ގޮފިތަކުގެ އައު ހިންގާ ކޮމެޓީއާ އެމް.އެން.ޔޫ.އެސް.ޔޫ އިން ބައްދަލުކޮށްފި

އެމް.އެން.ޔޫ.އެސް.ޔޫގެ ހިންގާ ކޮމެޓީން ގޮފިތަކަށް އަލަށް އިންތިޚާބުވި ހިންގާ ކޮމެޓީތަކާ ބައްދަލުކޮށްފިއެވެ.

މާރިޗް 14 އިން 20 ވަނަ ދުވަހުގެ ނިޔަލަށް ސިލްސިލާ ގޮތެއްގައި ބޭއްވުނު މި ބައްދަލުވުންތަކަކީ ކޮވިޑް-19ގެ ހާލަތާ ގުޅިގެން މަޤާމް ހަވާލުކުރުން ލަސްވަމުންދާތީ، އެމް.އެން.ޔޫ.އެސް.ޔޫގެ ގޮފިތަކަށް އަލަށް ހޮވުނު ހިންގާ ކޮމެޓީތަކުގެ މެމްބަރުންނަށް ދޭންޖެހޭ ބައެއް މައުލޫމާތު ދިނުމަށް ބޭއްވުނު ބައްދަލުވުން ތަކެކެވެ.

މި ބައްދަލުވުންތަކުގައި އެމް.އެން.ޔޫ.އެސް.ޔޫ ހިންގާ ކޮމެޓީގެ މެމްބަރުންނާއި، އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ މެމްބަރުންގެ އިތުރުން، ކުރިން ހިންގާ ކޮމެޓީގައި މަސައްކަތްކޮށްފައިވާ މެމްބަރުން ބައިވެރިވިއެވެ.

މި ބައްދަލުވުންތަކުގައި ވަނީ ގޮފިތައް ހިންގުމުގައި އަމަލުކުރަން ޖެހޭ އުސޫލުތަކާއި، އެމް.އެން.ޔޫ.އެސް.ޔޫގެ ދަށުން ގޮފިތަކުގެ ހިންގުން ހަރުދަނާކޮށް ގޮފިތަށް ބާރުވެރި ކުރެވޭނެ ގޮތްތަކާ މެދު މަޝްވަރާ ކުރެވިފައެވެ. އަދި ގޮފިތަށް ހިންގުމުގައި ދިމާވާ ދަތިތަކާއި މެދު މަޝްވަރާ ކުރެވި އައު ހިންގާ ކޮމެޓީއިން ކުރަން ރާވާފައިވާ ކަންކަން ވަނީ ހިއްސާ ކުރެވިފައެވެ.

ކޮންމެ އަހަރަކުވެސް ގޮފިތަކުގެ އައު ހިންގާ ކޮމެޓީ ހަވާލުވުމާއި އެކުވެސް އެމް.އެން.ޔޫ.އެސް.ޔޫ އިން ބައްދަލުކޮށް މަޝްވަރާތަށް ކުރިޔަށް ގެންދެއެވެ. މީގެ އިތުރުން ގޮފިތަކުގެ ހިންގާ ކޮމެޓީއާ ހަވާލުވާ ފަރާތްތަކަށް ތަމްރީނު ޕްރޮގްރާމްތަކެއް އެމް.އެން.ޔޫ.އެސް.ޔޫ އިން އަންނަނީ ބާއްވަމުންނެވެ.