ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާޤް (ދަގަނޑޭ)ގެ ގައުމީ ކެމްޕެއިންގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބައިވެރިވެއްޖެ އެވެ.
އޭއެފްސީ ކަޕުގައި ޖަހާފައިވާ އެންމެ ރީތި ލަނޑުތަކުގެ މެދުގައި ކުރިއަށްދާ ”އޭ.އެފް.ސީ ކަޕް ބްރެކެޓް ޗެލެންޖް“ ގެ ފައިނަލަށް ދަގަނޑޭ ދަތުރުކޮށްފައިވާއިރު، ދަގަނޑޭ ފައިނަލަށް ދިޔުމުގައި ދިވެހި ރައްޔިތުންގެ ހިއްސާ ބޮޑެވެ. އެގޮތުން މުބާރާތުގެ ކުއާޓާ ފައިނަލުން ފެށިގެން ދަގަނޑޭގެ ސަޕޯޓަރުން ވަނީ ސޯޝަލް މީޑިއާގައި ވަރުގަދަ ކެމްޕެއިން އެއް ކޮށްފައެވެ. އަދި ސެމީ ފައިނަލުގައި ދަގަނޑޭގެ ސަޕޯޓަރުން ވަނީ ކޮމިއުނިޓީ ވައިބަރ ގްރޫޕެއް ހަދައި، ފޯރި އިތުރުކޮށްފައެވެ.
މި ޗެލެންޖްގެ ފައިނަލަށް ދަގަނޑޭ ދަތުރުކުރީ ސެމީފައިނަލުގައި ވިއެޓްނާމުގެ ގުޔެން ގުއެންޑް ހައިއާ ވާދަކޮށް ކުރިހޯދައިގެންނެވެ. އާންމުންގެ މެދުގައި އޮންލައިނުކޮށް ނެގުނު ވޯޓުގައި ދަގަނޑޭއަށް 54.68 އިންސައްތަ ވޯޓު ލިބުނުއިރު، ގުޔެން ގުއެންޑް ހައިއަށް ލިބުނީ 45.32 އިންސައްތަ ވޯޓެވެ.
2020 ނޮވެމްބަރު 23 ވަނަ ދުވަހު އެމް.އެން.ޔޫ.އެސް.ޔޫގެ ހިންގާ ކޮމެޓީގެ ބައެއް މެމްބަރުންނާއި، އެޑްވައިޒަރީ ބޯޑުގެ މެމްބަރުންގެ އިތުރުން އެމް.އެން.ޔޫ.އެސް.ޔޫ މީޑީއާގެ މެމްބަރުން ވަނީ ”ޓީމް އަޝްފާޤް“ ކޮމިއުނިޓީ ވައިބަރ ގްރޫޕް މެމްބަރުންނާއި، ބައްދަލުކޮށްފައެވެ.
މި ބައްދަލުވުމުގައި ކުރިޔަށް ހުރި ދުވަސްތަކުގައި ކެމްޕެއިނަށް އެހީވުމުގެ ގޮތުން އެމް.އެން.ޔޫ.އެސް.ޔޫއަށް ކޮށްދެވެން ހުރި ކަންކަމާއި މެދު ވަނީ މަޝްވަރާ ކޮށްފައެވެ. އެގޮތުން ކެންވަސް ހެދުމާއި، ޕޯސްޓަރުތައް ހެދުމުގެ އިތުރުން ވޯޓުލުން ފެށުމާއިއެކު ޔޫނިއަންގެ މެމްބަރުން މާލޭގެ ބައިބޯ ސަރަހައްދުތަކަށް ނުކުމެ، ޕޯސްޓަރު ބެހުމަށް ވަނީ ނިންމާފައެވެ.
މީގެ އިތުރުން ޕޯސްޓާރ ހެދުމުގެ މަސައްކަތްތައް އެމް.އެން.ޔޫ.އެސް.ޔޫ އޮފީހުގައި މިހާރުވެސް އެމް.އެން.ޔޫ.އެސް.ޔޫ މީޑިޔާގެ ހީވާގި މެންބަރުން ދަނީ ކުރަމުންނެވެ. އަދި ސޯޝަލް މީޑިއާ ކެމްޕެއިންގެ ވީޑިއޯ ހެދުމަށް ވެސް އަންނަނީ މަސައްކަތް ކުރަމުންނެވެ.
އޭއެފްސީ ބްރެކެޓް ޗެލެންޖްގެ ފައިނަލުގައި ވޯޓުލުން 25 ނޮވެމްބަރ ވާ ބުދަ ދުވަހު ވޯޓުލުމަށް ހުޅުވާލާއިރު، އަޝްފާގުގެ ކެމްޕެއިން ހަރަކާތްތަކާ ގުޅޭ އެންމެ ފަހުގެ ހަބަރު ތަކުގެ މައުލޫމާތު ”ޓީމް އަޝްފާޤް“ ކޮމިއުނިޓީ ވައިބަރ ގްރޫޕުން ލިބޭނެ އެވެ.
ވައިބަރ ގްރޫޕަށް ވަދެވޭނެ ލިންކަކީ:
Team Ashfaq on Viber
No Description
އޭއެފްސީ ކަޕުގައި ޖަހާފައިވާ އެންމެ ރީތި ލަނޑުތަކުގެ މެދުގައި ކުރިއަށްދާ މި ޗެލެންޖުގައި ދަގަނޑޭގެ ލަނޑުތަކުގެ ތެރެއިން ހޮވާފައިވަނީ އޭއެފްސީ ކަޕުގައި 2013 ވަނަ އަހަރު ނިއު ރޭޑިއަންޓް ސްޕޯޓްސް ކުލަބުން އިންޑޮނޭޝިއާގެ ޕާސިބޯގެ މައްޗަށް 0-7 ން ކުރިހޯދި މެޗުގައި ދަގަނޑޭ ޖަހައިދިން ރީތި ހިތްގައުމު ސޯލޯ ލަނޑެވެ. އެ ލަނޑު ވަނީ މީގެ ކުރިން އޭއެފްސީން ހޮވި އެންމެ މޮޅު ސޯލޯ ލަނޑަށްވެސް ހޮވިފައެވެ.
އެ ލަނޑު އޭނާ ޖަހާފައިވަނީ ޕާސިބޯގެ ތިން ކުޅުންތެރިން ކައިރިން ނައްޓާލުމަށްފަހު ގޯލްކީޕަރު ދެ ކޮޅަށް ތަޅުވާލުމަށްފަހުއެވެ.
މި ޗެލެންޖުގެ ފައިނަލުގައި ދަގަނޑޭ ވާދަކުރާނީ ހޮންކޮންގުގެ ސައުތު ޗައިނާ ކުލަބަށް ކުޅެމުން އަންނަ ޗޭން ސިއު ކީއާއެވެ.
ދަގަނޑޭ އަކީ އޭއެފްސީ ކަޕްގެ އެންމެ ގިނަ ލަނޑު ޖެހި 10 ކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. ދަގަނޑޭ ލިސްޓުގެ ހަވަނައިގައި އޮތީ ކުލަބު ވެލެންސިއާ، ނިއު ރޭޑިއަންޓް އަދި ވީބީ އައްޑޫ އެފްސީއަށް ޖަހައިދިން 29 ލަނޑާއެކުގައެވެ. ލިސްޓުގެ އެއްވަނައިގައި އޮތީ ފިލިޕީންސްގެ ސެރެސް-ނެގްރޯސްއަށް ކުޅުނު ސްޕެއިނުގެ ބިއެންވެނިޑޯ މަރަނޯނެވެ. އޭނާ ޖަހާފައިވާ ލަނޑުގެ އަދަދަކީ 35 އެވެ. އެހެންކަމުން ލިސްޓުގެ އެއްވަނައަށް އެރުމަށް ދަގަނޑޭއަށް ދެން ބޭނުންވަނީ އެންމެ ހަ ލަނޑެވެ.
