ޔޫރޯ 2020 ފުޓްބޯޅަ މުބާރާތާ ދިމާކޮށް އެމް.އެން.ޔޫ ދަރިވަރުންގެ ޔޫނިއަން އިން އިންތިޒާމުކޮށްގެން ކުރިއަށް ގެންދިޔަ ”ޕްރޯ ސޮކާ ލޮކްޑައުން ޔޫރޯ ފޯރި“ މުބާރާތުގެ އެއްވަނަ މުޙައްމަދު މައިޝާން ހޯދައިފިއެވެ.
ޖުމްލަ 73 ޕޮއިންޓާއެކު މައިޝާން އެއްވަނަ ހޯދިއިރު މައިޝާން، 72 ޕޮއިންޓާއެކު ދެވަނަ ހޯދާފައިވަނީ ޙުސައިން ރާއިފެވެ. އަދި 70 ޕޮއިންޓާއެކު ތިންވަނަ ހޯދާފައިވަނީ ޙުސައިން ފިރާޤެވެ.
ޢާންމުންނަށް ބައިވެރިވެވޭ ގޮތަށް ކުރިއަށް ގެންދިޔަ މި މުބާރާތުގައި ޖުމްލަ 7 ބުރެއް ހިމެނެއެވެ. ކޮންމެ ބުރަކުން އެއްވަނައަށް ދިޔަ ފަރާތަށް އެމް.އެން.ޔޫ.އެސް.ޔޫ އިން ޚާއްޞަ އިނާމެއް ދީފައިވާއިރު، މުޅި މުބާރާތުގެ އެއްވަނަ ދެވަނަ އަދި ތިންވަނަ އަށް ވެސް އަގުހުރި އިނާމުތައް ވަނީ ދީފައެވެ. މިގޮތުން މުޅި މުބާރާތުގެ އެއްވަނަ އަށް މުބާރާތުގެ މެއިން ސްޕޮންސަރ ”ޕްރޯ ސޮކާ“ގެ ފަރާތުން ބޭނުން ސައިޒެއްގެ ބޫޓެއް ދީފައިވާއިރު، ދެވަނަ އަށް ދިޔަ ފަރާތަށް އެމް.އެން.ޔޫ.އެސް.ޔޫގެ ފަރާތުން ފުޓްސަލް ބޯޅައެއް ވަނީ ދީފައެވެ. އަދި ތިންވަނަ އަށް ދިޔަ ފަރާތަށް އެމް.އެން.ޔޫ.އެސް.ޔޫގެ ފަރާތުން ދީފައިވަނީ އެފަރާތުން ބޭނުންވާ ޓީމެއްގެ ޖާރޒީއެކެވެ.
މިފަދަ ބޮޑު މަހެއްހާ ދުވަހުގެ އިވެންޓެއް ކުރިއަށް މިގެންދެވުނީ ވަރަށް ގިނަ ބައެއްގެ ބުރަ މަސައްކަތާއި ހީވާގިކަމުން އަދި ސްޕޮންސަރ ދެއްވި ދީލަތި ފަރާތްތަކުގެ އެހީތެރިކަމާއެކު. އެހެންކަމުން ޚާއްސަކޮށް އެމްއެންޔޫއެސްޔޫ މީޑިއާ އަދި ހިންގުންތެރި ލީޑަރުންނަށް އިޚްލާސްތެރިކަމާއެކު ޝުކުރު ދަންނަވަން. އަދި މި ޝުކުރުގައި ސްޕޮންސަރުންގެ ނަން ފާހަގަކޮށް ޝުކުރު އަރިސްކުރަން.
– ރައީސް ޝަހުނީޒް –
މި މުބާރާތާ ގުޅޭ ގޮތުން އިތުރަށް ވާހަކަ ދައްކަވަމުން ރައީސް ޝަހުނީޒް ވިދާޅުވީ މި ޙަރަކާތަކީ އެމް.އެން.ޔޫ.އެސް.ޔޫ އަށް އާ ތަޖުރިބާތަކެއް ލިބުނު ޙަރަކާތެއް ކަމަށާއި، ކުރިއަށް އޮތް އެފްޕީއެލް ކުރިއަށް ގެންދިއުމަށް ލިބުނު މުޙިއްމު ތަޖުރިބާތަކެއް ކަމަށެވެ.
މުބާރާތުގެ އެއްވަނަ އަށް ދިޔަ ފަރާތަށް އިނާމު ހަވާލުކޮށްފައިވަނީ އެމް.އެން.ޔޫ.އެސް.ޔޫގެ 7 ވަނަ ދައުރުގެ ރައީސް މުޙައްމަދު ޝާން ޢާމިރެވެ. ދެވަނަ އަށް ދިޔަ ފަރާތަށް އިނާމު ޙަވާލުކޮށްފައިވަނީ އެމް.އެން.ޔޫ.އެސް.ޔޫގެ ނައިބު ރައީސް (ގޮފިތައް) ޙުސައިން ޒައިދު ކަމަށްވާއިރު، ތިންވަނަ އަށް ދިޔަ ފަރާތަށް އިނާމު ޙަވާލުކޮށްފައިވަނީ އެމް.އެން.ޔޫ.އެސް.ޔޫގެ 8 ވަނަ ދައުރުގެ މީޑިއާ ކޯޑިނޭޓަރ މުޙައްމަދު އަހުނަފެވެ.
މުބާރާތުގެ ފޯރި އިތުރުކުރުމުގެ ގޮތުން މުބާރާތުގެ ތެރެއިން ގިވް އަވޭ އެއް ވެސް ވަނީ ކުރިއަށް ގެންގޮސްފައެވެ. މިގޮތުން ގިވް އަވޭ އަށް އެމް.އެން.ޔޫ.އެސް.ޔޫ އިން ހުށަހަޅާފައިވާ އިނާމު (ޖާރޒީއެއް) ލިބިފައިވަނީ މާރިޔަތު އުނޫޝާއަށެވެ.
މި މުބާރާތުގެ މަޤްޞަދަކީ ޔޫރޯ މުބާރާތުގެ ފޯރި އާންމުންގެ ތެރޭގައި އިތުރުކުރުމާއި، މާލޭގެ ފުރަބަންދު ޙާލަތުގައި ގޭގައި ތިބެގެން ޝައުޤުވެރިކަމާއެކު ބައިވެރިވެވޭނެ ޙަރަކާތެއް ޢާންމުންނާ ހަމައަށް ގެނެސްދިނުމެވެ. މުބާރާތުގެ މެއިން ސްޕޮންސަރ އަކީ ”ޕްރޯ ސޮކާ“ އެވެ.
