ޔޫނިއަން ވެބްސައިޓް ފަރުމާކޮށް ބެލެހެއްޓުން ކޯޑްލެބަށް

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ވެބްސައިޓް އަލުން ފަރުމާކޮށް ބެލެހެއްޓުމުގެ މަސައްކަތް ކުރުމަށް 1 އަހަރު ދުވަހުގެ އެއްބަސްވުމެއްގެ ދަށުން ކޯޑްލެބް ޕްރައިވެޓް ލިމިޓެޑްއާ ހަވާލުކޮށްފިއެވެ.

21 ނޮވެންބަރު 2020 ގައި ސޮއިކުރެވުނު މި އެއްބަސްވުމުގައި ކޯޑްލެބްއިން އެމް.އެން.ޔޫ.އެސް.ޔޫ ގެ ވެބްސައިޓް އަލުން ފަރުމާކޮށް ބެލެހެއްޓުމަށާއި، އެއްބަސްވުމުގެ މުއްދަތުގެ ތެރޭގައި ވެބްސައިޓަށް ގެންނަންޖެހޭ ބަދަލުތަކާއި، އިތުރުކުރަންޖެހޭ ބައިތައް އިތުރުކޮށްދިނުމަށް އެއްބަސްވެފައިވެއެވެ.

އެމް.އެން.ޔޫ.އެސް.ޔޫގެ ފަރާތުން މި އެއްބަސްވުމުގައި ސޮއި ކުރެއްވީ ރައީސް ޢަބްދުﷲ ޝަހުނީޒްކަމަށްވާއިރު، ކޯޑްލެބްގެ ފަރާތުން ސޮއި ކުރެއްވީ އެ ކުންފުނީގެ ކްރިއޭޓިވް ޑިރެކްޓަރ އަޙްމަދު ނަވީހެވެ.

ކޯޑްލެބް އާއި އެމް.އެން.ޔޫ.އެސް.ޔޫ އާއި ދެމެދު ވެވުނު މި އެއްބަސްވުމުގައި، އެމް.އެން.ޔޫ.އެސް.ޔޫ އިން ހިންގާ  އެކިއެކި ހަރަކާތް ތަކުގައި ކޯޑްލެބް އިޝްތިހާރުކުރުމަށްވެސް ވަނީ އެއްބަސްވެވިފައެވެ.

ވެބްސައިޓަށް ގެނެވޭ ބަދަލާއެކު އެމް.އެން.ޔޫ.އެސް.ޔޫގެ މީޑިއާ ޙަރަކާތްތައް އިތުރަށް ހަރުދަނާވެގެންދާނެކަމަށާއި މިއީ މިދައުރުގެ ތެރޭގައި މީޑިއާ އިތުރަށް ހަރުދަނާ ކުރުމަށް ކުރެވޭ މަސައްކަތްތަކުގެ ފެށުންކަމަށް މީޑިއާ ކޯޑިނޭޓަރ ޝުޢައިބް މުޙައްމަދު އިޤްބާލުވަނީ މަޢުލޫމާތު ދެއްވާފައެވެ.

އެމް.އެން.ޔޫ.އެސް.ޔޫގެ ފުރަތަމަ ވެބްސައިޓް ބޭނުންކުރަން ފެށީ 2016ވަނަ އަހަރުގެ ތެރޭގައެވެ. އޭރު ބޭނުންކުރަމުންދިޔަ mnusu.com ބޭނުންކުރުން ހުއްޓާލައި ވެބްސައިޓް އަލުން ފަރުމާކޮށް ދެވަނަ ފަހަރަށް ބޭނުންކުރަން ފެށީ 2018ވަނަ އަހަރުގައެވެ. އެހެންކަމުން މިއީ ޔޫނިއަންގެ ވެބްސައިޓަށް ބަދަލުގެނެވޭ ތިންވަނަ ފަހަރެވެ.

ލިޔުނީ: ޙައްވާ ލައިލާ ލުޠުފީ،
އެމް.އެން.ޔޫ.އެސް.ޔޫ މީޑިއާ