އޭއެފްސީ ކަޕްގައި ޖަހާފައިވާ އެންމެ ރީތި ލަނޑު ހޮވުމަށް އޭއެފްސީއިން ކުރިޔަށް ގެންދިޔަ ”އޭއެފްސީ ކަޕް ބްރެކެޓް ޗެލެންޖް“ ސަޕޯޓަރުންގެ އެހީއާއިއެކު ފަސޭހަކަމާއިއެކު، އަލީ އަޝްފާޤް (ދަގަނޑޭ) ކާމިޔާބުކޮށްފިއެވެ.
މި ޗެލެންޖު ދަގަނޑޭ ކާމިޔާބު ކޮށްފައިވަނީ ހޮންކޮންގުގެ ސައުތު ޗައިނާ ކުލަބަށް ކުޅެމުން އަންނަ ޗޭން ސިއު ކީއާ ވާދަކޮށް ފަސޭހަކަމާއެކު 89.14 އިންސައްތަ ވޯޓާއެކުއެވެ. އަދި ޗޭން ސިއު ކީއަށް ލިބުނީ 10.86 އިންސައްތަ ވޯޓެވެ.
ޖުމުލަ 32 ކުޅުންތެރިންނާ އެކު ކުރިއަށް ގެންދިޔަ ބްރެކެޓް ޗެލެންޖަކީ ނޮކް އައުޓް އުސޫލުން އެއްކުޅުންތެރިޔަކު އަނެއް ކުޅުންތެރިޔަކާ ވާދަކޮށް، ދެން އޮތް ރައުންޑަށް ސަޕޯޓަރުންގެ އެންމެ ގިނަ ވޯޓު ލިބޭ ކުޅުނަތެރިއަކު ކޮލިފައިވާގޮތަށް އޭއެފްސީ ކަޕުގައި ޖަހާފައި ހުރި މޮޅެތި ލަނޑުތައް ގިންތި ކުރުމަށް ބޭއްވި މުބާރާތެކެވެ.
ބްރެކެޓް ޗެލެންޖްގައި އަޝްފާގުގެ ގޯލުތަކުގެ ތެރެއިން ހޮވާފައިވަނީ އޭއެފްސީ ކަޕުގައި 2013 ވަނަ އަހަރު ނިއުރޭޑިއަންޓް އިން އިންޑޮނޭޝިއާގެ ޕާސިބޯގެ މައްޗަށް 0-7 އިން ކުރިހޯދި މެޗުގައި އަޝްފާގު ޖަހައިދިން ރީތި ހިއްގައިމު ސޯލޯ ލަނޑެވެ. މި މެޗުގައި ދަގަނޑޭ ވަނީ 5 ލަނޑު ކާމިޔާބު ކޮށްފައެވެ.
މިޗެލެންޖްގައި ދަގަނޑޭ ފައިނަލާ ހަމައަށް ދަތުރުކުރުމުގައި ދިވެހި ސަޕޯޓަރުންގެ ހިއްސާ ބޮޑެވެ. އެގޮތުން މުބާރާތުގެ ކުއާޓާ ފައިނަލުން ފެށިގެން ދިވެހި ސަޕޯޓަރުން ވަނީ ސޯޝަލް މީޑިއާގައި ވަރުގަދަ ކެމްޕެއިނެއް ކޮށްފައެވެ. އަދި ސެމީ ފައިނަލުގައި ދަގަނޑޭ ސަޕޯޓަރުން ވަނީ ކޮމިއުނިޓީ ވައިބަރ ގްރޫޕެއް ހަދައި، ފޯރި އިތުރު ކޮށްފައެވެ. މި ޗެލެންޖުގެ ފައިނަލަށް ދަގަނޑޭ ދަތުރުކުރީ ސެމީ ފައިނަލުގައި ވިއެޓްނާމުގެ ގުޔެން ގުއެންޑް ހައިއާ ވާދަކޮށް ކުރިހޯދައިގެންނެވެ.
އަޝްފާގު ފައިނަލަށް ދިއުމާއެކު ދިވެހި ރައްޔިތުން ކެމްޕެއިންގެ މަސައްކަތް ކުރިއަށް ގެން ގޮސްފައިވަނީ ގައުމީ ރޫހެއްގައި ދިވެހި ގައުމީ ބަތަލަށް ކާމިޔާބު ހޯދައިދިނުމުގެ ޖޯޝާ ފޯރީގައެވެ. ރާއްޖެއާއި އެތަށް ގޮތަކުން އާބަދީ ނިސަބަތުން ބޮޑެތި ގައުމުތަކުގެ ކުޅުންތެރިންނާ ދަގަނޑޭ ވާދަކޮށް ފައިނަލަށް ދަތުރުކުރުމުން ފާހަގަވެގެންދަނީ ދިވެހި ސަޕޯޓަރުންނަކީ ގައުމަށް ރީތި ނަން ހޯދައިދިނުމުގައި ފަހަތަށް ޖެހޭނެ ބައެއް ނޫންކަމެވެ.
ދިވެހިން ހިންގި ބޮޑު ކެމްޕެއިނަށްފަހު ބްރެކެޓް ޗެލެންޖް ކާމިޔާބުކުރެވުމާއެކު ދަގަނޑޭ ވަނީ ދިވެހި ސަޕޯޓަރުންނަށް ޝުކުރު ބަންޑުންކޮށްލާފައެވެ. ދަގަނޑޭ ކުރި ޓްވީޓެއްގައި އޭނާ ވިދާޅުވީ އާބާދީގެ ގޮތުން ބޮޑެތި ގައުމުތައް ފަހަތަށް ޖައްސައިލުމަށްފަހު ދިވެހި ރައްޔިތުން މުޅި ދުނިޔެއަށް ސާބިތުކޮށްމިދިނީ ދިވެހިންނަކީ މީސްކޮޅު ކިތަންމެ މަދު ނަމަވެސް ގައުމީ ކަންކަމުގައި ފަހަތަށް ޖެހޭނެ ބައެއް ނޫން ކަމަށެވެ. އަދި މިއީ ދިވެހިރާއްޖެ އާއި ދިވެހި ފުޓްބޯޅައަށް ލިބުނު ވަރަށް ރީތި ނަމެއް ކަމަށްވެސް ދަގަނޑޭ ވިދާޅުވިއެވެ.
އާބާދީގެ ގޮތުން ބޮޑެތި ގައުމުތައް ފަހަތަށް ޖައްސައިލުމަށްފަހު މިއަދު ދިވެހި ރައްޔިތުން މުޅި ދުނިޔެއަށް ސާބިތުކޮށްމިދިނީ ދިވެހިންނަކީ މީސްކޮޅު ކިތަންމެ މަދު ނަމަވެސް ގައުމީ ކަންކަމުގައި ފަހަތަށް ޖެހޭނެ ބައެއް ނޫންކަން!
އަލީ އަޝްފާގު
ދަގަނޑޭ އަކީ އޭއެފްސީ ކަޕްގެ އެންމެ ގިނަ ލަނޑު ޖެހި 10 ކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. ދަގަނޑޭ ލިސްޓުގެ ހަވަނައިގައި އޮތީ ކުލަބު ވެލެންސިއާ، ނިއު ރޭޑިއަންޓް އަދި ވީބީ އައްޑޫ އެފްސީއަށް ޖަހައިދިން 29 ލަނޑާއެކުގައެވެ. ލިސްޓުގެ އެއްވަނައިގައި އޮތީ ފިލިޕީންސްގެ ސެރެސް-ނެގްރޯސްއަށް ކުޅުނު ސްޕެއިނުގެ ބިއެންވެނިޑޯ މަރަނޯނެވެ. އޭނާ ޖަހާފައިވާ ލަނޑުގެ އަދަދަކީ 35 އެވެ. އެހެންކަމުން ލިސްޓުގެ އެއްވަނައަށް އެރުމަށް ދަގަނޑޭއަށް ދެން ބޭނުންވަނީ އެންމެ ހަ ލަނޑެވެ.
