި ތަފާތު އެކި ހަރަކާތްތައް ހިންގައިފައިވާކަން ޝާން ވަނީ ފާހަގަކުރައްވާފައެވެ.
ޝާން އިތުރަށް ވިދާޅުވީ ކުރިޔަށް އޮތް ދައުރަކީ ޔޫނިއަނުން ކުރިޔަށްވުރެ ގިނަ ތަފާތު އެކި ހަރަކާތްތައް ރާވާނެ ދައުރެއް ކަމާއިމެދު ޝައްކު ނުކުރައްވާ ކަމަށާއި، ޔޫނިއަންގެ ހުންގާނާ ހަވާލުވި ޝަހުނީޒަކީ ޔޫނިއަން ރަނގަޅަށް ދަންނަ ކަންކަން ކުރެވޭނެ ވަރުގަދަ ލީޑަރެއް ކަމަށެވެ. އަދި ޝަހުނީޒާއި އޭނާގެ ޓީމުން އިތުރު ހަރުފަތަކަށް ޔޫނިއަން ގެންދާނެ ކަމަށް އުންމީދު ކުރައްވާ ކަމަށް ޝާން ވިދާޅުވިއެވެ.
އެމް.އެން.ޔޫ.އެސް.ޔޫ އެޑްވައިޒަރީ ބޯޑު މެމްބަރު ޝާން އަކީ އެމް.އެން.ޔޫ.އެސް.ޔޫގެ 6 ދައުރުގެ މީޑިއާ ކޯޑިނޭޓަރެވެ. އަދި 7 ވަނަ ދައުރުގެ ރައީސްއަކީ ޝާން އެވެ.
ލިޔުނީ: ޢަބްދުﷲ އަތޫފް އާތިފް،
އެމް.އެން.ޔޫ.އެސް.ޔޫ މީޑިއާ
