ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނަ އަށް އެންމެ ބޮޑު މުބާރާތް ކަމަށްވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ އަންހެން ޑިވިޝަނުގައި ސެންޓަރ ފޯރ ފައުންޑޭޝަން ސްޓަޑީސް (ސީ.އެފް.އެސް) އާއި ފެކަލްޓީ އޮފް ހެލްތް ސައިންސް (އެފް.އެޗް.އެސް) ބައްދަލުކުރި މެޗު ފަސޭހަ ކަމާއެކު އެފް.އެޗް.އެސްއިން ކާމިޔާބު ކޮށްފިއެވެ.
ހުކުރު ދުވަހުގެ ހަވީރު އަންހެން ޑިވިޝަންގެ ގްރޫޕް ”އޭ“ ގައި އެފް.އެޗް.އެސް އިން ކުޅުނު ފުރަތަމަ މެޗު ކާމިޔާބުކުރީ ސީ.އެފް.އެސް އާ ވާދަކޮށް ސީދާ ދެ ސެޓުގެ ނަތީޖާ އަކުންނެވެ.
މި މެޗުގެ ސެޓުތައް އެފް.އެޗް.އެސް އިން ގެންދިޔައީ 25-23 އަދި 25-10ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ އެފް.އެޗް.އެސްގެ ޖާޒީ ނަމްބަރު 16 އާމިނަތު އަފާފް ނިޒާމެވެ.
މީގެ އިތުރުން ހުކުރު ދުވަހުގެ ރޭ ގުރޫޕް ”އޭ“ ގައި އެމް.އެން.ޔޫ ބިޒްނަސް ސްކޫލް އަދި ފެކަލްޓީ އޮފް އެޑިއުކޭޝަން (އެފް.އީ) ބައްދަލުކޮށް 25-6 އަދި 25-12ގެ ބޮޑު ތަފާތަކުން ސީދާ 2 ސެޓުކާމިޔާބު ކުރީ އެމް.އެން.ޔޫ ބިޒްނަސް ސްކޫލުންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެމް.އެން.ޔޫ.ބީ.އެސް ގެ ޖާޒީ ނަމްބަރު 05 ޝަމްހާ ރިޔާޒް އެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީހީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
