ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނައަށް އެންމެ ބޮޑު މުބާރާތް ކަމަށްވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ ފިރިހެން ޑިވިޝަނުގެ ސެންޓަރ ފޯރ ފައުންޑޭޝަން ސްޓަޑީސް (ސީ.އެފް.އެސް) އަދި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީސް (އެފް.އެޗް.ޓީ.އެސް) ކުޅުނު މެޗުތަކުން ފަސޭހަ ކަމާއެކު މޮޅުވެއްޖެ އެވެ.
ހުކުރު ދުވަހުގެ މެންދުރު ފިރިހެން ޑިވިޝަންގެ ގްރޫޕް ”އޭ“ ގައި ސީ.އެފް.އެސް އިން ކުޅުނު ފުރަތަމަ މެޗު ކާމިޔާބުކުރީ ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އާ ވާދަކޮށެވެ.
މި މެޗު 25-16 އަދި 25-20ގެ ނަތީޖާތަކުން ސީދާ 2 ސެޓުން ސީ.އެފް.އެސް ކާމިޔާބުކުރިއިރު، މި މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ ސީ.އެފް.އެސް ގެ ޖާޒީ ނަމްބަރު 4 އަލީ ނިމާލް އެވެ.
މީގެ އިތުރުން ހުކުރު ދުވަހުގެ މެންދުރު ގުރޫޕް ”ބީ“ ގެ ފުރަތަމަ މެޗު އެފް.އެޗް.ޓީ.އެސް އަދި ފެކަލްޓީ އޮފް ޝަރީއާ އެންޑް ލޯ (އެފް.އެސް.އެލް) ބައްދަލުކޮށް 25-8 އަދި 25-6ގެ ބޮޑު ތަފާތަކުން ސީދާ 2 ސެޓުން ކާމިޔާބު ކުރީ އެފް.އެޗް.ޓީ.އެސް އިންނެވެ. މި މެޗްގެ އެންމެ މޮޅު ކުޅުންތެރިޔަކަށް ހޮވިފައިވަނީ އެފް.އެޗް.ޓީ.އެސް ގެ ޖާޒީ ނަމްބަރު 14 އަހުމަދު އަނަސް އެވެ.
މި މުބާރާތުގެ މެޗުތައް މިއަދު ހަވީރު އަދި ރޭގަނޑު ވެސް ކުޅުމަށް ވަނީ ހަމަޖެހިފައެވެ. އެގޮތުން ހަވީރުގެ ފުރަތަމަ މެޗުގައި ބައްދަލުކުރާނީ އަންހެން ޑިވިޝަނުގެ ގުރޫޕް ”އޭ“ އިން ސެންޓަރ ފޯރ ފައުންޑޭޝަން ސްޓަޑީސް (ސީ.އެފް.އެސް) އަދި ފެކަލްޓީ އޮފް ހެލްތް ސައިންސެސް (އެފް.އެޗް.އެސް) އެވެ. އަދި ދެވަނަ މެޗުގައި އަންހެން ޑިވިޝަނުގެ ގުރޫޕް ”ބީ“ އިން އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) އާއި ފެކަލްޓީ އޮފް އެޑިއުކޭޝަން (އެފް.އީ) އިން ވާދަކުރާނެއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީހީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
