ނޭކަ އާއިއެކު ގިނަ ހަރަކާތްތަކެއް އެމް.އެން.ޔޫ.އެސް.ޔޫ އިން ކުރިއަށް ގެންގޮސްފި

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ތިނަދޫ ކެމްޕަހުގެ ގޮފި ނޭކަ އާއިއެކު އެމް.އެން.ޔޫ.އެސް.ޔޫގެ ޓީމުން ގިނަ ހަރަކާތްތަކެއް ކުރިއަށް ގެންގޮސްފި އެވެ.

ހުކުރު ދުވަހުގެ މެންދުރުފަހު ތިނަދޫ ކެމްޕަސް ދަނާލު ހިމެނޭ ސަރަހައްދުގައި ކުރިޔަށްދިޔަ ހަރަކާތްތަކުގެ ތެރޭގައި ބެޑްމިންޓަން އަށް ދަރިވަރުން އަހުލުވެރިކުރުވުމަށާއި ހަރަކާތްތައް ރާވާ ހިންގާނެ ގޮތް ވަނީ ކިޔައިދީފަ އެވެ.

އެމް.އެން.ޔޫ.އެސް.ޔޫގެ ރައީސް އަބްދުﷲ ޝަހުނީޒް ވިދާޅުވީ، މިހަރަކާތްތަކުގެ މަޤްސަދަކީ އެކުވެރި މާހައުލެއްގައި ދަރިވަރުން ލީޑަރޝިޕްގެ މުހިންމުކަމާއި ހަރަކާތްތައް ހިންގާ ރޭވުމުގައި ހުންނާނެ ގޮންޖެހުންތަކާއި އެކަމުން އަރައިގަންނާނެ ގޮތް ދަރިވަރުންނަށް ކިޔައިދިނުން ކަމަށެވެ.

”މިހަރަކާތްތައް ކުރިއަށް މިގެންދިޔައީ ދަރިވަރުންނަށް ކަންކަން ރާވާ އިންތިޒާމް ކުރުމުގައި ގިނަ ގޮންޖެހުންތަކެއް ހުންނާނެކަން ވިސްނައިދިނުމަށާއި އެފަދަ ހާލަތްތަކުގައި ދިމާވާ މައްސަލަތަކަށް ޓެކުލްކުރަން ދަސްކޮށް ދިނުމާއި އެންމެން ގުޅިގެން ކަންކަން ރާވާ އިންތިޒާމްކުރުމުގެ މުހިންމުކަމާ އެ ހުނަރު ކުދިންގެ މެދުގައި އާލާކުރުމަށް“

މީގެ އިތުރުން ހުކުރު ދުވަހުގެ ހަވީރު ވަނީ ނޭކައިގެ ދަރިވަރުންނާއެކު ޓީމް ބިލްޑިންގެ ކުޅިވަރުތަކެއްގެ އިތުރުން މިނީ ވޮލީ ކުޅެފައެވެ. އަދި ދަރިވަރުންނާއެކު ގުޅުން ބަދަހިކުރުމަށް ބާބެކިއުއެއް ހުކުރުދުވަހުގެ ރޭ ކުރިއަށް ގެންދެވުނެވެ.

މީގެ އިތުރުން ނޭކައިގެ ދަރިވަރުން ވަނީ އެދަރިވަރުންގެ ހުރި ކަންބޮޑުވުންތައް އެމް.އެން.ޔޫ.އެސް.ޔޫގެ ޓީމާއި ހިއްސާ ކޮށްފަ އެވެ.

ތިނަދޫ ކެމްޕަސް ދަތުރު ލީޑު ކުރަމުން އަންނަނީ އެމް.އެން.ޔޫ.އެސް.ޔޫގެ ރައީސް އަބްދުﷲ ޝަހުނީޒެވެ. ޝަހުނީޒާއިއެކު، މި ދަތުރުގައި އެމް.އެން.ޔޫ.އެސް.ޔޫގެ ނައިބު ރައީސް (ގޮފިތައް) ހުސައިން ޒައިދު، އެސިސްޓެންޓް ސެކެޓްރީ އާއިޝަތު އީފާ އިބްރާހީމް، އެމް.އެން.ޔޫ.އެސް.ޔޫގެ 8 ވަނަ ދައުރުގެ މީޑިއާ ކޯޑިނޭޓަރު މުޙައްމަދު އަޙްނަފް އަދި ލީޑާސް ގްރޫޕްގެ މެމްބަރުން ކަމަށްވާ ރީޝަމް ހުސައިން އާއި ޢާއިޝަތު ޒައިނާ ހަސަން ބައިވެރިވެއެވެ.