އަންހެން ޑިވިޝަނުން އެސް.އެން އަދި އެފް.އެޗް.އެސް ސެމީއަށް

އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގައި އާދީއްތަދުވަހުގެރޭ ކުޅުނު މެޗުތަކުން އެސް.އެން އަދި އެފް.އެޗް.އެސް މޮޅުވެއްޖެއެވެ.

އާދިއްތަ ދުވަހުގެރޭ އަންހެން ޑިވިޝަންގެ ގުރޫޕް ”ބީ“ ގައި ސްކޫލް އޮފް ނާރސިންގ (އެސް.އެން) އަދި ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) ބައްދަލުކުރި މެޗު ފަސޭހަ ކަމާއެކު ސީދާ ދެ ސެޓުން އެސް.އެން ކާމިޔާބުކޮށްފި އެވެ.

މި މެޗު 25-8 އަދި 25-14 ގެ ނަތީޖާތަކުން އެސް.އެން ކާމިޔާބުކުރިއިރު މިމެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެސް.އެންގެ ޖާރޒީ ނަމްބަރު 17 އިލްޙާމާ ފަރީދެވެ. މި ނަތީޖާ އާއި އެކު އެސް.އެން ވަނީ ކުޅުނު ތިންމެޗު ވެސް ކާމިޔާބުކޮށް ގުރޫޕްގެ އެއްވަނައިގައި ސެމީ ފައިނަލަށް ދަތުރުކޮށްފައެވެ.

މީގެ އިތުރުން އާދިއްތަ ދުވަހުގެރޭ ކުޅެވުނު ދެވަނަ މެޗުގައި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) ވަނީ ފަސޭހަކަމާއެކު ގަން ކެމްޕަސް އަތުން މޮޅުވެފަ އެވެ. މެޗުގެ ސެޓުތައް އެފް.އެޗް.އެސް އިން ގެންގޮސްފައިވަނީ 25-11 އަދި 25-11 ގެ ނަތީޖާ އަކުންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެފް.އެޗް.އެސް ގެ ޖާރޒީ ނަމްބަރު 8 އަސްމާ އަބްދުލް ރައްޒާޤް އެވެ.

މި މުބާރާތުގައި ކުރިޔަށް ދެން އޮތީ މުބާރާތުގެ ގުރޫޕް ސްޓޭޖްގެ ފަހު ތިންމެޗެވެ. އެއީ ފިރިހެން ޑިވިޝަންގެ އެފް.އީ.އެސް.ޓީ އާއި އެފް.އެޗް.އެސް ބައްދަލުކުރާ މެޗާއި އެމް.އެން.ޔޫ.ބީ.އެސް އަދި ސީ.އެފް.އެސް ބައްދަލުކުރާ މެޗުގެ އިތުރުން އެފް.އެސް.އެލް އާއި އެސް.އެން ބައްދަލުކުރާ މެޗުތަކެވެ.

މިރޭގެ މެޗުތައް ފެށުމުގެ ކުރިން އެސް.އެން ޓީމުގެ ކޯޗު ޝުޢައިބު އަޙްމަދުގެ އަނބިކަނބަލުންގެ މަންމާފުޅު ނިޔާވެފައިވާތީ އެކަމުގެ ހިތާމައިގައި 1 މިނެޓުގެ ސުކޫތެއް ގެނެސްފައެވެ.

އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީހީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.