ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުން އިމްތިޒާމުކޮށްގެން ބާއްވާ 7 ވަނަ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2021″ ސެޕްޓެންބަރު 23ވީ ބުރާސްފަތި ދުވަހުގެރޭ ފަށައިފިއެވެ.
މި މުބާރާތުގެ ފެށުމުގެ ރަސްމިއްޔާތު ކުރިޔަށް ދިޔައީ މުބާރާތް ބާއްވަން ހަމަޖެހިފައިވާ އެމް.އެން.ޔޫ ޕީ.އީ ހޯލުގައެވެ. މުބާރާތުގެ ފެށުމުގެ ރަސްމިއްޔާތު ޝަރަފުވެރި ކޮށްދެއްވީ ދިވެހިރާއްޖޭގެ ޤައުމީ ޔުނިވަރސިޓީގެ ޑެޕިއުޓީ ވައިސް ޗާންސެލަރ އަލްފާޞިލް ހުސައިން ހަލީމެވެ. މި ރަސްމިއްޔާތުގައި ޑެޕިއުޓީ ވައިސް ޗާންސެލަރގެ އިތުރުން ވޮލީބޯޅަ އެސޯސިއޭޝަން ގެ ރައީސް އަލްފާޞިލް މުހައްމަދު ރަނޭޝް، ޑީން އޮފް ސްޓޫޑެންޓްސް އަލްފާޟިލާ އާޝިޔާ ލީލާ އާއި، ފެކަލްޓީތަކުގެ ޑީނުންނާއި އެމް.އެން.ޔޫ.އެސް.ޔޫގެ ހިންގާ ކޮމެޓީގެ މެންބަރުންނާއި އެމް.އެން.ޔޫ.އެސް.ޔޫ އެޑްވައިޒަރީ ބޯޑު މެންބަރުންގެ އިތުރުން މުބާރާތުގެ ހިންގާ ކޮމެޓީގެ މެމްބަރުންވެސް ބައިވެރިވެވަޑައިގެންނެވިއެވެ.
މި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން އެމް.އެން.ޔޫގެ ޑެޕިއުޓީ ވައިސް ޗާންސެލަރ އަލްފާޞިލް ހުސައިން ހަލީމް ވަނީ ކިޔެވުމާއި އިތުރު ހަރަކާތްތަކާއި ގުޅޭގޮތުން ވާހަކަފުޅު ދައްކަވާފައެވެ. އެގޮތުން ޑެޕިއުޓީ ވައިސް ޗާންސެލަރ ވިދާޅުވީ، ކިޔެވުމާއި އެއްވަރަށް ކުޅިވަރާއިއެކި ހަރަކާތް ތަކުގައި ބައިވެރިވުމުގެ މުހިންމުކަމަށް ވަނީ އަލި އަޅުވާލައިފައެވެ. އަދި މީގެ އިތުރުން މިފަހަރު ފުރަތަމަ ފަހަރަށް ރާއްޖެތެރޭގެ ކެމްޕަހަކުން މަލޭ ސިޓީއަށް، މި މުބާރާތުގައި ބައިވެރިވުމަށް އައިސްފައި ވާތީ އެކަން ފާހަގަކޮށް އެކުދިން ކުރި ހިތްވަރަށް ތައުރީފުކޮށް އެކަން ވަނީ ފާހަގަ ކުރައްވާފައެވެ. އަދި ކުރިއަށް އޮތް ތަނުގަ އެހެން ކެމްޕަސް ތަކުގެ ކުދިންވެސް މިފަދަ ހިތްވަރެއް ދައްކާނެ ކަމަށް އުންމީދު ކުރާ ކަމުގައި ވިދާޅުވެފައިވެއެވެ.
މި ރަސްމިއްޔާތުގައި ވާހަކަ ދައްކަވަމުން ވޮލީބޯޅަ އެސޯސިއޭޝަނުގެ ރައީސް މުޙައްމަދު ރަނޭޝް (ރަނޭ) ވިދާޅުވީ، ވޮލީބޯޅަ ކުރިއެރުވުމަށް އެމް.އެން.ޔޫ.އެސް.ޔޫއިން ކުރަމުން ގެންދާ މަސައްކަތައް ޝުކުރުއަދާ ކުރައްވާފައެވެ. މީގެ އިތުރުން ރަނޭ ވިދާޅުވީ، މިހާތަނަށް ވޮލީ އެސޯސިއޭޝަނަށް ޔޫނިއަނުން ކުރިޔަށް ގެންދާ ހަރަކާތްތަކަށް އެހީވެދެވިފައި ނުވާ ކަމަށާއި، އެކަމަކު ކުރިޔަށް އޮތް ތަނުގައި އެމް.އެން.ޔޫ.އެސް.ޔޫ އާއި ގުޅިގެން ވީއޭއެމްއަށް ހަރަކާތްތަކެއް ކުރިޔަށް ގެންދެވޭނެ ކަމަށް އުންމީދު ކުރައްވާ ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ ރައީސް އަބްދުﷲ ޝަހުނީޒް ވަނީ މި މުބާރާތުގެ އެކި ކަންކަމަށް އެހީތެރިވެދިން ސްޕޮންސަރުންނާއި، ހެޔޮއެދޭ ފަރާތްތަކަށް ޝުކުރުއަދާ ކުރައްވާފައެވެ. އަދި މިފަދަ މުބާރާތްތައް ބޭއްވުމުގައި ޔުނިވަރސިޓީގެ މެނޭޖުމަންޓުން ވެދެއްވާ އެހީ ފާހަގަ ކުރައްވާ އެކަމަށް ޝުކުރުއަދާ ކުރައްވާފައިވެއެވެ.
މި މުބާރާތުގެ ޗެއާ އަދި އެމް.އެން.ޔޫ.އެސް.ޔޫގެ ނައިބު ރައީސް (ގޮފިތައް) ހުސައިން ޒައިދު ވަނީ މި މުބާރާތުގެ ތައާރަފެއް ދެއްވާފައެވެ. އަދި ނިމިދިޔަ މުބާރާތް ނިމުނު ދުވަހަކީ ރާއްޖެއިން ކޮވިޑްގެ ފުރަތަމަ ކޭސް ފެނުނު ދުވަސް ކަމަށާއި، އަދި ކޮވިޑާއިއެކު ޔޫނިއަންގެ ހަރަކާތްތައް ކުރިޔަށް ގެންދަން ޖެހުނީ ގޮންޖެހުންތަކަކާއިއެކު ކަމަށެވެ. އެހެންނަމަވެސް މިއަހަރުގެ މުބާރާތް މި ފެށިގެން ދަނީ ކޮވިޑްގެ ހާލަތުން ކޮންމެސް ވަރަކަށް އަރައިގަނެވިފައިވާ ދަނޑިވަޅެއްގައި ކަމަށާއި، އެހެންކަމުން ޔޫނިއަންގެ ދުވެލި ކުރިޔަށް އޮތް ތަނުގައި ދެގުނަ ހަލުވިވާނެ ކަމަށް ވިދާޅުވެފައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީހީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
