މިއަންނަ އޮކްޓޫބަރު މަހު ރާއްޖޭގައި ބާއްވާ އުރީދޫ ސާފް ޗެމްޕިއަންޝިޕަށް އަމާޒުކޮށް ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) ބޮޑުބެރު ގްރޫޕުން ފޯރިގަދަ ލަވައެއް ނެރެފިއެވެ.
”ދިދަ ވިހުރޭ ވިހުރޭނޭ“ ގެ ނަމުގައި އެމް.އެން.ޔޫ.އެސް.ޔޫ ބޮޑުބެރު ގުރޫޕުން އުފައްދާފައިވާ މިލަވަ ރިލީޒް ކޮށްފައިވަނީ، 26 ސެޕްޓެންބަރުވީ އާދީއްތަ ދުވަހުގެ ރޭ، އެމް.އެން.ޔޫ.އެސް.ޔޫ ވޮލީމުބާރާތުގެ މެޗުތައް ފެށުމުގެ ކުރިން، އެމް.އެން.ޔޫ ޕީއީ ހޯލް ގައި ބޭއްވި ހާއްސަ ރަސްމިއްޔާތެއްގައެވެ.
މިރަސްމިއްޔާތު ޝަރަފުވެރި ކޮށްދެއްވާފައި ވަނީ ފުޓްބޯޅަ އެސޯސިއޭޝަން އޮފް މޯލްޑިވްސް (އެފް.އޭ.އެމް) ގެ ޖެނެރަލް ސެކްރެޓަރީ ހުސައިން ޖަވާޒާއި، ޖަމުއިއްޔާ ތަކުގެ ރަޖިސްޓްރާރ އަލްފާޟިލް އަހުމަދު އިރާޝްއެވެ. ދަރިވަރުންގެ ޔޫނިއަންގެ ޝަރަފުވެރިކަމުގެ އިނާމު ހާސިލްކޮށްފައިވާ ވަން ޝޮޓް އިވެންޓްސްގެ ސީ.އީ.އޯ އަލްފާޟިލް ޝަރަފުލް އަމީރު ވެސް މި ރަސްމިއްޔާތުގައި ބައިވެރިވެ ވަޑައިގެންނެވި އެވެ. ލަވަ ލޯންޗްކޮށްދެއްވާފައި ވަނީ ޖަވާޒާއި އިރާޝްއެވެ.
މި ލަވައާއި ގުޅޭގޮތުން ޖަވާޒް ވިދާޅުވީ ޒުވާން ދަރިވަރުންތަކެއް އިސްނަގައިގެން މިފަދަ މަސައްކަތެއް ކުރުމުން އެކަމާ ވަރަށް އުފާ ކުރާ ކަމަށެވެ. އަދި ”މިއީ ދިވެހި ހުރިހާ ސަޕޯޓަރުންނަށް ވެސް ހުރި ވަރަށް ރީތި ނަމޫނާއެއް“ ކަމަށް ޖަވާޒް ވިދާޅުވި އެވެ. މީގެ އިތުރުން ދަރިވަރުން ކުރާ މިފަދަ ހުރިހާ މަސައްކަތެއްގައި ވެސް އެފް.އޭ.އެމްގެ ފުރިހަމަ އެއްބާރުލުން ލިބޭނެކަން ޖަވާޒް ފާހަގަ ކުރެއްވިއެވެ.
އެމް.އެން.ޔޫ.އެސް.ޔޫ ގެ ރައީސް އަބްދުﷲ ޝަހުނީޒް ވިދާޅުވީ، ޤައުމީ ކަންކަމަށް ދަރިވަރުންގެ ޔޫނިއަންއިން އަބަދުވެސް ހާއްސަ އިސްކަމެއް ދޭނެ ކަމަށެވެ. އެގޮތުން މިލަވައަކީ ސާފް ޗެމްޕިއަންޝިޕަށް ދިވެހި ސަޕޯޓަރުންގެ ފޯރި އިތުރުކުރުމަށް އެމް.އެން.ޔޫ.އެސް.ޔޫ ބޮޑުބެރު ގުރޫޕުން ކުރި ވަރަށް ބުރަ މަސައްކަތެއް ކަމަށެވެ.
މިލަވައިގެ ޅެން ހެއްދެވީ ދިވެހިބަހުގެ އެކެޑެމީގެ ކުރީގެ ރައީސް އަލްފާޟިލް އަޝްރަފް އަލީއެވެ. މީގެ އިތުރުން އޯޑިއޯ އަދި ވީޑިއޯ ހެދުމުގައި ޕީކް އާއި ޝަރަފުލް އަމީރު އެހީތެރި ވެދެއްވިއެވެ.
އެމް.އެން.ޔޫ.އެސް.ޔޫ ބޮޑުބެރު ގްރޫޕްއަކީ 2019 ވަނަ އަހަރު އުފައްދާފައިވާ ގުރޫޕެކެވެ. ދަރިވަރުންގެ ހުނަރު ކުރިއަރުވާ ފުރުސަތުތައް ތަނަވަސްކޮށްދޭ އެމް.އެން.ޔޫ.އެސް.ޔޫ ބޮޑުބެރު ގްރޫޕުގެ މި ލަވައަކީ މިގްރޫޕުން ޕްރޮޑިއުސް ކުރި ދެވަނަ ލަވައެވެ. ފުރަތަމަ ލަވަ ”އީދު ތަހުނިޔާ“ ރިލީޒް ކޮށްފައިވަނީ މިދިޔަ ފިތުރު ޢީދު ދުވަހުއެވެ.
