ސީ.އެފް.އެސް އަށް އެއްވަނަ، އެސް.އެން ވެސް ސެމީއަށް

އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ ފިރިހެން ޑިވިޝަނުގައި ހޯމަދުވަހުގެރޭ ކުޅުނު މެޗުތަކުން ފެކަލްޓީ އޮފް ހެލްތު ސައިންސަސް، ސެންޓަރ ފޯ ފައުންޑޭޝަން ސްޓަޑީޒް އަދި ސްކޫލް އޮފް ނާރސިންގ މޮޅުވެއްޖެއެވެ.

ހޯމަދުވަހުގެރޭ ފުރަތަމަ ކުޅުނު މެޗުގައި ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ (އެފް.އީ.އެސް.ޓީ) އާއި ވާދަކޮށް ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އިން މެޗު ކާމިޔާބުކުރީ ސީދާ 2 ސެޓުންނެވެ. މި މެޗުގެ ސެޓުތައް އެފް.އެޗް.އެސް އިން ގެންދިޔައީ 25-17 އަދި 25-22ންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެފް.އެޗް.އެސްގެ ޖާރޒީ ނަންބަރ 12 އިސްމާޢީލް ޖަޒްލާނެވެ.

އެރޭ ކުޅުނު ދެވަނަ މެޗުގައި އެމް.އެން.ޔޫ ބިޒްނަސް ސްކޫލް އާއި ސީ.އެފް.އެސް ބައްދަލުކޮށް އެ މެޗު ސީދާ ދެ ސެޓުން ކާމިޔާބުކުރީ ސީ.އެފް.އެސް އެވެ. މި މެޗުގެ ސެޓުތައް ސީ.އެފް.އެސް އިން ގެންދިޔައީ 25-16 އަދި 25-18ންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ ސީ.އެފް.އެސްގެ ޖާރޒީ ނަންބަރ 02 ފަރުޙަތު ޖަލީލެވެ.

އެރޭ ކުޅެވުނު ފަހު މެޗު އަދި މުބާރާތުގެ ގްރޫޕް ސްޓޭޖްގެ ފަހު މެޗުގައި ބައްދަލުކުރީ ފިރިހެން ޑިވިޝަންގެ ގްރޫޕް ބީގެ ސްކޫލް އޮފް ނާރސިންގ (އެސް.އެން) އަދި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އެވެ. މި މެޗު ސީދާ 2 ސެޓުން އެސް.އެން ކާމިޔާބުކުރީ 25-16 އަދި 25-13 ންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެސް.އެންގެ ޖާރޒީ ނަންބަރ 07 ޢަބްދުﷲ ނަޖީހެވެ.

މިއާއެކު ގްރޫޕް އޭގެ އެއްވަނައިގެ ގޮތުގައި ސީ.އެފް.އެސް ވަނީ ސެމީ ފައިނަލަށް ދަތުރުކޮށްފައެވެ. ބުދަދުވަހުގެރޭ ކުޅެވޭ ސެމީ ފައިނަލު މެޗުގައި ސީ.އެފް.އެސް ބައްދަލުކުރަން ޖެހޭނީ ގްރޫޕް ބީގެ ދެވަނައިގައި އޮތް އެސް.އެން އާއެވެ. ގްރޫޕް އޭގެ ދެވަނައިގެ ގޮތުގައި އެމް.އެން.ޔޫ ބިޒްނަސް ސްކޫލް ސެމީ ފައިނަލަށް ދަތުރުކޮށްފައިވާއިރު، އެ ޓީމުން ބައްދަލުކުރަން ޖެހޭނީ ގްރޫޕް ބީގެ އެއްވަނަ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އާއެވެ.

މި މުބާރާތުގައި ދެން ކުޅެވިގެންދާނީ އަންހެން ޑިވިޝަނުގެ ސެމީ ފައިނަލް މެޗުތަކެވެ. އެގޮތުން އަންގާރަދުވަހުގެރޭ ކުޅެވޭ ސެމީ ފައިނަލުގެ ފުރަތަމަ މެޗުގައި ބައްދަލު ކުރާނީ ގްރޫޕް އޭގެ އެއްވަނަ ޓީމު އެމް.އެން.ޔޫ ބިޒްނަސް ސްކޫލާއި ގްރޫޕް ބީގެ ދެވަނަ ޓީމު އެފް.އެޗް.އެސް އެވެ. ސެމީ ފައިނަލުގެ ދެވަނަ މެޗުވެސް އަންގާރަދުވަހުގެރޭ ކުޅެން ނިންމާފައިވާއިރު، މި މެޗުގައި ބައްދަލުކުރާނީ ގްރޫޕް ބީގެ އެއްވަނަ އަދި މިދިޔަ އަހަރުގެ ޗެމްޕިއަން ސްކޫލް އޮފް ނާރސިންގ (އެސް.އެން) އާއި ގްރޫޕް އޭގެ ދެވަނަ އަދި މި މުބާރާތުގެ އެންމެ ކާމިޔާބު ޓީމު ފެކަލްޓީ އޮފް އެޑިއުކޭޝަން (އެފް.އީ) އެވެ.

އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީޚީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.