ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނައަށް އެންމެ ބޮޑު މުބާރާތް ކަމަށްވާ ”އެމް.އެން.ޔޫ.އެސް.ޔޫގެ އިންޓަރ ފެކަލްޓީ ވޮލީބޯޅަ މުބާރާތް 2021“ ގެ ގްރޫޕް ”އޭ“ ގައި ފެކަލްޓީ އޮފް އެޑިއުކޭޝަން (އެފް.އީ) އަދި އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) ކުޅުނު މެޗުތަކުން މޮޅުވެ ސެމީ ފައިނަލުން ޖާގަ ހޯދައިފިއެވެ.
ހޮނިހިރު ދުވަހުގެ ރޭގަނޑު ފެކަލްޓީ އޮފް ހެލްތް ސައިންސަސް (އެފް.އެޗް.އެސް) އާއި ދެކޮޅަށް ކުޅުނު މެޗު އެމް.އެން.ޔޫ ބިސްނަސް ސްކޫލާއި އިން ކާމިޔާބުކުރީ ސީދާ ދެ ސެޓުންނެވެ. އެއާއިއެކު އެމް.އެން.ޔޫ.ބީ.އެސް އިން ވަނީ ގްރޫޕް ސްޓޭޖުގައި ކުޅުނު ދެ މެޗު ކާމިޔާބުކޮށް ސެމީ ފައިނަލުގެ ޖާގަ ކަށަވަރުކޮށްފައެވެ. ހޮނިހިރު ދުވަހުގެ ރޭގަނޑު ކުޅުނު މެޗުގެ ސެޓުތައް އެމް.އެން.ޔޫ.ބީއެސް އިން ގެންދިޔައީ 23-25 އަދި 21-25 އިންނެވެ. މި މެޗުގެ މޮޅު ކުޅުންތެރިޔަކީ އެމް.އެން.ޔޫ.ބީ.އެސްގެ ޖާޒީ ނަމްބަރު 12 އިބްރާހިމް ރަޒީނެވެ.
މީގެ އިތުރުން ހޮނިހިރު ދުވަހުގެރޭ ފެކަލްޓީ އޮފް އިންޖިނިއަރިންގް،ސައިންސް އެންޑް ޓެކްނޮލޮޖީ (ފެސްޓް) އާއި ދެކޮޅަށް ސެންޓަރ ފޮރ ފައުންޑޭޝަން ސްޓަޑީސް (ސީ.އެފް.އެސް) އިން ކުޅުނު މެޗު ސީ.އެފް.އެސް އިން ކާމިޔާބުކުރީ ސީދާ ދެ ސެޓުންނެވެ. އެއާއިއެކު ގްރޫޕް ސްޓޭޖުގައި ކުޅުނު ދެ މެޗު ކާމިޔާބުކޮށް ސީ.އެފް.އެސް އިން ވަނީ މި މުބާރާތުގެ ސެމީ ފައިނަލުން ޖާގަ ހޯދާފައެވެ. މި މެޗުގެ ސެޓުތައް ސީ.އެފް.އެސް އިން ގެންދިޔައީ 15-25 އަދި 25-14 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ސީ.އެފް.އެސްގެ ޖާޒީ ނަމްބަރު 09 އަލީ ނާއިފެވެ.
ހަމަ އެއާއެކު ހޮނިހިރު ދުވަހުގެ ރޭގަނޑު ސްކޫލް އޮފް ނާސިންގް (އެސް.އެން) އާއި ފެކަލްޓީ އޮފް ހޮސްޕިޓަލިޓީ އެންޑް ޓުއަރިޒަމް ސްޓަޑީސް (އެފް.އެޗް.ޓީ.އެސް) ބައްދަލުކުރި މެޗު އެފް.އެޗް.ޓީ.އެސް އިން ކާމިޔާބުކުރީ ދެ ސެޓު އެއް ސެޓުންނެވެ. ފުރަތަމަ ސެޓު 20-25 ގެ ނަތީޖާ އަކުން އެސް.އެން ކާމިޔާބު ކޮށްފައިވާއިރު ދެވަނަ ސެޓު އެފް.އެޗް.ޓީ.އެސް އިން ކާމިޔާބުކުރީ 25-15 ގެ ނަތީޖާއަކުންނެވެ. އަދި ވާދަވެރި ކުޅުމެއް ފެނިގެންދިޔަ މެޗުގެ ތިންވަނަ ސެޓު އެފް.އެޗް.ޓީ.އެސް އިން ކާމިޔާބުކޮށްފައިވަނީ 15-8 ގެ ނަތީޖާއަކުން އެފް.އެޗް.ޓީ.އެސް އިންނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ އެފް.އެޗް.ޓީ.އެސްގެ ޖާޒީ ނަމްބަރު 11 އިބްރާހިމް އަޝްހަމެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީހީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
