ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނައަށް އެންމެ ބޮޑު މުބާރާތް ކަމަށްވާ ”އެމް.އެން.ޔޫ.އެސް.ޔޫގެ އިންޓަރ ފެކަލްޓީ ވޮލީބޯޅަ މުބާރާތް 2021“ ގެ ގްރޫޕް ”އޭ“ ގައި ފެކަލްޓީ އޮފް އެޑިއުކޭޝަން (އެފް.އީ) އަދި އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) ކުޅުނު މެޗުތަކުން މޮޅުވެ ސެމީ ފައިނަލުން ޖާގަ ހޯދައިފިއެވެ.
ހޮނިހިރު ދުވަހުގެ ހަވީރު ފެކަލްޓީ އޮފް ޝަރީއާ އެންޑް ލޯ އާއި ދެކޮޅަށް ކުޅުނު މެޗު އެފް.އީ އިން ކާމިޔާބުކުރީ ސީދާ ދެ ސެޓުންނެވެ. އެއާއިއެކު އެފް.އީ އިން ވަނީ ގްރޫޕް ސްޓޭޖުގައި ކުޅުނު ދެ މެޗު ކާމިޔާބުކޮށް ސެމީ ފައިނަލުގެ ޖާގަ ކަށަވަރުކޮށްފައެވެ. ހޮނިހިރު ދުވަހުގެ ހަވީރު ކުޅުނު މެޗުގެ ސެޓުތައް އެފް.އީ އިން ގެންދިޔައީ 25-16 އަދި 25-12 އިންނެވެ. މި މެޗުގެ މޮޅު ކުޅުންތެރިޔަކީ އެފް.އީގެ ޖާޒީ ނަމްބަރު 7 ޝިރާނީ އަބްދުﷲ އެވެ.
މީގެ އިތުރުން ހޮނިހިރު ދުވަހުގެރޭ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އާއި ދެކޮޅަށް އެމް.އެން.ޔޫ ބިޒްނަސް ސްކޫލުން ކުޅުނު މެޗު އެމް.އެން.ޔޫ ބިޒްނަސް ސްކޫލުން ކާމިޔާބުކުރީ ސީދާ ދެ ސެޓުންނެވެ. އެއާއިއެކު ގްރޫޕް ސްޓޭޖުގައި ކުޅުނު ދެ މެޗު ކާމިޔާބުކޮށް އެމް.އެން.ޔޫ ބިޒްނަސް ސްކޫލުން ވަނީ މި މުބާރާތުގެ ސެމީ ފައިނަލުން ޖާގަ ހޯދާފައެވެ. މި މެޗުގެ ސެޓުތައް އެމް.އެން.ޔޫ ބިޒްނަސް ސްކޫލުން ގެންދިޔައީ 25-12 އަދި 25 – 8 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ އެމް.އެން.ޔޫ ބިޒްނަސް ސްކޫލުގެ ޖާޒީ ނަމްބަރު 11 ފިރުޝާނާ ނަސީރެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީހީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
