ވޮލީއަށް ތައްޔާރުކުރާ މީޑިއާ ޓީމުގެ ތަމްރީނުތައް ފަށައިފި

ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ ދެވަނައަށް އެންމެ ބޮޑު މުބާރާތް ކަމަށްވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ މީޑިއާ ޓީމުގެ ތަމްރީނު ޕްރޮގްރާމްތައް ފަށައިފިއެވެ.

21 ސެޕްޓެމްބަރ 2021 ވީ އަންގާރަ ދުވަހު އޭ ބްލޮކްގެ ކްލާސް ރޫމުގައި ބޭއްވި މި ތަމްރީން ޕްރޮގްރާމްގައި އެމް.އެން.ޔޫ.އެސް.ޔޫ ގެ މީޑިއާ ޕްލެޓްފޯމްތަކަށް މެމްބަރުން އަހުލުވެރިކުރެވިގެން ދިޔައެވެ. މީގެއިތުރުން މި ތަމްރީން ޕްރޮގްރާމްގައި ވީހާވެސް ގިނަ ބަޔަކަށް މެޗުގެ އެންމެ ފަހުގެ އަޕްޑޭޓްތައް ފޯރުކޮށްދޭނެ ގޮތް ކިޔައިދީފައިވެއެވެ.

މި ޕްރޮގްރާމް ނަންގަވައިދެއްވީ އެމް.އެން.ޔޫ.އެސް.ޔޫގެ 6 ވަނަ ދައުރުގެ މީޑިއާ ކޯޑިނޭޓަރ އަދި 7 ވަނަ ދައުރުގެ ރައީސް މުހައްމަދު ޝާން އާމިރެވެ.

މި ސެޝަނުގައި ވާހަކަ ދައްކަވަމުން ޝާން ވިދާޅުވީ މީޑިއާއާއި ނުލައި އެއްވެސް އިވެންޓެއް ފުރިހަމަ ނުވާނެކަމަށެވެ.

މިއީ އެމް.އެން.ޔޫ.އެސް.ޔޫއިން ކޮންމެ އަހަރަކުވެސް ވޮލީ މުބާރާތުގެ ކުރިން ދަރިވަރުން ތަމްރީނު ކުރުމަށް ބާއްވަމުން ގެންދާ ތަމްރީން ޕްރޮގްރާމެކެވެ.

މިއަހަރުގެ މުބާރާތުގައި އަންހެން ޑިވިޝަނުގައި 7 ފެކަލްޓީއިން ބައިވެރިވާއިރު އަންހެން ޑިވިޝަނުގައި ފުރަތަމަ ފަހަރަށް އަތޮޅު ކެމްޕަހަކުން ވަނީ ބައިވެރިވެފައެވެ. އެއީ ލ. ގަން ކެމްޕަހުގެ އަންހެން ޓީމެވެ. މީގެ އިތުރުން ފިރިހެން ޑިވިޝަނުގައި 7 ފެކަލްޓީއަކުން ވަނީ ބައިވެރިވެފައެވެ.